1-yarim yillikda Amudaryo tumani Davlat soliq inspektsiyasi tomonidan davlat byudjeti daromadlariga 31 mlrd. soʻm mablagʻ undirildi

Mamlakatimizda iqtisodiyotni yanada rivojlantirish borasida keng koʻlamli islohotlar amalga oshirilayotgan boʻlib, bu borada samarali soliqqa tortish tizimi va davlat soliq xizmati organlarining faoliyati alohida ahamiyat kasb etadi.

Davlat soliq organlarining soliq toʻgʻrisidagi qonun hujjatlariga rioya etilishi, soliqlarning toʻgʻri hisoblab chiqarilishi, toʻliq va oʻz vaqtida toʻlanishi ustidan nazoratni taʼminlash, soliqlarning Oʻzbekiston Respublikasi Davlat byudjetiga va davlat maqsadli jamgʻarmalariga toʻliq hamda oʻz vaqtida tushishini, soliq toʻlovchilar va soliq solish obektlarining oʻz vaqtida hamda ishonchli hisobga olinishini taʼminlash kabi qator vazifalarni amalga oshirish borasida Amudaryo tumani Davlat soliq inspektsiyasi samarali faoliyat yuritib kelmoqda.

Shuningdek, tuman Davlat soliq inspektsiyasi soliq toʻlovchilar bilan ishlashni takomillashtirish, soliq toʻlovchilarning huquqiy madaniyatini oshirish boʻyicha qator chora-tadbirlarni amalga oshirib, soliq toʻlovchilarga soliq majburiyatlarini bajarishda har tomonlama koʻmaklashib kelmoqda.

Maʼlumot tariqasida aytish kerakki, joriy yilning 1-yarmida Amudaryo tumani Davlat soliq inspektsiyasi tomonidan davlat byudjeti daromadlariga 31 mlrd. soʻm mablagʻ undirilib, reja amalda 113,8 foizga bajarildi. Yaʼni, rejaga nisbatan 3,8 mlrd. soʻm koʻp mablagʻ undirildi.

Shuningdek, joriy yilning iyul oyi holatiga tumanda jami 1352 ta tadbirkorlik subʼektlari roʻyxatdan oʻtgan boʻlib, shundan kichik tadbirkorlik subʼektlari soni 1 ming 22 tani tashkil qiladi hamda hozirgi kunda samarali faoliyat koʻrsatib kelmoqda. Shundan iyun oyida 23 tasi yangidan roʻyxatdan oʻtib, oʻz faoliyatini boshlagan boʻlsa, 10 tasi faoliyatini qayta tiklagan korxona-tashkilotlar hisoblanadi. Yakka tartibda mehnat faoliyati bilan shugʻullanish maqsadida 1-iyul holatiga jami 1 ming 431 nafar yakka tartibdagi tadbirkorlar roʻyxatdan oʻtgan.

Tuman Davlat soliq inspektsiyasi jismoniy shaxslardan olinadigan mol-mulk soligʻini hisoblash hamda toʻlanishini taʼminlash borasida samarali ishlarni tashkil qilib, davlat byudjeti daromadlari oshishiga hissa qoʻshmoqda. Joriy yilning shu davriga qadar tumandagi jismoniy shaxslardan olingan mol-mulk va yer soliqlari boʻyicha jami 896,2 mln.soʻm davlat byudjetiga tushum undirilgan boʻlib, shundan yer soligʻi 721.7 mln soʻm, mol-mulk soligʻi esa 174.5 mln soʻmni tashkil qiladi.

Aytish kerakki, mamlakatimizda tadbirkorlik va ishbilarmonlikni yanada rivojlantirish maqsadida keng qamrovli islohotlar amalga oshirilayotgan boʻlib, tadbirkorlik subektlarining samarali faoliyat yuritishlari uchun koʻplab imkoniyatlar hamda shart-sharoitlar yaratilmoqda.

Tuman Davlat soliq inspektsiyasi bugungi kunda soliq idoralarining “Soliqchi – tadbirkorga koʻmakchi” tamoyili asosida tizimli ishlarni tashkil qilib, tumanimizdagi tadbirkorlarni qoʻllab-quvvatlab, ularga koʻmakchi sifatida faoliyat koʻrsatib kelmoqda. Masalan, Amudaryo tumanidagi “Ozodboy Amirxon” masʼuliyati cheklangan jamiyatiga ham ushbu tamoyil asosida amaliy yordamlar koʻrsatilib, soliq imtiyozlarini tushuntirish ishlari olib borilmoqda.

Tumandagi Oʻrta qalʼa ovulida joylashgan “Ozodboy Amirxon” masʼuliyati cheklangan jamiyati bugungi kunda eng ilgʻor tadbirkorlik subektlaridan biri hisoblanadi. Jamiyat joriy yilning fevral oyidan oʻz faoliyatini boshlagan. Shu maqsadda tadbirkor 120 mln. Soʻm imtiyozli kredit olib, ikki qavatli binoni bunyod qildi. “Ozodboy Amirxon” masʼuliyati cheklangan jamiyatiga qarashli mazkur zamonaviy va koʻrkam bino ishga tushishi bilan 5 nafar yurtdoshlarimizning bandligi taʼminlandi.

Binoda qator xizmat koʻrsatish turlari tashkil qilingan. Xususan, kitobsevar hamyurtlarimiz uchun kitob doʻkoni faoliyat yuritmoqda. Qolaversa, aholini tozalangan ichimlik suvi bilan taʼminlash shoxobchasi, oziq-ovqat va nooziq ovqat doʻkoni ham samarali ishlab turibdi. Aholiga bank xizmatlarini koʻrsatish uchun sharoit yaratish maqsadida “Agrobank” aktsiyadorlik jamiyati filiali ham mazkur binoda mini bankini ochgan va ayni kunlarda samarali faoliyat yuritmoqda.

Tuman Davlat soliq inspektsiyasi masʼullari “Soliqchi – tadbirkorga koʻmakchi” tamoyili asosida tumandagi barcha tadbirkorlik subʼektlariga soliqqa tortish, soliqlarni hisoblash va toʻlash boʻyicha amaliy yordamlar koʻrsatib kelmoqda.

Begzod Yoʻldashev, tuman DSI tadbirkorlikni qoʻllab-quvvatlash shoʻʼbasi bosh inspektori