JISMONIY FAOLLIK HAFTALIGI DOIRASIDA TADBIRLAR OʻTKAZILDI

13-fevralda “Salomatlik kuni” munosabati bilan ommaviy sport va targʻibot tadbirlari oʻtkazildi.
Ushbu tadbirlar tuman Tibbiyot birlashmasi tomonidan Prezidentimizning "Sogʻlom turmush tarzini keng tatbiq etish va ommaviy sportni yanada rivojlantirish chora-tadbirlari toʻgʻrisida"gi hamda “Birlamchi tibbiy-sanitariya yordami muassasalari faoliyatiga mutlaqo yangi mexanizmlarni joriy qilish va sogʻliqni saqlash tizimida olib borilayotgan islohotlar samaradorligini yanada oshirish chora-tadbirlari toʻgʻrisida”gi Farmonlarida belgilangan vazifalar ijrosini taʼminlash  maqsadida jismoniy faollik haftaligi doirasida tashkil etildi. Haftalik doirasidagi tadbirlar ertalabki  jismoniy  badantarbiya mashqlari   va  “5000 qadam” shiori ostida faol yurishdan boshlandi.

Shundan soʻng, tadbirlar Tibbiyot birlashmasi xodimlari tomonidan guruhlarga boʻlingan holda davom ettirildi.
 Boʻston mahallasida toʻgʻri ovqatlanish guruhi tomonidan “Sogʻlom ovqatlanishning inson salomatligidagi oʻrni”, “Sogʻlom ovqatlanish tartibi va   qoidalariga oʻrgatish” mavzularida targʻibot ishlari olib borildi. Mahalla hududidagi xonadonlarda qoʻl yuvish tartibi, oshxonani toza tutish, ichimlik suvini toʻgʻri saqlash, chiqindi tashlanadigan chuqurlarni tayyorlash, hojatxonani toʻgʻri qurish borasidagi gigiyenik talablar, har bir xonadon aʼzosining alohida shaxsiy gigiyena vositalariga ega boʻlish zarurligi boʻyicha koʻrgazmali mashgʻulotlari oʻtkazildi.

Jismoniy faollik guruhi tomonidan esa 30-sonli maktab sport maydonchasida  maktab oʻqituvchilari, mahallaning uyushmagan aholisi va faollari ishtirokida uchrashuv oʻtkazildi. Uchrashuvda jismoniy faollik, ommaviy sportning inson salomatligida tutgan oʻrni mavzusida suhbat va savol-javob tashkil etildi.
Ushbu tadbirlarda Boʻston mahallasida istiqomat qiluvchi 100 nafardan ziyod aholi qamrab olindi.

F.Abdullayev, tuman Tibbiyot birlashmasi boshligʻi.