ISTIROHAT BOGʻIDA SALOMATLIK KUNIGA BAGʻIShLANGAN TADBIRLAR OʻTKAZILDI

Inson uchun eng katta boylik bu salomatlikdir. Sogʻlom inson sogʻlom fikrlaydi, oʻz maqsadi sari olgʻa intiladi. Salomatlikni asrash uchun eng muhim vosita esa bu badan tarbiyasi, jismoniy harakat hisoblanadi. Shu bois sport bilan shugʻullanadigan kishilar nafaqat jismonan, balki maʼnan sogʻlom, irodasi mustahkam, sogʻlom fikrlaydigan insonlar sanalishadi.

Sport ruhiyatni ham sogʻlom qiladi, ruhiyati sogʻlom inson esa hayotning har jabhasida faol va harakatchan boʻladi. Qolaversa, sport bilan muntazam shugʻullanadiganlar tartib-intizomga, tozalikka odatlanadi, serharakatligi bois ovqat hazm qilish jarayoni ham yaxshi kechadi.

Shu yil 7-aprelda Butunjahon salomatlik kuni munosabati bilan  tumandagi Istirohat bogʻida Tibbiyot birlashmasi xodimlari tomonidan  tadbirlar tashkil etildi. Tadbirda tuman Tibbiyot birlashmasi masʼullari ishtirok etdilar va 1950-yildan boshlab, 7-aprelning Butunjahon salomatlik kuni sifatida belgilangani, shundan buyon  insonlarning salomatligini saqlash maqsadida yil kasalligi belgilanib, uning oldini olish boʻyicha chora-tadbirlar ishlab chiqish, profilaktika ishlarini olib borish yoʻlga qoʻyilgani xususida soʻzladilar.

Shuningdek, Prezidentimizning oʻtgan yilgi “Sogʻlom turmush tarzini keng tatbiq etish va ommaviy sportni yanada rivojlantish chora-tadbirlari toʻgʻrisida”gi Farmonida sogʻlom ovqatlanish tamoyillari, jismoniy faollik  va ommaviy sport turlari bilan shugʻullanishni keng targʻib etish koʻrsatilgani, shunga koʻra tashkilot va korxonalarda, maktabgacha taʼlim tashkilotlari va maktablarda  shanba salomatlik kuni deb belgilangani, bu borada amalga oshirilayotgan chora-tadbirlarga keng toʻxtalib oʻtildi. Turli sport musobaqalarini oʻtkazish, shaxsiy gigiyenaning ahamiyati, zararli odatlarga berilmaslik  har bir fuqaroning kundalik hayoti  tarziga aylantirilishiga imkon yaratish  Davlat siyosati darajasiga koʻtarilgani taʼkidlandi.

Tadbirda soʻzga chiqqan Tibbiyot birlashmasi shifokori Jumaboy Yavqashev Prezident Farmon va Qarorlari asosida oʻtkazilayotgan sogʻlomlashtirish tadbirlarida aholi salomatligini yaxshilash, sogʻlom turmush tarzini keng tatbiq qilish, jismoniy faollik, sogʻlom ovqatlanish, zararli odatlardan voz kechishni kundalik hayot tarziga aylantirish orqali har bir fuqaroda kuchli immun tizimi paydo boʻlishini taʼminlash  koʻzda tutilganiga keng toʻxtaldi. Shuningdek, oʻsmirlar akusher-ginekologi Guliston Aqnazarova reproduktiv huquq, erta turmush qurishning salbiy oqibatlari xususida batafsil maʼlumot berdi. Tibbiyot birlashmasining teri-tanosil kasalliklari shifokori Neʼmatjon Artiqov  esa teri-tanosil kasalliklari, ularning yuqish yoʻllari haqida soʻz yuritdi. Shifokorlar Tamara Saidova hamda Matyoqub Ernazarovlar ham tadbir ishtirokchilariga sogʻlom ovqatlanish tartibi, shaxsiy gigiyena, koronavirusdan saqlanishda  karantin chora-tadbirlariga amal qilish tartiblari toʻgʻrisida tushunchalar berdilar.

Soʻngra bolalar jarrohi, sport targʻibotchisi Ibodulla Nurimbetov tomonidan badantarbiya, ommaviy jismoniy faollikning inson salomatligini saqlash va mustahkamlashdagi roli haqida maʼlumot berildi va nafas gimnastikasi, faol yurish mashqlari  bajarildi. Tadbir davomida  ishtirokchilariga koronavirusdan saqlanish, oʻsmir qizlar reproduktiv salomatligi, yoshlar oʻrtasida sogʻlom turmush tarzini targʻib qilish, sogʻlom ovqatlanish, zararli odatlardan saqlanish  kabilarga doir buklet va eslatmalar ham tarqatildi.

Tadbir ishtirokchilari yuqumli va yuqumsiz kasalliklar  profilaktikasi, gimnastika, faol va piyoda yurish, velosayr, kechki sayllarning inson salomatligini mustahkamlashdagi  ahamiyati  toʻgʻrisidagi keng tushunchalarga ega boʻldilar.

J Yavqashev, tuman Tibbiyot  birlashmasi ASTTQQ va JFO markaz boʻlimi  mudiri.