Yangi qonun hujjatlari mazmun-mohiyatiga bagʻishlangan yigʻilish boʻlib oʻtdi

Joriy yilning 11-avgust sanasida Amudaryo tumani hokimligida Oʻzbekiston Respublikasi Oliy Majlisi Senatining oʻn yettinchi yalpi majlisida maʼqullangan qonunlar va koʻrib chiqilgan boshqa masalalar, iqtisodiy islohotlarning mazmuni, Oʻzbekiston Respublikasi davlat mustaqilligining 30 yilligi munosabati bilan “Yangi Oʻzbekistonda erkin va farovon yashaylik!” gʻoyasini aholiga yetkazish maqsadida yigʻilish oʻtkazildi.

Yigʻilishda Oʻzbekiston Respublikasi Oliy Majlisi Senati aʼzosi Botir Matmuratov, tuman hokimi Sultonboy Yoʻldashev, hokimlik masʼul xodimlari, sektorlar rahbarlari, Xalq deputatlari tuman Kengashi deputatlari, hokim oʻrinbosarlari, boʻlimlar boshliqlari, korxona-tashkilot rahbarlari, fuqarolar yigʻini raislari hamda ommaviy axborot vositalari vakillari ishtirok etdilar. Yigʻilini tuman hokimi Sultonboy Yoʻldashev ochdi hamda olib bordi.

Yigʻilishda Oʻzbekiston Respublikasi Oliy Majlisi Senati aʼzosi Botir Matmuratov soʻzga chiqib, Oliy Majlisi Senatining oʻn yettinchi yalpi majlisida maʼqullangan qonunlar va Senat vakolati doirasida koʻrib chiqilgan boshqa masalalar boʻyicha keng turda toʻxtalib oʻtdi.

Yigʻilish kun tartibidagi dastlabki masala - “Yer uchastkalarini ajratish va ulardan foydalanish, shuningdek yerlarni hisobga olish va davlat yer kadastrini yuritish tizimi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni loyihasi yuzasidan tuman Yer tuzish va koʻchmas mulk kadastr xizmati boshligʻi Shokir Davlatov maʼlumot berdi.

Mazkur qonun bilan tumanlar, shaharlar davlat hokimiyati organlarining egalik qilishga, foydalanishga va ijaraga yer berish, yer uchastkalarini savdo va xizmat koʻrsatish sohasi obʼektlari bilan birgalikda yuridik va jismoniy shaxslarga mulk etib realizatsiya qilish hamda yer uchastkalariga meros qilib qoldiriladigan umrbod egalik qilish huquqini kim oshdi savdosi asosida fuqarolarga realizatsiya qilish kabi vakolatlari bekor qilinadi.

Yigʻilishda tuman Sanitariya-epidemiologik osoyishtalik va jamoat salomatligi markazi bosh shifokori Gulmurod Bekiyev “Oʻzbekiston Respublikasining ayrim qonun hujjatlariga aholining sanitariya-epidemiologik osoyishtaligini taʼminlashga qaratilgan oʻzgartishlar va qoʻshimcha kiritish toʻgʻrisida”gi Oʻzbekiston Respublikasi Qonunining qabul qilinishi koronavirus infektsiyasining yangi toʻlqinlarining oldini olish uchun aholi oʻrtasida ommaviy vaktsinatsiyani tashkil etishning qonuniy asoslarini yanada mustahkamlashga hamda yuqumli kasalliklar tarqalishi xavfi mavjud boʻlgan taqdirda profilaktik emlash oʻtkazishni joriy etish yuzasidan amaldagi qonunchilikdagi mavjud ziddiyatlarni bartaraf etishga xizmat qilishini qayd etdi.

Shundan soʻng Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonuni qabul qilinganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish haqida”gi Qonuni toʻgʻrisida soʻz yuritildi. Tuman Adliya boʻlimi boshligʻi Moʻminjon Matyusupov mazkur Qonunning qabul qilinishi ishbilarmonlik muhitini faollashtirishda muhim oʻrin tutuvchi litsenziyalash, ruxsat berish va xabardor qilish tartib-taomillariga oid qonunlar samaradorligining oshishiga xizmat qilishini taʼkidladi.

Yigʻilishda “Intellektual mulk obʼektlarining huquqiy muhofazasi yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Qonuni haqida Qoraqalpogʻiston Respublikasi Intelektual mulk himoyasi markazi rahbari Nurali Yesnazarov axborot berdi. Qayd etilganidek, mazkur Qonun intellektual mulk obʼektlariga talabnoma topshiruvchilar talablarini toʻlaqonli inobatga olish, sohada jahon tajribasini muvaffaqiyatli amalga oshirish, soha boʻyicha xalqaro reytinglardagi oʻrinni mustahkamlash, mualliflik huquqi va turdosh huquqlar sohasidagi xalqaro hujjatlar talablarini bajarish maqsadida ishlab chiqilgan.

Shuningdek, mamlakatimizda aholi murojaatlari bilan ishlash boʻyicha yangi tizim yaratilayotganligi xususida Oʻzbekiston Respublikasi Prezidentining Amudaryo tumanidagi Xalq qabulxonasi mudiri Erkin Rajabovning fikr-mulohazalari, bu borada tumanimizda olib borilayotgan ishlar toʻgʻrisidagi axboroti tinglandi.

Yigʻilish kun tartibida shu kabi qator masalalar xususida soʻz yuritib, masʼullarning axborotlari, fikr-mulohazalari tinglanib, har bir masala boʻyicha tegishli topshiriq hamda tavsiyalar berildi.

Tuman hokimligining Axborot xizmati.