Yoshlar bilan ochiq muloqotda aniq vazifalar belgilandi

Yosh avlodning kasb tanlashi, mehnat bozoriga kirishi va oʻz salohiyatini roʻyobga chiqarishi — bugungi ijtimoiy siyosatning eng ustuvor yoʻnalishlaridan biri boʻlib, bu borada hududlarda olib borilayotgan ishlarning samaradorligi koʻp jihatdan rahbarlar bilan yoshlar oʻrtasidagi bevosita muloqotning qanchalik mazmunli tashkil etilganiga bogʻliq.

Maʼlumki, yoshlarning bandligini taʼminlash faqat boʻsh ish oʻrinlarini topish bilan cheklanmaydi. Har bir yigit-qizning qiziqishi, olgan taʼlimi va kelajakka oid maqsadini inobatga olgan holda yoʻnaltirish, zarur boʻlsa kasb-hunarga oʻqitish yoki tadbirkorlik faoliyatiga jalb etish talab etiladi. Bu esa har bir yosh bilan alohida ishlashni, uning imkoniyatini va ehtiyojini aniq bilishni talab qiladigan murakkab jarayondir.

Shu maqsadda Amudaryo tumanida respublika miqyosidagi rahbarlar ishtirokida yoshlar bilan uchrashuvlar tashkil etildi. Mazkur muloqotlardan asosiy koʻzlangan maqsad — yoshlarning bandligini taʼminlash, ularning muammo va takliflarini oʻrganish, ish bilan taʼminlash hamda kelajakdagi kasbiy faoliyatini yoʻlga qoʻyish borasida amaliy koʻmak berishdan iborat boʻldi.

Uchrashuvlar tumandagi Toʻlqin, Xitoy hamda Oʻrtaqalʼa ovul fuqarolar yigʻinlari binolarida boʻlib oʻtdi. Ularda mazkur hududlar va ularga yaqin mahallalardan 70 nafarga yaqin yoshlar ishtirok etdi. Uchrashuvlarning bir emas, uch joyda oʻtkazilishi esa tumandagi turli hududlarda yashovchi yoshlarni qamrab olish imkonini berdi.

Uchrashuvlarda 2026-yilda oliy taʼlim va professional taʼlim muassasalarini, shuningdek, umumtaʼlim maktablarini tamomlagan bitiruvchilar hamda hozirda ishsiz boʻlgan yoshlar bilan yuzma-yuz fikr almashildi. Tadbirda Qoraqalpogʻiston Respublikasi Vazirlar Kengashi raisining oʻrinbosari Bayram Otemuratov, Qoraqalpogʻiston Respublikasi Soliq boshqarmasi boshligʻi Erkin Nurmonov, Amudaryo tumani hokimi Sobir Xoʻjametov, hokim oʻrinbosarlari hamda tumandagi barcha tashkilot va idoralar rahbarlari qatnashdi. Bu esa koʻtarilgan har qanday masala boʻyicha javobgar mutasaddi bilan bevosita oʻsha yerning oʻzida muloqot qilish sharoitini yaratdi. Natijada yoshlar savoliga javob olish uchun idoradan idoraga yurishga hojat qolmadi.

Muloqot davomida yoshlarning bandligini taʼminlash, ularni mavjud boʻsh ish oʻrinlariga joylashtirish, kasb-hunarga yoʻnaltirish, tadbirkorlik faoliyatiga jalb etish hamda oʻz qiziqishi va salohiyatini roʻyobga chiqarish imkoniyatlari muhokama qilindi.

Shu oʻrinda aytish kerakki, uchrashuvlarning ovul fuqarolar yigʻinlari binolarida, yaʼni yoshlarning oʻzlari yashab turgan hududda oʻtkazilishi muloqotning erkin va ochiq kechishiga xizmat qildi hamda masofa tufayli ishtirok etish imkoni boʻlmagan yoshlar muammosi ham oʻz-oʻzidan bartaraf etildi. Odatda markazdagi yigʻinlarga borish uchun vaqt va yoʻl xarajati talab etilishini hisobga olsak, bu usulning qulayligi yana ham ayon boʻladi.

Har bir yoshning murojaati va taklifi alohida tinglanib, mavjud muammolar atroflicha tahlil etildi. Bu jarayon rasmiy hisobot tarzida emas, balki har bir ishtirokchi oʻz fikrini toʻliq aytib olishi uchun yetarli vaqt ajratilgan holda tashkil qilindi.

Bildirilgan masalalar yuzasidan tegishli tashkilot va idoralar rahbarlariga ularning yechimini topish, yoshlarni qoʻllab-quvvatlash hamda bandligini taʼminlash boʻyicha zarur choralarni koʻrish yuzasidan aniq vazifalar belgilandi.

Uchrashuvlarda yoshlarni tadbirkorlikka jalb etish masalasiga ham alohida eʼtibor qaratildi. Oʻz ishini boshlashga intilayotgan yigit-qizlar uchun mavjud imkoniyatlar, shu jumladan moliyaviy koʻmak va oʻquv-amaliy yordam tartiblari tushuntirildi. Chunki yoshlarning koʻpchiligi mavjud imtiyoz va qulayliklar haqida toʻliq maʼlumotga ega boʻlmasligi sababli ulardan foydalanmay qoladi. Shu bois bunday uchrashuvlarda imkoniyatlarni oddiy va tushunarli tilda tushuntirib berish alohida ahamiyat kasb etadi.

Bundan tashqari, muloqot chogʻida yoshlarning oʻzlaridan kelib tushgan takliflar ham inobatga olindi. Bu esa keyingi ishlarni rejalashtirishda hududdagi real holatdan kelib chiqib ish yuritish, qogʻozda emas, amalda natijaga erishish imkonini beradigan muhim vosita hisoblanadi.

Xulosa qilib aytganda, mazkur uchrashuvlar yoshlarning ovozini bevosita eshitish, ularning ehtiyojini hujjatlar orqali emas, yuzma-yuz suhbatda aniqlash yoʻlidagi amaliy qadam boʻldi. Belgilangan vazifalarning ijrosi va har bir murojaatning oʻz yechimini topishi esa yoshlarni jamiyatimizning faol aʼzolariga aylantirishda muhim omil sanaladi. Zero, yoshlar bilan ishlashda asosiy mezon — oʻtkazilgan tadbirlar soni emas, balki hal etilgan masalalar miqdoridir.