“AYoLLAR DAFTARI”GA KIRITILGAN 55 NAFAR XOTIN-QIZLAR DOIMIY ISh BILAN TAʼMINLANDI

Mamlakatimizda ayollar va yoshlar davlatimizning doimiy gʻamxoʻrligida boʻlib, ularning turmushi sifatini oshirish, qulay mehnat sharoitini yaratish, oʻz ustida izlanib, salohiyatini yuksaltirishiga alohida eʼtibor qaratilmoqda.

Tuman prokuraturasi tomonidan ogʻir ijtimoiy vaziyatga tushib qolgan xotin-qizlarga, tadbirkor va tadbirkorlik qilish istagini bildirgan ayollarga amaliy hamda huquqiy yordamlar koʻrsatish, shu bilan birga xotin-qizlarning huquqlarini himoya qilish yuzasidan bir qancha ishlar amalga oshirilmoqda.

Tuman prokuroriga biriktirilgan 2-sektor hududida oʻtkazilgan xatlovlar natijasida 13 ming 909 nafar 30 yoshdan yuqori  xotin-qizlar orasida anketa soʻrovnoma oʻtkazildi. Natijada 30-54 yosh oraligʻidagi xotin-qizlar 10 ming 271 nafar, 55 yoshdan yuqorisi 3 ming 638 nafarni tashkil qilib, 285 nafari nogironligi bor xotin-qizlar ekanligi aniqlandi.

Shuningdek, mehnatga layoqatli xotin-qizlar 12 ming 57 nafarni tashkil qilib, ularning 704 nafari ishlash istagini bildirishgan, shundan 170 nafari tikuvchilik, 151 nafari qishloq xoʻjaligi sohasida, 90  nafari tadbirkorlik, 173 nafari oʻzini oʻzi band qilish, 76 nafari haq toʻlanadigan jamoat ishlarida, 44 nafari boshqa sohalarda ishlash istagini bildirishgan.

Shularni eʼtiborga olib, 2-sektor hududida  mehnatga layoqatli ishsiz xotin-qizlarning bandligini taʼminlash maqsadida sektor hududidagi 2-sonli kasb-hunar maktabida tikuvchilik va shirinliklar pishirish yoʻnalishlari boʻyicha kasbga oʻqitish oʻquv markazlari tashkil qilinib hozirgi kunda 65 nafardan ortiq xotin-qizlar mazkur kasbga oʻqitish markazida taxsil olib, kasb-hunar oʻrganishmoqda.

Sektor hududidagi “Ayollar daftari”ga kiritilgan 5 nafar xotin-qizlarning bandligini taʼminlash maqsadida subsidiya tartibida issiqxona qurib berildi va chorva mollari berilib oʻzini oʻzi band qilish orqali bandligi taʼminlandi.

Shuning bilan birga “Ayollar daftari”ga kiritilgan 55 nafar xotin-qizlar doimiy ish bilan taʼminlandi. Xususan, “Qilichboy” ovulida yashovchi fuqarolar M.Zarifboyeva va X.Azimbayevalar tuman Xalq taʼlimi boʻlimiga qarashli 83-sonli umumtaʼlim maktabiga oʻqituvchi lavozimiga ishga joylashtirilib, doimiy bandligi taʼminlandi.  

Bundan, tashqari tumandagi “Tamara-Feruza” korxonasi tikuvchilik tsexi rahbari, tadbirkor Tamara Yusupova tomonidan 2-sektor hududidagi “Besh ovul”, “Toshqalʼa” hamda “Yuqori qishloq” mahallalarida tsex shohobchalari tashkil qilinib, “Ayollar daftari”ga kiritilgan 15 dan ortiq xatin-qizlar ushbu shohobchalarga ishga joylashtirildi. Tadbirkor tomonidan yana tikuvchilik sohasi boʻyicha  xotin-qizlarni kasbga oʻqitish va ularning bandligini taʼminlash yuzasidan joriy yilning fevral oyidan boshlab, oʻquv qurslari tashkil qilinishi rejalashtirilmoqda.

“Qilichboy” ovuli hududida yashovchi fuqaro tomonidan sektor rahbarining tavsiyasi hamda koʻmagi natijasida tomorqa yerining 2-sotix maydonida issiqxona tashkil qilinib, meva-sabzavot mahsulotlari yetishtirilib kelinayotgan edi. Ushbu fuqaro tomorqasidagi 3 sotix maydonga yana bir issiqxona tashkil qilib, hududda yashovchi “Ayollar daftari”ga kiritilgan 5 xonadonda yashovchi xotin-qizlarning bandligini taʼminladi.

2020-yil davomida 2-sektor hududida 35 ta oilalar nikohdan ajrashishgan boʻlib, mazkur oilalarning 18 tasi sektor rahbari, mahalla faollari tomonidan yarashtirildi. Mahalla faollari va ishchi guruh tomonidan oila muqaddasligi haqida olib borilgan targʻibot ishlari natijasida ular yarashib, qayta oila qurib, birga yashab kelishmoqda.

2-sektor tomonidan “Mahalla - sektor - Xalq qabulxonasi - Mahalla” tamoyili asosida samarali hamkorlik  tizimi joriy etilib, xotin-qizlarni qoʻllab-quvvatlash, hududni jinoyatchilikdan holi hududga aylantirish yuzasidan ijobiy ishlar davom ettirilmoqda.

(Foto - uza.uz/)