Prokuratura masʼullari otaliqqa olingan yoshlar bilan uchrashdilar

Bugungi kunda mamlakatimizda yoshlar siyosati yangi bosqichga koʻtarildi. Yigit-qizlarning muammolarini xizmat xonalarida emas, balki “mahallabay” va “xonadonbay” tizimi asosida bevosita joyiga chiqib oʻrganish, ularni qiynayotgan masalalarga tezkor yechim topish davlat siyosatining ustuvor yoʻnalishiga aylandi. Davlatimiz rahbarining tashabbusi bilan joriy etilgan rahbarlarning yoshlarni “otaliqqa olish” amaliyoti Amudaryo tumanida ham oʻzining ijobiy samarasini bermoqda.

Maʼlumki, jamiyatda huquqbuzarlik va jinoyatchilikning oldini olish, hayotda oʻz oʻrnini topishga qiynalayotgan yoki ijtimoiy-huquqiy koʻmakka muhtoj yoshlarni qoʻllab-quvvatlash maqsadida tumandagi tashkilot rahbarlariga yoshlar nomma-nom biriktirilgan. Bu tizim doirasida Amudaryo tumani prokurori Bahrom Masharipovga 8 nafar, tuman prokurori oʻrinbosari Omirbay Xudaybergenovga 7 nafar hamda Departamentning tuman boʻlimi boshligʻi Maxsetbay Utepbergenovga 7 nafar — jami 22 nafar yoshlar “otaliqqa” biriktirilgan.

Tuman prokuraturasi tashabbusi bilan mazkur toifadagi yoshlar ishtirokida uchrashuv tashkil etilib, ularning muammolri tinglandi. Taʼkidlash joizki, muloqot rasmiyatchilikdan xoli, ochiq va samimiy ruhda oʻtdi. Unda tuman prokurori va masʼul rahbarlar oʻzlariga biriktirilgan yoshlar bilan yuzma-yuz oʻtirib, dildan suhbatlashdilar.

Uchrashuvdan koʻzlangan asosiy maqsad — “otaliqqa” olingan yoshlarning bugungi kundagi real holatini oʻrganish, ularning oilaviy va ijtimoiy muhiti bilan yaqindan tanishish hamda kelajakdagi maqsadlarini roʻyobga chiqarishga koʻmaklashishdan iborat boʻldi.

Ochiq muloqot davomida yoshlar oʻzlarini oʻylantirayotgan masalalarni ekin bayon etdilar. Xususan, ishtirokchilar doimiy ish oʻrniga ega boʻlish va oilasiga daromad keltirish, oʻz biznesini boshlash maqsadida imtiyozli kreditlar va yer maydonlari olish tartibi, kasb-hunarga oʻqish, zamonaviy IT texnologiyalarini oʻrganish, tibbiy xizmat va sogʻliqni saqlashga oid murojaatlarni oʻrtaga tashladilar.

Rahbarlar har bir murojaatni diqqat bilan tinglab, ularni hal etish yuzasidan masʼullarga aniq muddatli topshiriqlar berdilar va ijrosini oʻz nazoratiga oldilar.

Shuni alohida taʼkidlash kerakki, yoshlarni "otaliqqa olish" tizimi faqat muammolarni hal qilish bilan cheklanib qolmaydi. Masʼullar yoshlarning iqtidor va tashabbuslari ham qoʻllab-quvvatlashga eʼtbor qaratadilar. Ularning qiziqishlaridan kelib chiqib, sport, madaniyat va axborot-kommunikatsiya texnologiyalari sohalarida oʻz qobiliyatlarini namoyon etishlari uchun zarur sharoitlar yaratib berish masalasi ham masʼullarning doimiy eʼtiborida. Uchrashuvda yoshlar bilan bu borada ham suhbat qurilib, ularning qiziqishlari va kelajakdagi rejalari tinglandi.

Xulosa oʻrnida aytganda, Amudaryo tumani prokurori va huquqni muhofaza qiluvchi organlar rahbarlari tomonidan amalga oshirilayotgan bunday xayrli ishlar yoshlarning ertangi kunga boʻlgan ishonchini mustahkamlamoqda. Bu saʼy-harakatlar ularni jamiyatning faol va tashabbuskor aʼzosi sifatida shakllanishiga, eng muhimi, kelajagimiz egalarini turli yot gʻoyalar taʼsiri va jinoyatchilik koʻchasidan asrab qolishga xizmat qiladi.