Oʻzbekiston Respublikasi Oliy Majlis Qonunchilik palatasi deputatlari ishtirokida yigʻilish boʻlib oʻtdi

Joriy yilning 20-sentyabr kuni Amudaryo tuman hokimligining majlislar zalida Oʻzbekiston Respublikasi Oliy Majlis Qonunchilik palatasi deputatlari ishtirokida yigʻilish boʻlib oʻtdi.

Yigʻilishda Oʻzbekiston Respublikasi Oliy Majlis Qonunchilik palatasi Spikeri oʻrinbosari, "Adolat" sotsial demokrtik partiyasi fraktsiyasi rahbari, deputat Zuhra Ibragimova, Sogʻliqni saqlash masalalari qoʻmitasi deputatlari Mavluda Adhamjonova, Nuriya Aytjanovalar, shuningdek, tumandan saylangan Qoraqalpogʻiston Respublikasi Joʻqorgʻi Kengesi deputatlari, Xalq deputatlari tumani kengashi deputatlari, hokim oʻrinbosarlari, korxona va tashkilotlar rahbarlari, siyosiy partiya rahbarlari, mahalla fuqarolar yigʻinlari raislari, imom-xatiblar, shifokorlar va ommaviy axborot vositalari vakillari ishtirok etdilar. Yigʻilishni tuman hokimining 1-oʻrinbosari Maʼmur Temirboyev olib bordi.

Yigʻilishda Oʻzbekiston Respublikasi “Inson aʼzolari va toʻqimalarining transplatatsiyasi toʻgʻrisida”gi qonuni loyihasining mazmun-mohiyati hamda sohada olib borilayotgan islohotlarning aniq maqsadlari xususida soʻz yuritildi.

Majlisda Oʻzbekiston Respublikasi Oliy Majlis Qonunchilik palatasi Spikeri oʻrinbosari, "Adolat" sotsial demokrtik partiyasi fraktsiyasi rahbari, deputat Zuhra Ibragimova soʻzga chiqib, 2021-yil 16-sentyabr kuni Respublika ixtisoslashtirilgan xirurgiya ilimiy-amaliy tibbiyot markazining mutaxassislari va Xalmuratov nomidagi respublika koʻp tarmoqli tibbiyot markazi mutahassislari ishtirokida Qoraqalpogʻiston Respublikasi tibbiyoti tarixida birinchi marotaba buyrak koʻchirib oʻtkazish operatsiyasi muvofaqqiyatli amalga oshirilganligi taʼkidlab oʻtdi. Ushbu murakkab jarrohlik amaliyotida Amudaryo tumani Kuyuk koʻpir ovulida yashovchi 23 yoshli Oʻktam Tursunbayevga akasi Davron Mamirovning bir buyragi muvaffaqiyatli koʻchirib oʻtkazilgan boʻlib, hozirda har ikkalasi yurtdoshimizning ham ahvoli yaxshi. Deputat oʻz soʻzida “Inson aʼzolari va toʻqimalarining transplatatsiyasi toʻgʻrisida”gi qonun loyihasi 25 ta moddadan iborat boʻlib, ularda nazarda tutilgan asosiy tamoyillar, belgilangan vazifalar haqida soʻz yuritdi.

Aytish kerakki, bugungi kunda mamlakatimizdagi koʻplab davolash muassasalarida inson aʼzolari va toʻqimalari bilan bogʻliq nozik va murakkab jarrohlik amaliyotlari muvaffaqiyatli bajarilmoqda. Bunda sohaning moddiy-texnik bazasi va tibbiy kadrlar salohiyati davr bilan mutanosib ravishda takomillashtirib borilayotgani muhim ahamiyat kasb etmoqda.

Oʻzbekiston Respublikasi Oliy Majlisi Qonunchilik palatasi Sogʻliqni saqlash masalalari qoʻmitasi deputatlarining taʼkidlashicha, Oʻzbekiston Respublikasi “Inson aʼzolari va toʻqimalarining transplatatsiyasi toʻgʻrisida”gi qonuni loyihasiga koʻra inson aʼzolari, toʻqimalari va hujayralarining olinishi, tayyorlanishi, saqlanishi, yuborilishi va transplantatsiyasi faqat sogʻliqni saqlash vazirligining tegishli ruxsatnomasiga ega davlat sogʻliqni saqlash muassasalari tomonidan amalga oshirilishi belgilangan.

Shuningdek, mazkur hujjat bilan tana aʼzolari, toʻqima va hujayralari boshqalar uchun xavfli kasalliklar roʻyxatiga kiritilgan xastalikka chalingan donorga tegishli aʼzolarning koʻchirilishi taqiqlanishi kabi tana aʼzolari koʻchirilishi bilan bogʻliq boshqa koʻplab holatlarning ham tartibga solinishi xususida maʼlumotlar keltirdilar.

Yigʻilishda kun tartibidagi masala yuzasidan yigʻilganlarning savollariga javoblar berildi hamda takliflar, fikr-mulohazalar tinglandi.

Tuman Tibbiyot birlashmasi boshligʻi Fahriddin Abdullayev hamda qator tajribali shifokorlar mamlakatimiz tibbiyot sohasi rivojini yangi bosqichga koʻtarishda muhim ahamiyat kasb etishi kutilayotgan mazkur qonun loyihasi yuzasidan oʻzlarining takliflarini hamda fikrlarini bildirdilar. 

 Tuman hokimligining Axborot xizmati.