“XAVFSIZ VA SOGʻLOM YuRT” LOYIHASI DOIRASIDA TEZKOR PROFILAKTIK TADBIRLAR OʻTKAZILDI

Oʻzbekiston Respublikasi Prezidentining “Taʼlim muassasalarida yoʻl harakati qoidalari targʻibotini kuchaytirish chora-tadbirlari toʻgʻrisida”gi Farmonida belgilangan vazifalarni izchillik bilan amalga oshirish, oʻsib kelayotgan yosh avlodni yoʻl harakati bilan bogʻliq xavf-xatarlardan himoya qilish, yoʻllarda harakat xavfsizligini taʼminlash maqsadida Amudaryo tuman Ichki ishlar boʻlimi Yoʻl harakati xavfsizligi boʻlimi inspektorlari tomonidan taʼlim muassasalarida muntazam targʻibot-tashviqot ishlari olib borilmoqda. Taʼlim-tarbiya muassasalarida koʻngilli yoshlar ishtirokida “Yoʻl harakati xavfsizligi targʻibotchisi” va “Yashil chiroq” musobaqalari tashkil etilib, barcha yosh toifalaridagi oʻquvchi-yoshlar qamrab olinmoqda.

Navbatdagi ana shunday targʻibot tadbiri Amudaryo tumani Maktabgacha va maktab taʼlimi boʻlimi tasarrufidagi 36-sonli umumtaʼlim maktabi oʻquvchi-yoshlari ishtirokida “Yoʻl harakati intizomi bolalikdan boshlanadi” shiori ostida oʻtkazildi.

Tadbir avvalida tuman Ichki ishlar boʻlimining Yoʻl harakati xavfsizligi boʻlimi boshligʻi Begzod Qazaqov maktabda tashkil etilgan yoʻl harakatini oʻrganish maydonchasi va yoʻl harakati xavfsizligi sinf xonasi bilan yaqindan tanishdi.

Shu bilan birga, Begzod Qazaqov taʼlim muassasalarida yoʻl harakati qoidalari targʻibotini kuchaytirish borasida qonunchilik hujjatlarida belgilangan chora-tadbirlar xususida oʻquvchilarga batafsil maʼlumot va tushunchalar berdi. Oʻz navbatida oʻquvchi-yoshlar yoʻl harakati xavfsizligi boʻyicha oʻzlarini qiziqtirgan savollar bilan murojaat qildilar. Ularning savollariga javob berish jarayonida Begzod Qazaqov yoʻllarda, chorrahalarda, piyodalar oʻtish joylarida harakatlanish asoslarini amaliy koʻrgazmali tarzda, oʻquvchilar ishtirokida tashkil etib, yoʻl harakati qoidalariga amal qilish yoʻllarda harakatlanish madaniyati ekanligini taʼkidladi.

Shu kuni Yoʻl harakati xavfsizligi boʻlimi boshligʻi Begzod Qazaqov rahbarligida “Xavfsiz va sogʻlom yurt” loyihasi doirasida keng qamrovli tezkor profilaktik tadbiri ham oʻtkazildi. Tadbir davomida tumanimiz yoʻllarida harakatlanayotgan avtotransport vositalarining texnik holati va haydovchilarning harakat xavfsizligi qoidalariga amal qilish holatlari oʻrganildi.

Keng qamrovli nazorat tadbirlari jarayonida YHXB inspektorlari tomonidan 4 ta holatda avtotransportni boshqarish huquqini tasdiqlovchi hujjatlarsiz transport boshqarish, 7 ta holatda avtomobilni noqonuniy qayta jihozlash holati aniqlandi. Shuningdek, 1 nafar haydovchining spirtli ichimlik isteʼmol qilgan holda, 5 nafar haydovchining esa qoidabuzarliklari uchun qarzdorligi boʻla turib, transport vositasini boshqarayotgani holati aniqlandi. Tezkor nazorat tadbirlari jarayonida qoidabuzarligi qayd qilingan jami 23 nafar fuqarolarning avtotransport vositalari jarima maydonchasiga qoʻyilib, haydovchilarga nisbatan bayonnomalar rasmiylashtirildi.

Yoʻl qoidasi — umr foydasi, deb bekorga aytishmagan. Haqiqatan ham mamlakatimiz qonunchilik hujjatlari bilan mustahkamlab qoʻyilgan yoʻl harakati qoidalariga, yoʻlda harakatlanish madaniyatiga amal qilish nafaqat insonlarning umrini uzaytiradi, balki el-yurt osoyishtaligi, salomatligi va farovonligini taʼminlaydi.

ROBIYa YOʻLDOShEVA.