Xalq deputatlari Amudaryo tuman Kengashining 37-sessiyasi toʻgʻrisida axborot
Joriy yilning 10-sentyabr kuni Xalq deputatlari Amudaryo tuman Kengashining 37-sessiyasi boʻlib oʻtdi. Sessiya majlisida deputatlar, Oʻzbekiston Respublikasi Prezidenti saylovini oʻtkazuvchi 1-Qoraqalpogʻiston okrug saylov komissiyasi raisi Ulugbek Jalmenov hamda komissiya aʼzosi Aysultan Qurbanova, hokimlik masʼullari, huquq-tartibot organlari va boʻlimlar rahbarlari, fuqarolar yigʻinlari raislari va ommaviy axborot vositalari vakillari ishtirok etdilar.
Sessiya kun tartibida “Oʻzbekiston Respublikasi Prezidenti saylovini oʻtkazuvchi uchastka saylov komissiyalari aʼzoligiga nomzodlar tavsiya qilish toʻgʻrisida”gi hamda Kengash vakolatiga doir boshqa qator masalalar muhokama qilindi.
Ayni kunlarda mamlakatimizda Oʻzbekiston Respublikasi Prezidenti sayloviga tayyorgarlik ishlari qizgʻin pallaga kirgan. Amudaryo tumanida ham Oʻzbekiston Respublikasi Prezidenti sayloviga tayyorgarlik jarayonlari Saylov kodeksi hamda saylov qonunchiligi talablariga muvofiq amalga oshirilmoqda. Tuman hududida Oʻzbekiston Respublikasi Prezidenti saylovini oʻtkazuvchi 64 ta saylov uchastkalarini tuzish boʻyicha taqdimnoma berilgan boʻlib, 1-Qoraqalpogʻiston okrug saylov komissiyasi tomonidan shu yilning 24-avgustida saylov uchastkalarini tuzish toʻgʻrisidagi qarori qabul qilindi.
Sessiya kun tartibidagi masala yuzasidan Xalq deputatlari tuman Kengashining Qonuniylikni taʼminlash va korruptsiyaga qarshi kurashish masalalari boʻyicha doimiy komissiyasi raisi Muzaffar Yeshchanovning axboroti tinglandi.
Axborotda taʼkidlanganidek, Oʻzbekiston Respublikasi Saylov kodeksining 23-moddasida uchastka saylov komissiyasi aʼzoligiga nomzodlar fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlar tomonidan taklif etilib, bu nomzodlar xalq deputatlari tuman Kengashlarining majlislarida muhokama qilinishi hamda tegishli okrug saylov komissiyasiga tasdiqlash uchun tavsiya etilishi belgilangan.
Amaldagi qonunchilikka muvofiq saylov kampaniyasi eʼlon qilinganidan keyin fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlar oʻz tashabbusiga koʻra yoki Xalq deputatlari tuman, shahar Kengashlarining takliflariga asosan uchastka saylov komissiyasi aʼzoligiga nomzodlar zahirasini shakllantiradi.
Tumandagi 64 ta uchastka saylov komissiyasi aʼzolariga nomzodlar shakllantirilib, ular tarkibi Xalq deputatlari tuman Kengashining Qonuniylikni taʼminlash va korruptsiyaga qarshi kurashish boʻyicha doimiy komissiyasi tomonidan oʻrganilib chiqilgan.
Qayd etilishicha, uchastka saylov komissiyalari tarkibini shakllantirishda komissiya aʼzolari 21 yoshga toʻlganligi, oʻrta yoki oliy maʼlumotga egaligi, ilgari saylovlarda qatnashib, tajriba orttirgani, aholi oʻrtasidagi obroʻ-eʼtiborga egaligiga hamda komissiya tarkibining yarmidan koʻpi xotin-qizlardan iborat boʻlishiga, komissiya aʼzolarining yarmidan koʻpi bitta tashkilotdan boʻlmasligiga eʼtibor qaratilgan.
Oʻzbekiston Respublikasi Markaziy saylov komissiyasining “Saylov komissiyasi aʼzolarining malakasini oshirishni tashkil etish haqida”gi qaroriga muvofiq uchastka saylov komissiyalari raisi, oʻrinbosari va kotibligiga nomzodlar uchun 3 bosqichdan iborat seminar-trening mashgʻulotlari oʻtkazilgan.
Sessiya majlisida Oʻzbekiston Respublikasi Prezidenti saylovini oʻtkazuvchi 1-Qoraqalpogʻiston okrug saylov komissiyasi raisi Ulugbek Jalmenov hamda komissiya aʼzosi Aysultan Qurbanova joriy yilda oʻtkaziladigan davlatimiz va xalqimiz hayotida muhim siyosiy voqea – Oʻzbekiston Respublikasi Prezidenti saylovi barcha darajadagi saylov komissiyalarining zimmasiga ulkan masʼuliyat yuklashini alohida taʼkidladi. Mamlakatimizda saylov tizimini isloh qilish va yanada demokratlashtirish, uning huquqiy asoslarini mustahkamlash, milliy qonunchiligimizni saylov huquqiga oid xalqaro standartlarga uygʻunlashtirishga alohida eʼtibor qaratilayotgani qayd etib oʻtildi.
Sessiya kun tartibidagi shu va boshqa masalalar boʻyicha deputatlar oʻz fikr – mulohazalarini bildirdilar. Xalq deputatlari tuman Kengashining 37-sessiyasi kun tartibiga kiritilgan masalalar toʻliq koʻrib chiqilib, muhokama qilindi. Bildirilgan fikr-mulohazalar hamda takliflarni inobatga olgan holda tegishli qarorlar qabul qilindi.
Tuman hokimligining Axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
