“Turon yoʻlbarslari” harbiy-sport musobaqasining Respublika bosqichi oʻtkazildi

Qoraqalpogʻiston Respublikasida Ixtisoslashtirilgan taʼlim muassasalari agentligi tizimida faoliyat yurituvchi prezident, ijod va ixtisoslashtirilgan maktablar oʻquvchilari oʻrtasida anʼanaviy tarzda oʻtkazib kelinayotgan “Turon yoʻlbarslari” harbiy-sport musobaqasining Respublika bosqichi boʻlib oʻtdi. Mazkur tadbir yoshlar orasida vatanparvarlik tuygʻusini mustahkamlash, harbiy-amaliy koʻnikmalarni shakllantirish va sogʻlom turmush tarzini keng targʻib etishga qaratilgani bilan ahamiyatlidir. Bu musobaqa nafaqat jismoniy quvvat, balki bilim, intizom, tezkor fikrlash hamda jamoaviy hamjihatlikni namoyon etish maydoni sifatida yosh avlodning ruhiy va amaliy tayyorgarligiga keng imkoniyat yaratadi.

Respublika bosqichida hududlardan saralab olingan jami 21 ta jamoa oʻzaro kuch sinashdi. Bellashuvlarga tayyorgarlik jarayonida ishtirokchi oʻquvchilar oʻz bilim va mahoratini oshirishga, jamoa ruhini mustahkamlashga hamda masʼuliyatni his etib harakat qilishga alohida eʼtibor qaratgani musobaqa jarayonida yaqqol sezildi. Shartlar bir qarashda sportga oiddek tuyulsa-da, aslida har biri oʻquvchining fikrlash darajasi, irodasi, jasorati va turli vaziyatlarda toʻgʻri qaror qabul qilish qobiliyatini sinashga xizmat qildi.

Musobaqaning eng qiziqarli shartlaridan biri — “Temur tuzuklari” bilimdoni” sharti boʻldi. Ushbu shart orqali ishtirokchilarning tarixiy bilimlari, milliy merosni anglash darajasi hamda mantiqiy tafakkuri baholandi. Bugungi global axborot maydonida yoshlarning oʻz tarixi, buyuk ajdodlar merosi va davlatchilik anʼanalari haqida chuqur tasavvurga ega boʻlishi muhim ahamiyatga ega. Shu maʼnoda, “Temur tuzuklari” yoshlarning faqat jismoniy emas, maʼnaviy-axloqiy tayanchlarini ham mustahkamlashga qaratilgan oʻta dolzarb shart sifatida eʼtirof etildi.

Bellashuvlar davomida harbiy-amaliy yoʻnalishdagi topshiriqlar ayniqsa masʼuliyat talab qilgani bilan ajralib turdi. Kamondan oʻq otish va sport qurolidan nishonga aniq zarba berish shartlarida ishtirokchilarning diqqat-eʼtibori, hayajonni boshqara olishi, tana muvozanati va oʻziga ishonchi muhim ahamiyat kasb etdi. Bu kabi mashgʻulotlar yoshlarda aniqlik, sabr-toqat hamda maqsadga intilish fazilatlarini tarbiyalaydi.

Shundan keyingi shart — qurolni toʻliq boʻlmagan qismlarga ajratish va qayta yigʻish — texnik mahorat, chaqqonlik va tezkorlikni talab etdi. Har bir jamoa aʼzosi oʻz vazifasini aniq anglab, vaqt bilan hisoblashgan holda ish koʻrishi lozim boʻldi. Bu esa, oʻz navbatida, intizom va jamoa ichidagi muvofiqlashuvni kuchaytirdi.

Musobaqaning yana bir muhim va hayotiy ahamiyatga ega sharti — birinchi tibbiy yordam koʻrsatish boʻldi. Favqulodda vaziyatlarda toʻgʻri va tezkor harakat qilish, zarur paytda bir inson hayotini saqlab qolishga xizmat qiluvchi amaliy bilimlar har qanday fuqaro uchun juda muhim sanaladi. Ushbu shartda ishtirokchilarning favqulodda holatga munosabati, tez fikrlashi, holatni baholay olishi va amaliy koʻnikmalari sinovdan oʻtkazildi. Mazkur yoʻnalishdagi tajriba nafaqat harbiy-sport musobaqalarida, balki hayotning oʻzida ham yoshlarga koʻp marotaba asqotishi shubhasiz.

Bellashuvlar jarayonida jamoalar oʻzaro hamjihatlik, oʻzaro yordam, intizom va yuksak masʼuliyat namunasini koʻrsatdilar. Shartlar doirasidagi har bir harakat hakamlar hayʼati tomonidan adolatli va shaffof mezonlar asosida baholab borildi.

Qizgʻin, mukammal tayyorgarlik va iroda talab qilgan bahslar oxirida eng kuchli jamoalar aniqlandi. Yakuniy natijalarga koʻra, 1-oʻrinni Nukus shahridagi Ibrayim Yusupov nomidagi ijod maktabining “Lochinlar” jamoasi qoʻlga kiritdi. 2-oʻrin Qoraoʻzak tumani ixtisoslashtirilgan maktabining “Terbenbes” jamoasiga nasib etdi. 3-oʻrin esa Nukus shahridagi 1-sonli ixtisoslashtirilgan maktab-internatining “Jayxun” jamoasiga berildi. Gʻoliblikni qoʻlga kiritgan “Lochinlar” jamoasi musobaqaning Oʻzbekiston Respublikasi bosqichida Qoraqalpogʻiston Respublikasi sharafini himoya qilish huquqini qoʻlga kiritdi.

Tadbir yoshlarning kelajakda turli sohalarda masʼuliyatni his etgan holda mehnat qilishi, yurtga xizmat qilishga tayyor boʻlib kamol topishida muhim tajriba maktabi sifatida namoyon boʻldi. Yoshlarning harbiy-sport sohasiga boʻlgan qiziqishini oshirish, ularning amaliy koʻnikmalarini hamda vatanparvarlik tuygʻularini yanada mustahkamlash maqsadida bunday musobaqalar kelgusida ham izchil davom ettiriladi.

Shimoli-gʻarbiy harbiy okrug matbuot xizmati.