Amudaryo tumani sport maktabi – yoshlar salomatligi va yuksak natijalar maskani

Bugungi kunda Amudaryo tumani sport maktabi nafaqat tuman, balki Qoraqalpogʻiston Respublikasida ommaviy va professional sportni rivojlantirishda yetakchi muassasalardan biri sifatida faoliyat yuritmoqda. Sport maktabining asosiy maqsadi – yoshlarni sogʻlom turmush tarziga jalb qilish, ularning boʻsh vaqtini mazmunli tashkil etish, shuningdek, iqtidorli sportchilarni kashf etib, yuksak sport marralariga yetkazishdan iborat.

Amudaryo tumani sport maktabi hududlarda joylashgan 3 ta asosiy sport bazasi orqali oʻz faoliyatini olib bormoqda. 1-baza – asosiy baza Amudaryo tumani “Olmazor” mahallasida joylashgan boʻlib, bu yerda 105x55 metr oʻlchamdagi futbol stadioni va 3000-oʻringa moʻljallangan tribuna mavjud. Bundan tashqari, bazada 12x24 metrli sport zali, 9x18 metrli voleybol maydoni, 14x28 metrli basketbol maydoni hamda 11x25 metrli yopiq suzish basseyni mavjud boʻlib, bu inshootlar turli sport turlari boʻyicha mashgʻulotlar oʻtkazishga xizmat qilmoqda.

2-baza Amudaryo tumani “Doʻstlik” mahallasida joylashgan. Ushbu hududda 100x70 metrli futbol stadioni va 850-oʻrinli tribuna mavjud boʻlib, u asosan futbol sport turiga ixtisoslashgan. Shuningdek, 7x9 metrli 2 ta kurash va stol tennisi zallari hamda 7x9 metrli badiiy gimnastika zali faoliyat yuritmoqda. Bu yerda dzyudo, kurash, stol tennisi, futbol va badiiy gimnastika yoʻnalishlarida muntazam mashgʻulotlar olib borilmoqda.

3-baza esa “Chordara” mahallasida joylashgan boʻlib, bu yerda 12x24 metrli sport zali (kurash va boks uchun) hamda 9x14 metrli moslashtirilgan stol tennisi zali mavjud.

Bugungi kunda Amudaryo tumani sport maktabida jami 28 ta sport turi boʻyicha mashgʻulotlar olib borilmoqda. Jumladan, 16 ta olimpiya sport turlari: dzyudo, boks, stol tennisi, taekvondo WT, badminton, ogʻir atletika, suzish, tennis, erkin kurash, yengil atletika, badiiy gimnastika, voleybol, futbol, basketbol, regbi va gandbol, 2 ta milliy sport turlari: oʻzbek kurashi va oʻzbek jang sanʼati, 3 ta noolimpiya sport turlari: qoʻl jangi, shaxmat, karate WKF, 7 ta parasport turlari: para dzyudo, para oʻq otish, para pauyerlifting, para stol tennisi, para taekvondo, para badminton.

Sport maktabida 157 ta guruhda jami 2240 nafar sportchi, shundan 730 nafari qizlar muntazam shugʻullanmoqda. Ularning bilim va mahoratini oshirishda 68 nafar sport murabbiylari faoliyat olib bormoqda. Murabbiylarning 50 nafari oliy maʼlumotli, 20 nafari oliy toifali murabbiylar boʻlib, bu sport maktabida yuqori malakali kadrlar faoliyat yuritayotganidan dalolat beradi.

Soʻnggi yillarda Amudaryo tumani sportchilari respublika va xalqaro musobaqalarda salmoqli natijalarga erishib kelmoqda. 2024–2025 oʻquv yilida Oʻzbekiston Respublikasi chempionatlari va kuboklarida jami 86 ta medal, jumladan 18 ta oltin, 26 ta kumush va 41 ta bronza medallari qoʻlga kiritildi.

Osiyo chempionati va kuboklarida esa 5 ta medal, xalqaro turnirlarda esa 12 ta medal jamgʻarildi. Boks, dzyudo va taekvondo WT sport turlarida sportchilarimiz 3 ta oltin, 2 ta kumush va 7 ta bronza medallariga sazovor boʻlishdi.

Alohida eʼtiborga molik jihati shundaki, 14 nafar sportchi Oʻzbekiston terma jamoalari safiga qabul qilindi, ulardan 11 nafari asosiy tarkib aʼzolari hisoblanadi.

Prezidentimiz tashabbusi bilan amalga oshirilayotgan “Besh tashabbus olimpiadasi” doirasida Amudaryo tumanida mahalla va sektor bosqichlarida sport musobaqalari keng koʻlamda oʻtkazildi. Respublika final bosqichi natijalariga koʻra, tuman yoshlarimiz 7 ta medalni qoʻlga kiritib, Qoraqalpogʻiston Respublikasida yetakchi oʻrinni egallab kelmoqda.

Mazkur loyiha doirasida 2025-yilgacha 16 ta sport maydonchasi qurib berildi, 2026-yilda esa Beshtom va Chordara mahallalarida zamonaviy workout maydonchalari barpo etilishi rejalashtirilgan.

Amudaryo tumani sport maktabi bugungi kunda yoshlar salomatligini mustahkamlash, iqtidorli sportchilarni kashf etish va yurtimiz sporti nufuzini oshirish yoʻlida samarali faoliyat olib bormoqda. Zamonaviy sport inshootlari, tajribali murabbiylar va yuksak natijalar ushbu sport maskanining kelajakda yanada katta yutuqlarga erishishiga mustahkam zamin yaratmoqda. 

Charos Arslonova, tuman hokimligining Axborot xizmati rahbari.