Prezidentlikka Oʻzbekiston «Milliy tiklanish» DPdan nomzod Alisher Qodirovning ishonchli vakili ishtirokida targʻibot tadbiri boʻlib oʻtdi

Maʼlumki, mamlakatimizda joriy yilning 24-oktyabr kuni katta tarixiy, siyosiy jarayon – Oʻzbekiston Respublikasi Prezidenti saylovi oʻtkaziladi. Shu munosabat bilan ayni kunlarda joylarda Oʻzbekiston Respublikasi Prezidentligiga nomzodlarning saylovoldi targʻibot-tashviqot tadbirlari oʻtkazilmoqda.

24-sentyabr kuni Amudaryo tumanida ana shunday targʻibot tadbirlaridan biri boʻlib oʻtdi. Tuman Mahalla va oilani qoʻllab-quvvatlash boʻlimida oʻtkazilgan saylovoldi targʻibot tadbirida Oʻzbekiston Respublikasi Prezidentligiga Oʻzbekiston «Milliy tiklanish» demokratik partiyasidan nomzod Alisher Qodirovning Qoraqalpogʻistondagi ishonchli vakili, partiyaning Qoraqalpogʻiston Respublikasi Kengashi raisi, Joʻqorgʻi Kenges deputati Tajibay Romanov saylovchilar bilan uchrashdi.

Targʻibot-tashviqot tadbirida Oʻzbekiston «Milliy tiklanish» demokratik partiyasi Amudaryo tuman kengashi masʼullari, partiya faollari, partiyadan Xalq deputatlari tuman kengashiga saylangan deputatlar, umumtaʼlim maktablarining ijodiy-madaniy masalalar boʻyicha targʻibotchilari, ovul va mahalla fuqarolar yigʻinlari masʼullari, ommaviy axborot vositalari vakillari ishtirok etdilar.

Uchrashuvda ishonchli vakil Tajibay Romanov yigʻilganlarni Oʻzbekiston Respublikasi Prezidentligiga Oʻzbekiston «Milliy tiklanish» demokratik partiyasidan nomzod Alisher Qodirovning tarjimoiy holi hamda saylovoldi dasturi bilan tanishtirdi.

Qayd etilishicha, nomzodning saylovoldi dasturida taʼlim-tarbiya sohasida, davlat boshqaruvi tizimida, mamlakat iqtisodiyotini rivojlantirish boʻyicha, ijtimoiy adolat, qadriyatlarga hurmat va fuqaro erkinliklarini taʼminlash, tashqi siyosat sohalarida qator yangi oʻzgarishlar amalga oshirilishi belgilangan.

Xususan, taʼlim-tarbiya sohasida “Yangi avlod” dasturi qabul qilinib, unga koʻra, bola tugʻilganidan maktabni tugallagunigacha boʻlgan davrni oʻz ichiga olgan tarbiya va taʼlim dasturi ishlab chiqilishi uchun yagona «Oila–bogʻcha–maktab» tizimi yaratiladi.

Shuningdek, dasturda «Taʼlim inspektsiyasi» Oliy Majlis huzurida qayta tashkil qilinishi, pedagoglar tayyorlash tizimi tubdan isloh qilinishi, tarbiyaning ajralmas qismi sifatida Milliy kinoindustriya  isloh qilinish belgilanganligi taʼkidlandi. 

Keltirilishicha, saylovoldi dasturida davlat boshqaruvi tizimida mahalliy kengashlarning vakolatlari va faoliyati qayta koʻrib chiqilishi, sud-huquq tizimida tub islohotlar amalga oshirilishi koʻrsatilgan.

Qolaversa, dasturda mamlakat iqtisodiyotini rivojlantirish boʻyicha davlat ishtirokini tugatish boʻyicha 5 yillik davlat innovatsion dasturi qabul qilinishi, ish beruvchilar uchun xodimlarni majburiy sugʻurtalash majburiy etib belgilanishi, kam taʼminlangan aholini qoʻllab-quvvatlashning qadriyatlarga tayangan yangi tizimi joriy etilishi borasida ustuvor tamoyillar belgilangan.

Shu bilan birga, partiya saylovoldi dasturida ijtimoiy adolat, qadriyatlarga hurmat va fuqaro erkinliklarini taʼminlash sohasida milliy urf-odat, anʼanalar, shakllangan qadriyatlarga hurmatsizlik uchun javobgarlik joriy qilinishi, oʻzbek tili keng qoʻllaniladigan, zamonaviy taraqqiyotga uygʻun tilga aylanishi uchun huquqiy asoslar kuchaytirilishi, soʻz erkinligi va jamiyatni demokratlashtirish davom ettirilishi, Xalq qabulxonalari bepul yuridik maslahat markazlariga aylantirilishi, aliment fondi tashkil etilishi kabi ustuvor vazifalarni amalga oshirish koʻrsatilgan.

Targʻibot tadbirida Oʻzbekiston Respublikasi Prezidentligiga Oʻzbekiston «Milliy tiklanish» demokratik partiyasidan nomzod Alisher Qodirovning ishonchli vakili Tajibay Romanov yigʻilganlar tomonidan berilgan savollarga javob berdi.

Fotima Eshimbetova, OʻzMTDP Amudaryo tumani Kengashi ijrochi kotibi.