Amudaryoda mutasaddilar va fermerlarning ochiq muloqoti oʻtkazildi

Bugungi murakkab global sharoitda oziq-ovqat xavfsizligini taʼminlash, ichki bozorni sifatli va arzon mahsulotlar bilan toʻldirish har qachongidan ham dolzarb ahamiyat kasb etmoqda. Shu bois, yurtimizda fermerlik harakatini rivojlantirish, yer egalarini har tomonlama qoʻllab-quvvatlash va ularga zarur shart-sharoitlarni yaratib berish davlat siyosatining ustuvor yoʻnalishlari qatoridan mustahkam joy olgan. Ushbu jarayonlarning amaliy ifodasi sifatida joylarda soha mutasaddilari va dehqonlar oʻrtasida muntazam ravishda yuzma-yuz muloqotlar, ochiq hamda konstruktiv uchrashuvlar tashkil etib kelinmoqda. Ana shunday ahamiyatli tadbir Amudaryo tumanidagi “Amirxon” fermer xoʻjaligi dalasida ham boʻlib oʻtdi.

Mazkur uchrashuvda mamlakatimizning qishloq xoʻjaligi sohasi rivojiga masʼul boʻlgan yuqori darajadagi rahbarlar va vakillar ishtirok etdi. Xususan, Oʻzbekiston Liberal-demokratik partiyasi Siyosiy Kengashi Ijroiya qoʻmitasi raisi, Oʻzbekiston Fermerlar kengashi raisi Aktam Haitov, Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasi raisi Ravshan Mamutov, Oliy Majlis Qonunchilik palatasi deputati Adhambek Ismailov hamda Amudaryo tumani hokimi Sobir Xoʻjametovlar tumanda faoliyat yuritayotgan fermer xoʻjaliklari rahbarlari bilan bevosita muloqot qilishdi. Davlat vakillari hamda yer egalarini umumiy davraga jamlagan ushbu yigʻilish tom maʼnoda boy tajriba almashish, mavjud muammolarga samarali yechim topish va kelgusi istiqbolli rejalarni belgilab olish maydoniga aylandi.

Tanqidiy-tahliliy ruhda oʻtgan muloqot chogʻida mamlakatimizda agrar tarmoqni yanada modernizatsiya qilish, dehqon va fermerlarni har tomonlama qoʻllab-quvvatlash tizimini takomillashtirish masalalari diqqat markazida boʻldi. Bugungi kunda qishloq xoʻjaligini rivojlantirishni zamonaviy agrotexnologiyalarsiz tasavvur etib boʻlmaydi. Shu nuqtai nazardan yigʻilishda ilgʻor texnologiyalarni amaliyotga keng joriy etish, ayniqsa, global iqlim oʻzgarishlari va suv tanqisligi kuzatilayotgan bugungi murakkab sharoitda suv va yer resurslaridan oqilona, tejamkorlik bilan foydalanish borasida amalga oshirilayotgan keng koʻlamli ishlar xususida atroflicha fikr almashildi. Har qarich yerdan maksimal darajada samarali foydalanish, tuproq unumdorligini saqlash va oshirish orqali yuqori hosildorlikka erishish yoʻllari ilmiy asoslangan holda muhokama qilindi. Shuningdek, mutasaddilar tomonidan joriy qishloq xoʻjaligi mavsumini yuqori uyushqoqlik va qatʼiy tartib-intizom bilan oʻtkazish boʻyicha fermerlarga qator muhim tavsiyalar berildi.

Uchrashuv davomida eʼtirof etilgan jihatlardan yana biri shuki, bu yilgi gʻalla oʻrimi mavsumi muvaffaqiyatli va talofatsiz yakunlandi. Maʼlumki, gʻalla – xalqimizning bebaho rizq-roʻzi, dasturxonimiz toʻkinligining asosiy kafolatidir. Shu bois, jazirama issiq va turli tabiiy injiqliklarga qaramay, kechayu kunduz fidokorona mehnat qilib, joriy yilgi gʻalla hosilini nes-nobud qilmasdan, qisqa muddatlarda yigʻib-terib olgan fermer va dehqonlarning zaxmatkash mehnati yuksak baholandi. Ularning mamlakat oziq-ovqat xavfsizligini taʼminlash, xalqimiz farovonligini yuksaltirishga qoʻshayotgan ulkan hissasi uchun davlat vakillari tomonidan samimiy tashakkurlar izhor etildi. Bu kabi yuksak eʼtibor dehqonlarning kayfiyatini koʻtarib, kelgusida ham bundan-da yuqori marralarni zabt etishlariga, yanada ulkan natijalarga erishishlariga kuch bagʻishlaydi.

Gʻalla oʻrimi yakunlanishi bilan qishloq xoʻjaligi sohami xodimlari oldida navbatdagi muhim va masʼuliyatli vazifa paydo boʻladi. Bu – gʻalladan boʻshagan yer maydonlariga takroriy ekinlarni agrotexnik talablarga qatʼiy amal qilgan holda ekish vazifasidir. Muloqot davomida aynan mana shu masala, yaʼni aholini yil davomida arzon, toʻyimli va eng asosiysi, sifatli qishloq xoʻjaligi mahsulotlari bilan uzluksiz taʼminlash strategiyasi qizgʻin muhokama qilindi.

Agronomlar va soha mutaxassislari tomonidan ekin maydonlaridan yil davomida kamida 2 yoki 3-martagacha hosil olish imkoniyatlarini yaratish, bu orqali yerning iqtisodiy samaradorligini oshirish zarurligi taʼkidlandi. Nafaqat ichki bozorni taʼminlashga, balki jahon bozorlarida talab yuqori boʻlgan eksportbop mahsulotlar yetishtirish hajmini koʻpaytirishga ham eʼtibor qaratildi. Bu jarayon, oʻz navbatida, fermer xoʻjaliklarining moliyaviy barqarorligini taʼminlash va mamlakatning umumiy eksport salohiyatini yuksaltirishda asosiy drayver vazifasini oʻtaydi. Yerdan yil davomida uzluksiz va samarali foydalanish mexanizmini yoʻlga qoʻyish umumiy muhokamalarning asosini tashkil qildi.

Amudaryo tumanida  oʻtkazilgan ushbu kengaytirilgan uchrashuv mamlakatimiz agrar sektorida olib borilayotgan tizimli va chuqur oʻylangan islohotlarning amaldagi yorqin ifodasi boʻldi. Davlat organlari rahbarlari va bevosita yer egalari oʻrtasidagi bunday samimiy hamda ochiq muloqotlar sohadagi mavjud muammolarni tezkor va samarali hal etishga xizmat qilibgina qolmay, mehnatkash dehqonlarning ertangi kunga boʻlgan ishonchini ham har tomonlama mustahkamlaydi.

Zamonaviy ilm-fan yutuqlarini va raqamli texnologiyalarni amaliyotga izchil tatbiq etish, hayot manbai boʻlgan suv va bebaho boyligimiz boʻlgan yerdan oʻta oqilona foydalanish, shuningdek, har qarich yer qadrini bilib, fidokorona mehnat qilish orqali Oʻzbekiston qishloq xoʻjaligi mutlaqo yangi va yuksak bosqichga koʻtarilmoqda. Zero, yerga mehr bergan, undan unumli foydalana olgan inson hech qachon kam boʻlmaydi, uning halol mehnati esa butun xalqning turmush farovonligiga, davlatning iqtisodiy qudratiga oʻzining salmoqli hissasini qoʻshadi.