JINOYaT IShLARI BOʻYIChA TUMAN SUDI TOMONIDAN KORRUPTsIYaGA QARShI KURASh BOʻYIChA SAYYoR UChRAShUV VA SAYYoR SUD MAJLISI OʻTKAZILDI

Jinoyat ishlari boʻyicha Amudaryo tuman sudi tomonidan korruptsiyaga qarshi qaratilgan tashkiliy chora-tadbirlar doirasida aholi bilan sayyor uchrashuvlar hamda sayyor sud majlislarini oʻtkazishga alohida eʼtibor qaratilmoqda.

Ana shunday tadbirlardan navbatdagisi Jinoyat ishlari boʻyicha Amudaryo tuman sudining tergov sudyasi vazifasini vaqtincha bajaruvchi Ansatbay Qarajanov tomonidan tuman Ichki ishlar boʻlimi binosining majlislar zalida, shu hududda istiqomat qiluvchi fuqarolar ishtirokida oʻtkazildi.

Fuqarolar bilan yuzma-yuz, ochiq va oshkora muloqot tarzidagi mazkur sayyor uchrashuvda Jinoyat ishlari boʻyicha Amudaryo tuman sudining tergov sudyasi vazifasini vaqtincha bajaruvchi Ansatbay Qarajanov Oʻzbekiston Respublikasi Prezidentining “Korruptsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korruptsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida”gi Farmonida belgilangan vazifalar xususida tadbir ishtirokchilariga batafsil maʼlumot va tushunchalar berdi.

Xususan, korruptsiya davlat va jamiyat taraqqiyoti uchun eng jiddiy xavf-xatarlardan biri ekanligini aholi va davlat xizmatchilari ongiga singdirish orqali bu xavfli illatga barham berish, “Korruptsiyaga qarshi kurash toʻgʻrisida”gi Oʻzbekiston Respublikasi Qonunining mazmun-mohiyati va undan kelib chiqadigan vazifalar borasida soʻz yuritdi.

Shu bilan birga sayyor uchrashuvda fuqarolarga korruptsiyaga qarshi kurashda qonuniylik; fuqarolar huquqlari, erkinliklari va qonuniy manfaatlarining ustuvorligi; ochiqlik va shaffoflik; tizimlilik; davlat va fuqarolik jamiyatining hamkorligi; korruptsiyaning oldini olishga doir chora-tadbirlar ustuvorligi; javobgarlikning muqarrarligi toʻgʻrisida ham keng tushunchalar berildi.

Uchrashuv davomida sayyor sud majlisi tashkil qilinib, unda Amudaryo tumani Ichki ishlar boʻlimi tomonidan taqdim qilingan jami 36 ta huquqbuzarlik holati boʻyicha ishlar koʻrib chiqildi.

Oʻzbekiston Respublikasi Maʼmuriy javobgarlik toʻgʻrisidagi Kodeksining tegishli moddalarida koʻrsatilgan maʼmuriy huquqbuzarliklarni sodir etgan shaxslarga nisbatan toʻplangan maʼmuriy ish materiallari ushbu huquqbuzarliklarni sodir etgan fuqarolarning yaqinlari va mahalladoshlari ishtirokida koʻrib chiqildi. Huquqbuzar deb topilgan shaxslarga nisbatan qonunda nazarda tutilgan jazolar tayinlanib, sud tomonidan adolatli qarorlar qabul qilindi.

Uchrashuv va sayyor sud majlisida fuqarolar ham faol ishtirok etishib, huquqbuzarlik holatlarini sodir etgan shaxslarga jamiyatda yurish-turish qoidalariga qatʼiy amal qilish, atrofidagi odamlarga toʻgʻri, oqilona munosabatda boʻlish, bir-birovga nisbatan hurmat nazari bilan qarash zarurligi milliy-maʼnaviy qadriyatlarimizga xosligi haqida maslahatlar berdilar hamda korruptsiyaga qarshi kurash borasidagi oʻz fikr-mulohazalari hamda takliflarini bildirdilar. Shuningdek, ular har bir fuqaro halol mehnat qilish orqali mamlakatimizni korruptsiyadan xoli, barcha sohalari barqaror rivojlangan jamiyatga aylantirishdek ezgu ishda hamjihatlik bilan harakat qilishi zarurligini taʼkidladilar.

RAVShAN BAHROMOV.