82-sonli maktabda "Uch avlod uchrashuvi" tadbiri boʻlib oʻtdi

Insoniyat tarixida avlodlar oʻrtasidagi vorisiylik, ajdodlar oʻgiti va kattalarning hayotiy tajribasi doimo jamiyatni toʻgʻri yoʻlga boshlovchi mayoq vazifasini oʻtab kelgan. Ayniqsa, bugungi shiddatli zamonda, turli yot gʻoyalar yoshlar ongini egallashga urinayotgan murakkab davrda nuroniylarning duosi va ularning ibratli hayot yoʻli nafaqat maʼnaviy ehtiyoj, balki xavfsiz va barqaror kelajakning mustahkam kafolatidir. Mamlakatimizda mahallabay ishlash tizimining yangi bosqichga koʻtarilishi, hududlarda tinchlik va osoyishtalikni taʼminlash borasidagi islohotlar zamirida ham aynan inson qadrini ulugʻlash va yosh avlodni vatanparvarlik ruhida tarbiyalash maqsadi mujassam.

Amudaryo tumanining Olmazor mahallasida joylashgan 82-sonli umumiy oʻrta taʼlim maktabida ana shunday ezgu maqsadlarni oʻzida ifoda etgan tadbir tashkil etildi. "Uch avlod uchrashuvi" shiori ostida oʻtkazilgan ushbu maʼnaviy-maʼrifiy tadbir mazmun-mohiyatiga koʻra jamiyatning barcha qatlamlarini birlashtiruvchi muhim muloqot maydoniga aylandi.

Mazkur uchrashuv davlatimiz rahbari tomonidan 2026-yil 5-yanvarda imzolangan "Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida"gi qarori ijrosi doirasida tashkil etildi. Ushbu tarixiy hujjat ijrosini taʼminlash, mahallalarda jinoyatchilikning oldini olish va yoshlarning boʻsh vaqtini mazmunli tashkil etish maqsadida "Nuroniy" jamgʻarmasi, mahalla faollari, ichki ishlar organlari va prokuratura tizimi hamkorligida bugun tumanning barcha hududlarida tizimli ishlarni amalga oshirilmoqda.

Mazkur uchrashuv ham ana shu keng koʻlamli hamkorlikning amaliy ifodasi boʻlib, unda "Nuroniy" jamgʻarmasi Amudaryo tumani boʻlimi raisi Bekman Allabergenov, tuman prokurori yordamchisi Sharyar Joldasov, mahallalarning faol oqsoqollari, maktablarga biriktirilgan inspektor-psixologlar, soha mutaxassislari va kelajagimiz egalari boʻlgan oʻquvchi yoshlar ishtirok etdilar.

Tadbirni kirish soʻzi bilan ochgan Bekman Allabergenov yoshlar tarbiyasining naqadar nozik va masʼuliyatli jarayon ekanligiga alohida toʻxtalib oʻtdi. U oʻz nutqida bugungi kun yoshlari erishayotgan yutuqlarni eʼtirof etish bilan birga, ularni huquqbuzarlik va jinoyatchilik kabi illatlardan uzoq yurishga, berilgan imkoniyatlardan oqilona foydalanishga chaqirdi. Nuroniy otaxonning hayotiy misollar bilan sugʻorilgan oʻgitlari tinglovchilarda katta taassurot qoldirdi.

Amudaryo tumani prokurorining yordamchisi Sharyar Joldasov yuqorida taʼkidlangan Prezident qarorining mazmun-mohiyatiga toʻxtalib oʻtdi. Prokuratura vakili taʼkidlaganidek, mahallada xavfsiz muhitni yaratish faqat huquq-tartibot organlarining ishi emas, balki butun jamoatchilikning, har bir fuqaroning burchidir. U oʻz nutqida Qaror doirasida olib borilayotgan ishlar, yoshlar oʻrtasida qonun ustuvorligini taʼminlash va ularni turli zararli taʼsirlardan himoya qilish boʻyicha koʻrilayotgan choralar haqida batafsil maʼlumot berdi.

Uchrashuvda hayot sinovlarida toblangan faxriylar ham soʻzga chiqib, oʻz fikr va mulohazalari bilan oʻrtoqlashdilar. Xususan, Amangul Qayupova, Xonimjon Rajapova va boshqa el ardogʻidagi onaxonlar, faxriy ustozlar soʻzga chiqib, oʻzlarining boy ish tajribalari va hayot yoʻllari haqida soʻzlab berdilar. Ularning har bir soʻzida yosh avlodga boʻlgan mehr, ularning ertasiga boʻlgan ishonch va masʼuliyat hissi sezilib turdi.

Samimiy va ochiq muloqot tarzida oʻtgan tadbirda yoshlar oʻzlarini qiziqtirgan savollariga soha mutaxassislari va nuroniylardan aniq javoblar oldilar. Bunday uchrashuvlar yoshlarda oʻz yurtiga daxldorlik hissini oshirish bilan birga, katta avlod vakillariga boʻlgan hurmat-ehtirom tuygʻusini yanada mustahkamlaydi.

Xulosa qilib aytganda, Amudaryo tumanida oʻtkazilgan ushbu "Uch avlod uchrashuvi" nafaqat hisobot yoki rasmiy tadbir, balki qalblar muloqotiga aylandi. Prezident Qarori ijrosi doirasida tashkil etilgan bunday muloqotlar mahallalarda tinchlik-osoyishtalikni asrash, jinoyatchilikning oldini olish va sogʻlom maʼnaviy muhitni qaror toptirishda beqiyos ahamiyat kasb etadi. Zero, nuroniylarning pand-nasihatlariga quloq tutgan, ajdodlar merosini qadrlagan va qonun ustuvorligini anglagan yoshlar hech qachon adashmaydi. Mazkur tadbir ham aynan shunday barkamol avlodni shakllantirish yoʻlidagi muhim qadamlardan biri boʻldi. Yurtimizdagi har bir mahalla xavfsiz, har bir xonadon tinch va har bir yoshning kelajagi porloq boʻlishi uchun mana shunday hamjihatlikdagi ishlar kelgusida ham izchil davom ettiriladi.