Tadbirkorlik subʼektlariga qabul qilinayotgan qonuniy hujjatlar mazmun-mohiyati tushuntirilmoqda

Maʼlumki, mamlakatimizda oziq-ovqat xavfsizligini taʼminlash, shuningdek, parrandachilikni rivojlantirish va tarmoq ozuqa bazasini yanada mustahkamlash hamda parrandachilik yoʻnalishidagi tadbirkorlik subʼektlarini qoʻllab-quvvatlash maqsadida joriy yilning 14-iyun sanasida Oʻzbekiston Respublikasi Prezidentining “Parrandachilikni rivojlantirish va tarmoq ozuqa bazasini mustahkamlashga qaratilgan qoʻshimcha chora-tadbirlar toʻgʻrisida”gi Qarori qabul qilindi.  Mazkur qaror mamlakatimizda parrandachilikni yanyada rivojlantirishda muhim dasturulamal boʻlmoqda.

Joriy yilning 10-avgust kuni Amudaryo tumani Davlat soliq inspektsiyasi xodimlari tomonidan tumanimizdagi tadbirkorlarga mazkur qarorning mazmun-mohiyati, unda belgilangan vazifalar, tadbirkorlik subʼektlariga koʻrsatilgan imtiyozlar xususida tushuntirish-targʻibot ishlari olib borildi.

Masʼullar tumanimizda faoliyat yuritib kelayotgan “Oʻrta qalʼa chorvadori” agrofirmasining parrandachilik faoliyati bilan tanishdilar. Agrofirma tadbirkor Gʻulomjon Rasulov tomonidan tashkil qilingan boʻlib, unda Beshtom mahallasi hududida har oyda oʻrtacha 40 ming dona naslli parranda yetishtirib kelinmoqda. Agrofirma parranda goʻshti mahsulotlari yetishtirilib tumanimiz aholisini arzon va sifatli goʻsht mahsulotlari bilan taʼminlab kelmoqda. 

Aytish kerakki, Oʻzbekiston Respublikasi Prezidentining “Parrandachilikni rivojlantirish va tarmoq ozuqa bazasini mustahkamlashga qaratilgan qoʻshimcha chora-tadbirlar toʻgʻrisida”gi qarori bilan 2021-yil 1-iyundan boshlab qoʻshilgan qiymat soligʻi toʻlovchisi boʻlgan parrandachilik xoʻjaliklariga — oʻz xoʻjaliklarida yetishtirilib, realizatsiya qilingan tuxumning har bir donasi uchun 50 soʻm hamda parranda goʻshtining har bir kilogrammi uchun 1 000 soʻm miqdorida respublika byudjetidan subsidiya ajratilishi belgilandi.

Shuningdek, mazkur hujjatda 2021-yil 1-iyuldan boshlab 2024-yil 1-iyulga qadar asosiy faoliyat turi parrandachilik boʻlgan tadbirkorlik subʼektlari uchun ularning asosiy faoliyat turi boʻyicha tijorat banklarida joylashtirilgan mablagʻlardan olingan foizlardan tashqari foyda soligʻi, mol-mulk soligʻi, yer soligʻi va suv resurslaridan foydalanganlik uchun soliq stavkasi 50 foiz miqdorida qoʻllanilishi belgilandi.

Qolaversa, endilikda 2022-yil 1-iyulga qadar tuxum, parranda goʻshti va mahsulotlarini eksport qiluvchi hamda soya donini import qiluvchi tadbirkorlik subʼektlariga avtomobil, temir yoʻl va havo transportida tashish xarajatlarini 50 foizigacha miqdorda kompensatsiya qilishga subsidiyalar taqdim etiladi.

Amudaryo tumani Davlat soliq inspektsiyasi xodimlari chorvachilik va parrandachilik bilan shugʻullanuvchi tadbirkorlarga mazkur qarorning mazmun-mohiyati, u bilan berilgan imtiyozlar keng tushuntirilib, tadbirkorlarga amaliy yordamlar koʻrsatilmoqda.

Tuman hokimligining Axborot xizmati.