Jamiyat 01.03.2021 👁 240

“ZOʻRAVONLIKSIZ OILA – SOGʻLOM OILA” MAVZUSIDA KOʻRGAZMALI OʻQUV-SEMINAR OʻTKAZILDI

Inson huquq va erkinliklarini, qonuniy manfaatlarini taʼminlashga ustuvor ahamiyat qaratilayotgani natijasida oilaga, ayol zotiga boʻlgan munosabat oʻzgarib, ularga hurmat-ehtirom koʻrsatish hayotimizning maʼno-mazmuniga, asosiy maqsadiga aylandi.
Ayol goʻzal boʻlsa – olam goʻzal, ayol baxtli boʻlsa – oila, butun jamiyat baxtli boʻladi. Bugun Oʻzbekistonda yashayotgan har bir ayol, chin maʼnoda baxtli. Zero, uning huquq va erkinliklari qonunlar bilan mustahkamlangan.
Oʻzbekiston tarixida ilk bor 2019-yilning 2-sentyabrida “Xotin-qizlar va erkaklar uchun teng huquq hamda imkoniyatlar kafolatlari toʻgʻrisida”gi va “Xotin-qizlarni tazyiq va zoʻravonlikdan himoya qilish toʻgʻrisida”gi Qonunlar qabul qilindi. Ushbu qonun xujjatlari xotin-qizlarni turmushda, ish joylarida, taʼlim muassasalarida va boshqa joylarda tazyiq va zoʻravonlikdan himoya qilish sohasidagi munosabatlarni ham tartibga soladi. Tazyiq va zoʻravonlikni boshidan oʻtkazgan shaxslarni himoya qilish, jamiyatda ayollarga nisbatan tazyiq va zoʻravonlikning har qanday shakliga murosasiz muhitni qaror toptirishni kafolatlaydi.
Oʻzbekiston Respublikasi Gender tenglikni taʼminlash masalalari boʻyicha komissiyasining 5-sonli bayonida har bir viloyatda tanlov asosida bitta tuman markazi faoliyatini namunali yoʻlga qoʻyib, ular negizida hududlardagi markazlar xodimlari uchunkoʻrgazmali oʻquv-seminari oʻtkazish belgilangan edi. Qoraqalpogʻiston Respublikasi boʻyicha zoʻrlik ishlatishdan jabr koʻrgan shaxslarni reabilitatsiya qilish va moslashtirish, oʻz joniga qasd qilishning oldini olish markazi Amudaryo tuman boʻlinmasi namunali deb topildi va 2021-yil 20-fevral kuni “Zoʻravonliksiz oila – sogʻlom oila” mavzusida koʻrgazmali oʻquv-seminar boʻlib oʻtdi.

Seminarga Qoraqalpogʻiston Respublikasi zoʻrlik ishlatishdan jabr koʻrgan shaxslarni reabilitatsiya qilish va moslashtirish, oʻz joniga qasd qilishning oldini olish markazi direktori Sayyora Nasirova, malakali psixolog Roza Amanova, Nukus shahar, Xoʻjayli, Qoraoʻzak, Taxiatosh, Beruniy, Elliqalʼa tumanlari ijrochi direktorlari, masʼul xodimlari va jamoatchilik asosida biriktirilgan mutaxassislar qatnashdilar.
Koʻrgazmali oʻquv-seminar markazning jihozlanishi, moddiy-texnik bazasi va ish uslubining Nizom talablariga mos kelishi, hujjatlar yuritilishi bilan tanishishdan boshlandi. Seminar ishtirokchilari markazning jihozlanishi bilan yaqindan tanishdilar va oʻzlarini qiziqtirgan savollarga javob oldilar.
Shundan keyin “Zoʻravonliksiz oila – sogʻlom oila” mavzusidagi koʻrgazmali oʻquv-seminarining ikkinchi qismi tuman hokimligi binosida davom ettirilib, markazning tuman boʻlinmasi ijrochi direktori Gavhar Chimbaychiyeva, Qoraqalpogʻiston Respublikasi markazi direktori Sayyora Nasirova, psixolog Roza Amanova, tuman tibbiyot birlashmasi boshligʻi oʻrinbosari, bosh pediatr Gulshod Yusupovalar maʼruzalar qildilar. Maʼruzalar yuzasidan qizgʻin munozaralar davomida ishtirokchilar ayollarga nisbatan zoʻravonlik holatlarining oldini olish sohasidagi ijobiy yutuqlari, xususan, tumanda ayollarning ijtimoiy moslashuv markazi tashkil etilgani, maishiy zoʻravonlik qurboni boʻlgan ayollar uchun yagona “ishonch telefon” raqamlari ishga tushirilgani, ogʻir hayotiy vaziyatga tushib qolgan ayollar uchun psixolog, huquqshunos maslahatlarining tashkil etilganligi, zoʻravonlikning oldini olish boʻyicha tashviqot ishlari kuchaytirilganligi qayd etildi.
Koʻrgazmali oʻquv-seminar yakunida ishtirokchilar zoʻravonlik masalalari boʻyicha aholining xabardorligini oshirish, shuningdek, davlat, huquq-tartibot hamda NNTlarning zoʻravonlikning har qanday turining oldini olishga qaratilgan hamkorliklarini kuchaytirish lozimligini taʼkidladilar.