Namunaliklar “Inson qadri uchun” tamoyilini oʻz hayotlarida his etib yashamoqdalar

Amudaryo tumanidagi Namuna mahallasida turli millat vakillari oʻzaro ahil-inoqlikda yashab, mehnat qilishadi. Yaxshi va yomon kunda bir-birining mushkulini oson, ogʻirini yengil qilib yashash, milliy-maʼnaviy anʼana va urf-odatlarni asrab-avaylash, bir-biriga mehr-oqibat koʻrsatish va saxovatpeshalik namunaliklarga bobomeros qadriyat hisoblanadi.

Mahallada kompleks xizmat koʻrsatuvchi ijtimoiy xodim Navroʻzbek Safarov va “Mahalla yettiligi” aʼzolarining oʻzaro hamkorligi natijasida 536 ta xonadon tarkibidagi 764 oilada istiqomat qiluvchi 3048 nafar aholi xatlovdan oʻtkazildi. Uyma-uy yurib aholining hayot tarzi keys-menejment usulida oʻrganilganida 12 toifadagi fuqarolar 100 xildan ortiq ijtimoiy xizmatga muhtojligi aniqlandi.

Ayniqsa, oʻzgalar parvarishiga muhtoj, yolgʻiz keksalar va nogironligi bor fuqarolar holidan xabar olish, ularni qoʻllab-quvvatlash, hayot neʼmatlaridan bahramand yashashlarini taʼminlash nafaqat ijtimoiy xodim, balki har bir namunalikning insoniylik burchiga aylangan.

Mahallada yashovchi oʻzgalar parvarishiga muhtoj, yakka-yolgʻiz va nogironligi boʻlgan 1 nafar shaxsga ijtimoiy xodim Navroʻzbek Safarovning saʼy-harakatlari, qolaversa, homiylikka olish istagini bildirgan namunalik tadbirkorning saʼy-harakatlari bilan assistent biriktirilib, zarur ijtimoiy xizmatlar koʻrsatib kelinmoqda.

Oʻtgan davr mobaynida 8 nafar nogironligi boʻlgan shaxslarga protez-ortopediya moslamalari, reabilitatsiya texnik vositalari olib berildi. 10 nafar nogironligi boʻlgan, lekin oʻziga yarasha ish bilan taʼminlanish istagidagi fuqarolarning imkoniyatlari oʻrganilib, barqaror daromadli ishlarga jalb etildi.

Oʻz salomatligini tiklash niyatidagi 2 nafar fuqaroning davolanishlari uchun “Saxovat va koʻmak” jamgʻarmasi hisobidan amaliy yordam koʻrsatildi. Yana bir nafar nogironligi boʻlgan bola esa psixologik tibbiy-pedagogik komissiya nazoratidan oʻtkazilib, inklyuziv taʼlim olishi uchun sharoit yaratib berildi. Shuningdek, 3 nafar nogironligi boʻlgan yoshlarning imkoniyatlari alohida oʻrganilib, ular adaptiv sport yoʻnalishiga jalb etildi va muntazam shugʻullanishlari uchun sharoit yaratildi.

Mahallada kam taʼminlangan oilalar toifasiga kiritilgan 62 ta oilaga bolalar nafaqasi va moddiy yordam tayinlanib, 33 ta oila kambagʻallik reyestriga kiritildi. Ayni paytda hokim yordamchisi bilan hamkorlikda mazkur oilalar uchun individual rejalar tuzilib, ularni kambagʻallikdan chiqarish choralari koʻrilmoqda.

Ijtimoiy xodimning saʼy-harakatlari bilan 113 ta oilaga kuz-qish mavsumini betalofat oʻtkazishlariga koʻmaklashish maqsadida ularning kommunal toʻlovlari uchun bir martalik moddiy yordam ajratildi. 8 ta kam taʼminlangan oilalar farzandlari maktabgacha taʼlim tashkilotiga imtiyozli ravishda joylashtirildi.

Oʻtgan davr mobaynida tazyiq va zoʻravonlikka uchragan 12 nafar ayol-qizga himoya orderlari rasmiylashtirilib, ularga zarur psixologik va huquqiy yordamlar koʻrsatildi. Mahalladagi 2 nafar yetim bolalar hamda ota-onalari chet davlatlarda mehnat muhojirligida boʻlgan 7 nafar bolalarning muammolari ijobiy yechim topdi.

Mahallada yashovchi Sevara Jumaniyazovaning oilasi kambagʻallik reyestriga kiritilgan, uning oʻzi II guruh nogironi. Unga qarab kelayotgan turmush oʻrtogʻi mavsumiy ishlarga jalb etilib, farzandlarining munosib taʼlim olishlari uchun sharoit yaratildi va ushbu oila uyda qarab turish xizmati bilan taʼminlandi.

Mahallada faoliyat yuritayotgan kompleks xizmat koʻrsatuvchi ijtimoiy xodim Navroʻzbek Safarov “Inson qadri uchun” tamoyili asosida samarali faoliyat olib bormoqda. Uning faoliyati inson qadr-qimmati hamma narsadan ustunligini amalda namoyon etmoqda. Zero, bu hayot insonlarning baxt-u saodatni, birdamlik va mehr-oqibatni, xayr-u saxovatni toʻlaqonli his etib yashashlari bilan goʻzaldir.

ROBIYa YOʻLDOShEVA.