Xavfsiz muhit – farovon hayot garovi: Amudaryo tumanida profilaktik tadbirlar kuchaytirilmoqda

Jamiyat taraqqiyoti, inson farovonligi va yurt osoyishtaligining eng asosiy garovi bu shubhasiz, tinchlik va xavfsizlikdir. Har bir fuqaroning oʻz uyida, koʻchasida va mahallasida xotirjam harakatlanishi uning ertangi kunga boʻlgan ishonchini mustahkamlaydi, osoyishta hayot kechirishi uchun zamin yaratadi. Ayni shu maqsadda mamlakatimizda huquq-tartibot tizimini yanada takomillashtirish, jinoyatchilik va huquqbuzarliklarning oqibatlari bilan kurashishdan koʻra, ularning barvaqt oldini olishga ustuvor ahamiyat qaratilmoqda.

Oʻzbekiston Respublikasi Prezidentining “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi qarori bu boradagi ishlarni mutlaqo yangi bosqichga olib chiqdi. Mazkur muhim qaror ijrosi doirasida bugungi kunda yurtimizning barcha hududlarida xavfsiz muhit yaratish masalasi kun tartibidagi eng dolzarb vazifalardan biriga aylandi. Sababi, huquqbuzarliklarning barvaqt oldini olish, inson hayotiga va sogʻligʻiga xavf tugʻdirishi mumkin boʻlgan har qanday omillarni tezkorlik bilan bartaraf etish bugungi kunning kechiktirib boʻlmas qatʼiy talabidir.

Ayni shu yoʻnalishdagi tizimli, maqsadli va samarali ishlarning yorqin amaliy ifodasini Amudaryo tumanida olib borilayotgan keng koʻlamli tadbirlar misolida ham yaqqol koʻrish mumkin. Hududda fuqarolar xavfsizligini va qonun ustuvorligini taʼminlash maqsadida Amudaryo tumani prokuraturasi hamda Ichki ishlar boʻlimi tomonidan oʻzaro hamkorlikda tizimli ishlar yoʻlga qoʻyilgan. Oʻzaro hamkorlikda tashkil etilayotgan profilaktik tadbirlar va nazorat reydlari, avvalo, inson qadrini ulugʻlash va uning bebaho hayotini himoya qilishdek ezgu maqsadga xizmat qilmoqda. Xususan, aholi gavjum joylar, ichki va umumdavlat ahamiyatiga ega avtomobil yoʻllarida harakat xavfsizligini taʼminlash, sodir etilishi mumkin boʻlgan yoʻl-transport hodisalarining oldini olish maqsadida muntazam ravishda reyd tadbirlari oʻtkazib kelinmoqda.

Maʼlumki, yoʻl harakati xavfsizligi butun jamiyatning xotirjamligi bilan bevosita bogʻliq boʻlgan muhim yoʻnalish hisoblanadi. Yoʻllardagi har bir qoidabuzarlik nafaqat oʻsha transportni boshqarayotgan haydovchining, balki atrofdagi begunoh yoʻlovchilar, bolalar va piyodalarning hayotiga jiddiy xavf tugʻdiradi. Shu sababli, Amudaryo tumani Ichki ishlar boʻlimining Jamoat xavfsizligi xizmati Yoʻl harakati xavfsizligi boʻlinmasi xodimlari tomonidan oʻtkazilgan navbatdagi reyd tadbiri davomida yoʻllardagi barcha harakat ishtirokchilarining belgilangan qoidalarga qatʼiy va soʻzsiz rioya etishi nazoratga olindi.

Afsuski, davlatimiz tomonidan koʻrilayotgan keng qamrovli chora-tadbirlar va muntazam olib borilayotgan tushuntirish-targʻibot ishlariga qaramasdan, ayrim haydovchilar tomonidan yoʻl harakati qoidalariga bepisandlik bilan munosabatda boʻlish holatlari hamon uchrab turibdi. Yoʻl harakati xavfsizligi boʻlinmasining masʼul xodimlari tomonidan oʻtkazilgan navbatdagi nazorat-reyd tadbirlari davomida mana shunday bir qator qoʻpol qoidabuzarliklar qayd etildi. Avtotransport vositalarini tegishli hujjatlarsiz boshqarish, yosh bolalarni oldingi oʻrindiqqa joylashtirish, mast holda rulga oʻtirish va boshqa qator qoidabuzarliklar shular jumlasidandir.

Shu bilan birga, reyd davomida yoʻl qoidalarini qoʻpol ravishda buzish, tezlikni belgilangan meʼyordan keskin oshirib, maqtanchoqlik yoki shoshqaloqlik oqibatida atrofdagilar uchun real xavf yaratish holatlari ham bartaraf etildi. Shuningdek, mototransport vositalarini boshqarishda tegishli talablarga rioya qilmaslik, jumladan, himoya shlemlaridan foydalanmaslik va yoʻllarda qayrilish, burilish va quvib oʻtish jarayonida xavfsizlik qoidalariga rioya qilmaslik kabi qonunbuzarliklar nazoratchilarning diqqat markazidan chetda qalmadi.

Tadbirlar davomida huquqbuzarlarga nisbatan qonunchilikda belgilangan tartibda tegishli maʼmuriy jarimalar qoʻllanildi. Zarur hollarda, yaʼni transport vositasini boshqarishga huquqi boʻlmagan yoki mast holda boshqargan haydovchilarning avtomototransport vositalari jarima maydonchalariga joylashtirilib, koʻplab ehtimoliy fojialarning oldi olindi.

Xulosa oʻrnida shuni alohida taʼkidlash lozimki, mahallalarda va yoʻllarda xavfsiz muhitni yaratish bir martalik yoki mavsumiy tadbir emas, balki kundalik, tizimli va muntazam davom etadigan uzluksiz jarayondir. Davlatimiz tomonidan olib borilayotgan bunday qatʼiy siyosatning negizida faqat bitta ulugʻvor maqsad – inson, uning hayoti, erkinligi, shaʼni, qadr-qimmati va boshqa ajralmas huquqlarini himoya qilish maqsadi yotadi. Qonun ustuvorligi taʼminlangan va tartib-intizom qaror topgan jamiyatdagina rivojlanish, tinchlik va haqiqiy farovonlik boʻladi. Shunday ekan, yoʻllarda harakatlanish chogʻida oʻrnatilgan qoidalarga qatʼiy amal qilish orqali nafaqat oʻzimizning, balki atrofdagilarning ham xavfsizligi va hayotini asrab qolishimizni hech qachon unutmasligimiz lozim.