Davlat maktabgacha taʼlim tashkilotlarida sogʻlom ovqatlantirishni tashkil etish boʻyicha nazorat tadbirlari oʻtkazilmoqda

Amudaryo tumani Maktabgacha va maktab taʼlimi boʻlimi tasarrufida 52 ta maktabgacha taʼlim tashkilotlari mavjud. Mazkur muassasalarda tuman Sanitariya-epidemiologik osoyishtalik va jamoat salomatligi boʻlimi tomonidan bolalarni sogʻlom ovqatlantirish holati oʻrganilib, Vazirlar Mahkamasining tegishli qaroriga muvofiq belgilangan rejaviy-jadval asosida har oyda sanitariya nazorati oʻtkazilib borilmoqda.

Bundan tashqari, tuman Sanitariya-epidemiologik osoyishtalik va jamoat salomatligi boʻlimi tomonidan maktabgacha taʼlim tashkilotlarida sogʻlom ovqatlanishni tashkil etish hamda ovqatlanish bilan bogʻliq kasalliklarning oldini olish yuzasidan amalga oshirilishi lozim boʻlgan chora-tadbirlar dasturi ham ishlab chiqilgan boʻlib, ushbu dastur ijrosini taʼminlash maqsadida targʻibot-tashviqot ishlari ham yoʻlga qoʻyilgan.

Ayni paytda Amudaryo tumani Tibbiyot birlashmasi, Maktabgacha va maktab taʼlimi boʻlimi hamda Sanitariya-epidemiologik osoyishtalik va jamoat salomatligi boʻlimlari masʼul xodimlari ishtirokida ishchi guruh tuzilib, davlat maktabgacha taʼlim tashkilotlari oshxonalarida nazorat ishlari olib borilmoqda.

Mazkur jarayonda Oʻzbekiston Respublikasi Vazirlar Mahkamasining 2025-yil 6-yanvardagi 1-sonli Qarori asosida tuzilgan “Brakeraj komissiyasi”ning faoliyati oʻrganilib, tarbiyalanuvchilar uchun “Yagona mavsumiy taomnoma” asosida ovqat tayyorlanishi, ovqat tayyorlash texnologiyasiga amal qilish holati koʻzdan kechirilmoqda. Qolaversa, muassasaga keltirilgan oziq-ovqat mahsulotlarining sifati va ularning omborxonalarda sanitariya-gigiyena qoida va meʼyorlari talablari asosida saqlanishi, ishlatish muddatiga amal qilinishi, tarbiyalanuvchilarning ertalabki filtrdan oʻtkazilib qabul qilinishi, tibbiy xonaning jihozlanishi va tibbiy yordam koʻrsatilishi hamda bolajonlarning chuqur tibbiy koʻrikdan oʻtkazilishi nazorat qilinmoqda.

Navbatdagi nazorat tadbirlari joriy yilning 30-oktyabr sanasida Choykoʻl ovuli hududida joylashgan 16- va 36-sonli davlat maktabgacha taʼlim tashkilotlarida oʻtkazildi. Vazirlar Mahkamasining “Davlat maktabgacha taʼlim tashkilotlarida sogʻlom ovqatlantirish tartibini takomillashtirish toʻgʻrisida”gi qarori hamda Bosh Davlat Sanitariya vrachining tegishli buyrugʻi talablari ijrosini taʼminlash maqsadida oʻtkazilgan nazorat tadbirlari davomida tarbiyalanuvchilarning yuqumli va yuqumli boʻlmagan kasalliklarga chalinishining oldini olishga qaratilgan ishlar oʻrganildi. Oziq-ovqat mahsulotlarining sifatli saqlanishi, maishiy uskuna va anjomlarning sanitariya-gigiyena talablariga mosligi koʻzdan kechirilib, tayyorlanayotgan taomlarning quvvatlilik darajasi oʻrganildi. Bundan tashqari, ovqat tayyorlashda kundalik taomnomada koʻrsatilgan mahsulotlardan toʻliq, samarali va sifatli foydalanish meʼyorlariga amal qilish holati ham nazorat qilindi.

Oʻrganish natijalariga koʻra aniqlangan kamchiliklar joyida bartaraf qilinib, mazkur maktabgacha taʼlim tashkilotlari rahbarlariga kelgusida bu kabi kamchiliklarga yoʻl qoʻymaslik boʻyicha tegishli tavsiyalar berildi. Bolalar oʻrtasida yuqumli parazitar kasalliklarning oldini olish maqsadida tarbiyalanuvchilar soha mutaxassislari tomonidan laboratoriya-instrumental usulda tekshiruvdan ham oʻtkazildi.

Maktabgacha taʼlim tashkilotlari tarbiyalanuvchilarini xavfsiz va sogʻlom ovqatlantirish boʻyicha Amudaryo tuman Tibbiyot birlashmasi, Maktabgacha va maktab taʼlimi boʻlimi hamda Sanitariya-epidemiologik osoyishtalik va jamoat salomatligi boʻlimi xodimlaridan iborat ishchi guruhi tomonidan tumandagi barcha davlat maktabgacha taʼlim tashkilotlarida nazorat tadbirlari davom etmoqda.

Nigora Eshimova, Amudaryo tumani SEO va JSB sanitariya-gigiyena boʻlimi mudirasi.