EʼTIBORSIZLIK – FAVQULODDA HOLATLARNING YuZAGA KELIShIGA SABAB BOʻLADI

Qoraqalpogʻiston Respublikasi Vazirlar Kengashining 2020-yil 26-oktyabr kungi yigʻilish bayonnomasi ijrosini taʼminlash maqsadida tumanimizdagi 4 ta sektorlar kesimida aholini favqulodda vaziyatlarda himoya qilish yuzasidan qator ishlar amalga oshirilmoqda.
Tuman Favqulodda vaziyatlar boʻlimi, Ichki ishlar boʻlimi, Tibbiyot birlashmasi, Mahalla va oilani qoʻllab-quvvatlash boʻlimi “Amudaryotumangaz taʼminoti” filiali hamda elektr tarmoqlari korxonasi xodimlaridan iborat tuzilgan ishchi guruhlar tomonidan amaliy-nazariy mashgʻulotlar oʻtkazib kelinmoqda.
Tuman Favqulodda vaziyatlar boʻlimi xodimlari tomonidan oʻtgan yil davomida tumandagi 49 ta koʻp qavatli uylarda, yakka tartibdagi 32115 ta aholi turar joylarida yashovchi fuqarolar bilan uchrashuvlar oʻtkazilib, yashash uylarining yongʻinga qarshi holatlari koʻzdan kechirilli oʻtin, koʻmir, gaz isitish pechlaridan notoʻgʻri foydalanish holatlari aniqlandi. Ushbu xonadonlarda noxush holatlar, yaʼni chaqnash (portlash), yongʻin va is gazidan hamda uy sharoitida tayyorlangan konserva mahsulotlardan zaharlanishning oldini olish maqsadida tumandagi 49 ta OFY va MFYlarda yashovchi fuqarolarga zarur tushuntirish va tavsiyalar berildi.
Oʻtkazilgan tadbirlar davomida tuman Yongʻinga qarshi kurashish jamiyati xodimlari tomonidan fuqarolarning yashash uylaridagi isitish pechlari texnik koʻrikdan oʻtkazib, 458 ta dudburonlari chang tortish moslamasi yordamida tozalab berildi. Aniqlangan 348 ta nosoz dudburonlar taʼmirlanib, soz holatga keltirildi.
Tumanda oʻtgan 2020-yil davomida 33 ta yongʻin qayd etildi. Shundan 11 tasi yashash uyida, 3 tasi paxta qabul qilish maskanlarida, 1 tasi avtomobilda, 18 tasi aholining molxona va cherdaklarida sodir boʻlgan.
Tuman Favqulodda vaziyatlar boʻlimi xodimlari tomonidan tumandagi 49 ta OFY va MFYlarda 2021-yil davomida noxush holatlarning oldini olish maqsadida yangi chora-tadbirlar rejasi ishlab chiqilib, xodimlar tomonidan profilaktik tadbir davom ettirilmoqda.
Fuqarolarimiz shuni unutmasliklari kerakki, oddiygina eʼtiborsizlik favqulodda holatlarni keltirib chiqarishi mumkin. Bunday holatlar yuzaga kelmasligi uchun esa hamisha ogoh boʻlish zarur.

G.Z.OʻRALOV, tuman FVB boshligʻi oʻrinbosari, podpolkovnik.