XALQ SALOMATLIGI YOʻLIDA

Mana, salkam ikki yildirki, nafaqat mamlakatimiz, balki butun dunyo xalqlari SOVID-19 infektsiyasiga qarshi ayovsiz kurash olib borishmoqda. Bu borada qabul qilingan Prezident Farmonlari, hukumat Qarorlari ijrosini taʼminlash maqsadida tuman SEO va JS boʻlimi mutaxassislari tomonidan 2021-yil uchun tegishli chora-tadbirlar rejasi belgilab olinib, shu asosda profilaktik ishlar amalga oshirilmoqda.

Xususan, boshqariladigan  infektsiyalarga  qarshi profilaktik emlash ishlarining sifatli oʻtkazilishini taʼminlash  bilan aholi oʻrtasida oʻta xavfli va karantin kasalliklarning kelib chiqishi va tarqalishining oldini olish boʻyicha fuqarolardan tahlil olinib, virusologiya laboratoriyasiga topshirildi. Kasallikka chalingan fuqarolar Nukus shahar yuqumli kasalliklar shifoxonasiga yotqizilib, kasallanganlar bilan muloqotda boʻlgan oila aʼzolari uy sharoitida tibbiy kuzatuvga olindi va kasallik aniqlangan oʻchoqlar va ularning  xududlarida profilaktik dezinfektsiya ishlari olib borildi.

Joriy yilda 831 ta obʼekt sanitariya nazorat roʻyxatiga olindi va  2021-yilning 10 oyi davomida obʼektlarda laboratoriya-instrumental usulida namunalar olinib, sanitariya-profilaktik tadbirlari oʻtkazildi. Tadbir davomida aniqlangan kamchiliklarni bartaraf qilish maqsadida joriy yilning 1-noyabr holatiga 96 nafar shaxsga nisbatan  maʼmuriy ish qoʻzgʻatilib, 6 ta obʼekt sanitariya qoida va meʼyorlari talablariga javob bermaganligi uchun ish faoliyati vaqtincha toʻxtatildi. Tibbiy koʻrikdan oʻtmagan va koronavirus infektsiyasiga qarshi emlanmagan 8 nafar kishi vaqtincha ishdan chetlatildi.

Respublika Muvofiqlashtirish Kengashi tomonidan xoʻjalik yurituvchi subʼektlarda oʻtkaziladigan tekshirishlarning reja-jadvaliga asosan 27 xoʻjalik yurituvchi subʼektlarda nazorat oʻtkazilib, aniqlangan sanitariya qonunbuzilishlari boʻyicha 26 nafar shaxsga nisbatan  toʻplangan maʼmuriy materiallarni  koʻrib  chiqish uchun  Jinoyat ishlari boʻyicha tuman sudiga oʻtkazildi  va aniqlangan qonunbuzilishlar boʻyicha  maʼmuriy choralar qoʻllanildi.

Sanitariya-epidemiologik  osoyishtalik va jamoat salomatligi boʻlimining sanitariya-gigiyena, epidemiologiya, parazitologiya, dezinfektsiya hamda laboratoriya boʻlimlari mutaxassislaridan    iborat  tuzilgan ishchi guruhlar  tomonidan koronavirus infektsiyasi, oʻtkir respirator kasalliklar, botulizm va boshqa turdagi yuqumli kasalliklar profilaktikasi boʻyicha keng aholi ishtirokida uchrashuvlar, korxona-tashkilotlarda davra suhbatlari oʻtkazildi.

Albatta, amalga oshirilayotgan barcha profilaktik targʻibot tadbirlari xalqimizning sogʻligini muhofaza etish, ularni turli xavfli infektsiyalardan samarali himoya qilishga qaratilgan.

Xalq salomatligi, xotirjamligi yoʻlida fidoyilik bilan mehnat qilayotgan fidoyi hamkasblarimizni kasb bayrami bilan chin dildan tabriklayman hamda el-yurt salomatligi yoʻlidagi sharafli ishlarida muvaffaqiyat, sogʻlik tilayman.

G.BEKIYeV, tuman SEO va JS boʻlimi boshligʻi.