Amudaryo tumani hokimi va hokimlik xodimlari koronavirusga qarshi emlandi
Koronavirus pandemiyasi jahon miqyosida insonlar hayotiga, turmush tarziga oʻzining zararli taʼsirini koʻrsatishda davom etmoqda. COVID-19 virusi dunyodagi barcha davlatlarning har tomonlama iqtisodiy, ijtimoiy, siyosiy, madaniy jihatdan rivojlanishi uchun toʻsiq boʻlayotgan asosiy omillardan biri boʻlib qolmoqda.
Pandemiyaning zararli oqibarlarini, uning yuqish xavfini kamaytirish, tarqalishining oldini olish maqsadida butun dunyo mamlakatlarida boʻlgani kabi Oʻzbekistonda ham COVID-19 dan emlash jarayonlari oʻtkazilmoqda. Hozirda yurdoshlarimiz orasida koronavirusdan zararlanish holatlari tobora ortayotganligi sababli, vaktsinatsiya jarayonlari ham kuchaytirilmoqda. Tibbiyot sohasi masʼullari tomonidan aholi oʻrtasida emlashning inson salomatligi uchun afzalliklari haqida tushuntirish-targʻibot ishlari olib borilishi natijasida yurtdoshlarimiz orasida vaktsina olganlar soni tobora ortmoqda.
Joriy yilning 10-iyul sanasida Amudaryo tumani hokimligida koronavirusdan emlash jarayoni oʻtkazildi. Emlashda tuman hokimi Sultonboy Yoʻldashev, hokimlik masʼul xodimlari ishtirok etdilar. Tuman tibbiyot birlashmasi masʼul shifokorlari tomonidan dastlab jarayonda qatnashayotganlarning qon bosimlari hamda tana haroratlari oʻlchandi. Ularning meʼyoriy koʻrsatkichda ekanligiga ishonch hosil qilingach, vaktsina bilan emlash jarayoni oʻtkazildi.
Shu oʻrinda aytish kerakki, vaktsinaning inson salomatligini taʼminlashda qator afzalliklari mavjud. Vaktsinalar tananing tabiiy immuniteti bilan birgalikda kasallik yuqishi xavfini kamaytiradi. Vaktsina inson organizmiga yuborilgandan keyin immunitet tizimi tanaga kirgan mikrobni aniqlaydi va bu mikrobga karshi kurashish uchun antitanachalarni ishlab chiqaradi hamda kasallikka qarshi kurashishni taʼminlaydi. Vaktsina tanada kasallikka qarshi immunitetni ishlab chiqishga koʻmak beruvchi xavfsiz va samarali vosita sanaladi. Kasallik paydo boʻlganidan keyin uni davolashdan koʻra, emlash orqali kasalliklarning oldini olish maqsadga muvofiqdir.
Shuningdek, mutaxassislarning taʼkidlashicha, insonlar vaktsina bilan emlanganlaridan soʻng ham, sinovlarda qatnashmoqchi boʻlganlardan ham yoki sinovlar yakunlanib, ijobiy natija chiqqanlarda ham niqob taqib yurishlari talab qilinadi. Vaktsina bilan emlangan kishi organizmida immun tizim ishlashni boshlaydi, bu davrda boshqa kasalliklar yuqishini oldini olish maqsadida imkon qadar boshqa insonlar bilan muloqotda boʻlmaslik va uyda boʻlish talab etiladi. Agar ish jarayonida odamlar bilan muloqotda boʻlishda davom etilsa, boshqa karantin talablariga doim rioya qilish zarur. Qolaversa, sogʻlom turmush tarzini yaratish, sogʻlom va muqobil ovqatlanish, koʻp suyuqlik ichish va yengil jismoniy faollik olib borishni ham davom ettirish kerak.
Aytish kerakki, samarador vaktsinaning ommaviy qoʻllanilishi virus tarqalishini keskin kamaytirishi va oxir-oqibat uni yengishda asosiy omil boʻlishi mumkin.
Yurtdoshlarimizning yurtimizda joriy qilinayotgan karantin qoidalariga qatʼiy roiya qilishlari koronavirus pandemiyasining chekinishida muhim ahamiyat kasb etadi. Zero, inson salomatligi uchun, eng avvolo, uning oʻzi masʼuldir. Oʻzimiz va yaqinlarimiz salomatligi har birimizning qoʻlimizda ekanligini inobatga olib, karantin tartib-qoidalariga amal qilaylik va, albatta, emlash jarayonlarida ishtirok etaylik.
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
