LOYIHA DOIRASIDA UChRAShUV TAShKIL ETILDI

Tumanimizda faoliyat yuritayotgan “Jayxun ilhomlari” nodavlat notijorat tashkiloti tomonidan “Yoshlar – yangi Oʻzbekiston bunyodkorlari” loyihasi doirasida joylarda uchrashuvlar, tadbirlar oʻtkazilmoqda. Bu uchrashuvlarning samarali va mazmunli, keng qamrovli boʻlishi uchun turli soha vakillarini ham loyiha rejalarini amalga oshirish ishlariga jalb qilish koʻzda tutilgan. Shu maqsadda bu masaladagi targʻibot ishlarini olib borish uchun ishchi guruhga jurnalistlar, tibbiyot, maorif xodimlari, Mahalla va  oilani qoʻllab-quvvatlash boʻlimi mutaxassislari ham taklif etildi.

“Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni” mavzusidagi navbatdagi uchrashuv mahalla faollari, imomlar, maʼnaviyat targʻibotchilari, keng jamoatchilik vakillari, 13-sonli maktab oʻqituvchilari, faol oʻquvchi yoshlari ishtirokida “Bogʻ” mahallasida oʻtkazildi.

Uchrashuvda Xalq taʼlimi boʻlimi maʼnaviy-axloqiy bolalarning himoya shoʻʼbasi mudiri Zafar Abdullayev yoshlarni zararli illatlar va turli axloqsizliklardan himoya qilishda maktabning oʻrni, oʻqituvchilar oldida turgan maʼsul vazifalarga toʻxtalib oʻtdi. Zamonaviy maktablarda bilim olayotgan oʻquvchilar yaratilib qoʻyilgan imkoniyatlardan unumli foydalanib, kuch-gʻayratlarini faqat chuqur bilim olishga qaratishi lozimligini alohida taʼkidladi.

“Jayxun ilhomlari” nodavlat notijorat tashkilotining raisi Oʻrozali Reyimov tashkilotning asosiy  vazifasi va maqsadi xalqimiz maʼnaviyatini yuksaltirish, yosh avlodni Vatanga muhabbat, milliy va umuminsoniy qadriyatlar ruhida kamol toptirishda badiiy adabiyotning oʻrni, taʼsiri va ahamiyatini yanada oshirish, adabiyot, musiqa, badiiy va amaliy sanʼat ravnaqiga hissa qoʻshish hamda havaskor shoirlar va havaskor yozuvchilar, ijodkorlar, sanʼatkorlar, badiiy va amaliy sanʼat ustalarini qoʻllab-quvvatlash, ularning ijodiy salohiyatlarini roʻyobga chiqarish orqali jamiyatda ijtimoiy-maʼnaviy muhitni yanada yaxshilashga hissa qoʻshishdan iborat ekanligi haqida gapirib oʻtdi.

Shuningdek, tashkilotning grant loyihasi asosida olib boriladigan ishlar, jumladan, joylarda 42 marotaba maʼnaviyat taʼlim-tarbiya, salomat turmush tarzini yaxshilashga bagʻishlangan uchrashuv va suhbatlar oʻtkazish, turli mavzularda insholar tanlovlarini tashkil qilish va gʻoliblarni moddiy-maʼnaviy jihatdan ragʻbatlantirib borish rejalari bilan uchrashuv qatnashchilarini tanishtirib oʻtdi.

Uchrashuvda tuman Tibbiyot birlashmasi salomatlik markazi shifokori Matyoqub Ernazarov salomat turmush tarzini shakllantirish borasidagi oʻz fikr-mulohazalarini bildirib oʻtdi. Mutaxassisning mulohazalariga koʻra inson hayotda bekam-u koʻst yashay olishi uchun avvalo unga salomatlik kerak. Salomatlik esa oʻz qoʻlimizda. Shaxsiy gigiyenaga amal qilish, turli kasalliklardan har kim oʻzini himoya qila bilishi, yomon illatlardan tiyilishi, ozodalikka har qadamda eʼtibor berish borasida shifokor yigʻilganlarga qimmatli maslahatlarini berib oʻtdi.

Tuman Mahalla va oilani qoʻllab-quvvatlash boʻlimi yetakchi mutaxassisi Rahmon Bobojonov oldida turgan dolzarb vazifalarni bajarishda mahallaning, ayniqsa, hayot maktabini oʻtagan yoshi ulugʻ insonlarning roli juda katta ekanligi xususida soʻzladi. Buning uchun joylarda oqsoqollar kengashi bilan jipslikda ish olib borish kerakligini taʼkidlab, kamchiliklarni bartaraf etishda tajribali insonlar oʻgitlariga tayanib ish koʻrishga chaqirdi.

“Bogʻ” mahallasi fuqarolar yigʻini raisasi Maqsuda Rahimova yoshlar tarbiyasi, ularning maʼnaviyatini yuqori darajaga koʻtarish, turli illat va axloqsizliklardan saqlash borasida hududda olib borilayotgan ishlar xususida uchrashuv ishtirokchilarni tanishtirib oʻtdi. U bu boradagi ishlarni yanada samaraliroq amalga oshirish uchun olib borilishi zarur boʻlgan vazifalarga alohida toʻxtaldi.

Mazkur uchrashuvda umumtaʼlim maktablariga yangidan biriktirilgan ijodiy-madaniy masalalar boʻyicha targʻibotchilar ham ishtirok etishdi. Ularning vazifasi maktablarda faqat badiiy toʻgaraklarni rivojlantirish emas, balki keng omma orasida ham maʼnaviy-marifiy, tarbiyaviy ishlarni olib borishga qaratilishi lozimligi taʼkidlandi.

Uchrashuv ochiq muloqot, savol-javoblar tarzida mazmunli oʻtdi. Shunday uchrashuvlarni kelgusi davrlarda barcha hududlarda oʻtkazib borishga kelishib olindi.

Oʻrozali Reyimov.