Ichimlik suv inshootlari texnologik auditdan oʻtkazilmoqda

Maʼlumki, Orolboʻyi mintaqasida aholini toza ichimlik suvi bilan taʼminlash, suv resurslaridan oqilona foydalanish va kommunal sohadagi infratuzilmani modernizatsiya qilish masalasi davlatimiz va hukumatimizning doimiy eʼtibor markazidagi masalalardan biri hisoblanadi. Sababi, aholining turmush farovonligini oshirish, salomatligini muhofaza qilish bevosita sifatli ichimlik suvi taʼminotiga bogʻliq.

Shu bois, sohada olib borilayotgan islohotlar koʻlami yil sayin kengayib, mavjud suv inshootlarining texnik holatini yaxshilash va xizmat koʻrsatish sifatini oshirishga qaratilgan aniq chora-tadbirlar amalga oshirilmoqda. Xususan, bugungi kunda "Qoraqalpoq suv taʼminoti" aktsiyadorlik jamiyati tomonidan respublika hududidagi 412 dona suv inshootlari orqali xalqimizga toza ichimlik suvi yetkazib berish hamda kanalizatsiya xizmatlarini koʻrsatish yoʻlga qoʻyilgan. Biroq, ushbu inshootlarning samaradorligini doimiy ravishda tahlil qilish va nazoratga olish davr talabidir.

Bu borada Oʻzbekiston Respublikasi Prezidentining 2025-yil 14-apreldagi "Qurilish va uy-joy kommunal xoʻjaligi sohasida davlat nazoratini samarali tashkil etish chora-tadbirlari toʻgʻrisida"gi 66-sonli farmoni soha xodimlari oldiga yangi va dolzarb vazifalarni qoʻydi. Mazkur farmonning 4-kichik bandiga muvofiq, 2025-yilning 1-iyulidan boshlab barcha ichimlik suv taʼminoti va oqova suvlarni chiqarib yuborish tizimi obʼektlarini texnologik auditdan oʻtkazish tartibi qatʼiy belgilab berildi. Bundan koʻzlangan asosiy maqsad — tizimdagi mavjud muammolarni oʻz vaqtida aniqlash, maʼnan va jismonan eskirgan uskunalarni yangilash hamda energiya resurslarini tejash orqali aholiga koʻrsatilayotgan xizmatlar sifatini oshirishdan iboratdir.

Farmon ijrosini taʼminlash maqsadida Qoraqalpogʻiston Respublikasi hududiy qurilish va uy-joy kommunal xoʻjaligi sohasida nazorat inspektsiyasi hamda "Qoraqalpoq suv taʼminoti" aktsiadorlik jamiyati mutaxassislari hamkorligida texnologik audit oʻtkazish boʻyicha maxsus reja-grafik ishlab chiqildi va amaliyotga tatbiq etildi.

Tasdiqlangan reja-jadvalga asosan, ayni kunlarda joylardagi ichimlik suv taʼminoti va oqova suv tizimi obʼektlarida keng qamrovli oʻrganish ishlari olib borilmoqda. Inspektsiya xodimlari tomonidan obʼektlarning qurilgan yili, loyihaviy va amaldagi quvvati, ishlab chiqarish unumdorligi, modernizatsiya qilish zarurati va boshqa muhim texnologik parametrlari sinchkovlik bilan koʻzdan kechirilmoqda. Bu jarayon shunchaki statistik maʼlumot toʻplash emas, balki inshootlarning samaradorligini tekshiruvchi chuqur tahliliy jarayondir.

Ushbu reja-jadval asosida yaqinda Amudaryo tumanining Boʻz yop ovuli hududida joylashgan suv inshootida ham nazorat tadbirlari oʻtkazildi. Mutaxassislar stantsiyaning bugungi kundagi texnik holatini oʻrganib, nasos agregatlarining ish samaradorligi, suv tozalash tizimining sozligi va elektr energiyasi sarfi koʻrsatkichlarini tahlil qildilar.

Texnologik auditning eng muhim jihati uning natijadorligida namoyon boʻladi. Oʻrganishlar yakuniga koʻra, Qoraqalpogʻiston Respublikasi hududiy qurilish va uy-joy kommunal xoʻjaligi sohasida nazorat inspektsiyasi tomonidan har bir obʼekt boʻyicha maxsus xulosalar tayyorlanadi.

Ushbu hujjatda koʻzdan kechirilgan qurilmaning unumdorligini oshirish, aniqlangan texnik kamchiliklarni bartaraf etish, zarur hollarda uskunalarni zamonaviy tejamkor texnologiyalarga almashtirish boʻyicha aniq tavsiya va koʻrsatmalar aks etadi. Bu esa suv taʼminoti korxonalariga oʻz faoliyatini qayta koʻrib chiqish, mavjud resurslardan oqilona foydalanish va pirovardida aholini uzluksiz va sifatli ichimlik suvi bilan taʼminlash imkonini beradi.

Hozirgi vaqtda bunday nazorat tadbirlari Qoraqalpogʻistonning barcha tuman va shaharlarida davom ettirilmoqda. Zero, har bir xonadonga kirib borayotgan toza ichimlik suvi — xalqimiz farovonligi va salomatligining muhim kafolatidir.