Xavfsiz mahalla – osoyishta hayot tayanchi: Amudaryoda zamonaviy qoʻriqlash tizimlari qanday ishlamoqda?

Mamlakatimizda “Xavfsiz mahalla” tamoyilini hayotga tatbiq etish, fuqarolarning tinch va osoyishta hayot kechirishini taʼminlash, huquqbuzarliklarning barvaqt oldini olish hamda jamoat tartibini mustahkamlash davlat siyosatining ustuvor yoʻnalishlaridan biri hisoblanadi. Bu jarayonda zamonaviy axborot texnologiyalari, intellektual qoʻriqlash tizimlari va tezkor nazorat mexanizmlarining oʻrni tobora ortib bormoqda. Ayniqsa, Oʻzbekiston Respublikasi Prezidentining 2025-yil 3-yanvardagi “Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori sohaga yangi mazmun va amaliyot olib kirdi.

Mazkur qarorda belgilangan vazifalar ijrosini taʼminlash maqsadida Amudaryo tumani Ichki ishlar boʻlimi huzuridagi Qoʻriqlash xizmati tomonidan keng koʻlamli chora-tadbirlar amalga oshirilmoqda. Xususan, mahallalarda jinoyatchilikka qarshi samarali profilaktika ishlarini yoʻlga qoʻyish, aholi mol-mulkini ishonchli himoya qilish va xavfsiz muhitni yaratish borasida salmoqli natijalarga erishilmoqda.

2025-yil davomida tuman hududida joylashgan 320 ta fuqaro xonadonlari hamda 252 ta davlat va tadbirkorlik subʼektlariga tegishli obʼektlar zamonaviy qoʻriqlash pultlari, yongʻindan ogohlantirish signalizatsiya vositalari va maxsus “tashvish” tugmalari bilan jihozlanib, Qoʻriqlash xizmati tizimiga ulandi. Mazkur texnik vositalar orqali obʼektlardagi vaziyat doimiy ravishda masofadan nazorat qilinib, har qanday shubhali holat yoki xavf yuzaga kelganda tezkor chora koʻrish imkoniyati yaratildi.

Aholi zich joylashgan koʻp qavatli uylarda xavfsizlikni taʼminlash masalasi ham eʼtibor markazida boʻldi. Jumladan, tumandagi 36 ta koʻp qavatli uyning kirish yoʻlaklariga zamonaviy qoʻriqlash tizimlari, videokuzatuv uskunalari va “tashvish” tugmalari oʻrnatildi. Bu orqali ushbu uylarda istiqomat qilayotgan 730 ta xonadon egalarining xavfsizligi, mulkining daxlsizligi va umumiy osoyishtaligi taʼminlandi. Bunday tizimlar nafaqat jinoyatlarning oldini olish, balki fuqarolarda xavfsiz hayotga boʻlgan ishonchni mustahkamlashga ham xizmat qilmoqda.

Shuningdek, odamlar gavjum boʻladigan jamoat joylari, savdo majmualari va bozorlarda tezkorlikni taʼminlash alohida ahamiyat kasb etmoqda. Xususan, Mangʻit shahrining Navoiy mahallasi hududidagi Mangʻit dehqon bozoriga 6 ta, Beruniy mahallasida joylashgan “Mangʻit savdo kompleksi”ga 5 ta hamda ushbu savdo majmuasining Navoiy mahallasi hududidagi filialiga 2 ta “tashvish” tugmalari oʻrnatildi. Mazkur tizimlar orqali favqulodda holatlarda Qoʻriqlash xizmati xodimlari qisqa vaqt ichida voqea joyiga yetib kelib, zarur choralarni koʻrish imkoniyatiga ega boʻlmoqda.

Bugungi kunda Amudaryo tumani Ichki ishlar boʻlimi huzuridagi Qoʻriqlash xizmatining 1 va 2-sonli Texnik qoʻriqlash markazlari tomonidan jami 550 ta davlat va turli yoʻnalishdagi tadbirkorlik obʼektlari, 371 ta yakka tartibdagi fuqaro xonadonlari hamda koʻp qavatli uylardagi yuzlab xonadonlar tunu kun uzluksiz nazorat ostida qoʻriqlanmoqda. Bu esa tuman hududida jinoyatchilik darajasini kamaytirish, huquqbuzarliklarning oldini olish va aholining osoyishta hayot kechirishini taʼminlashda muhim omil boʻlib xizmat qilmoqda.

Sohadagi islohotlar izchil davom ettirilmoqda. Davlatimiz rahbarining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi qarori ijrosini taʼminlash maqsadida ayni kunlarda Qoʻriqlash xizmati xodimlari tomonidan mahallalarda xatlov ishlari olib borilmoqda. Ushbu jarayonda aholi bilan yaqin muloqot oʻrnatilib, zamonaviy qoʻriqlash xizmatlarining afzalliklari, xavfsizlikni taʼminlashda fuqarolarning faol ishtirokining ahamiyati keng tushuntirilmoqda. Zero, har bir xonadon, har bir mahalla va butun jamiyat xavfsizligi har bir fuqaroning masʼuliyatiga bogʻliq. Oʻz uyimiz, mahallamiz va yurtimiz tinchligini asrash — barchamizning muqaddas burchimizdir.