Amudaryo tumani Moliya boʻlimi byudjet mablagʻlaridan maqsadli hamda oqilona foydalanish ustidan davlat moliyaviy nazoratini samarali amalga oshirmoqda
Oʻzbekiston Respublikasi Prezidentining “Moliya organlari faoliyatini yanada takomillashtirish chora-tadbirlari toʻgʻrisida”gi qarorida moliya organlarining vazifalari, huquq va majburiyatlari aniq belgilab berilgan. Xususan, moliya organlari avvalo, aholiga soliq yukini kamaytirish, byudjet mablagʻlaridan maqsadli hamda oqilona foydalanish ustidan davlat moliyaviy nazoratini amalga oshirish, qatʼiy iqtisod qilish, soliqlar va boshqa majburiy toʻlovlarni hisoblash va toʻlash tartibini soddalashtirish kabi masalalarda nazoratni amalga oshiradi.
Amudaryo tumani Moliya boʻlimi ham zimmasiga yuklatilgan shu va boshqa vazifalarni samarali amalga oshirib kelmoqda.
Xabaringiz bor, Xalq deputatlari Amudaryo tuman Kengashining 44-sessiyasida Amudaryo tumani moliya boʻlimi tomonidan 2021-yilda amalga oshirilgan ishlar va 2022-yilga moʻljallangan mahalliy byudjet parametrlari toʻgʻrisidagi masala deputatlar tomonidan muhokama qilinib, tegishli qaror qabul qilingan edi.
Sessiyada tuman Moliya boʻlimi mudiri Ulugʻbek Bekniyazov yil davomida boʻlim tomonidan amalga oshirilgan ishlar xususida axborot berib, Amudaryo tumanining 2022-yilgi mahalliy byudjeti haqidagi takliflarni deputatlar eʼtiboriga havola qildi.
Aytish kerakki, 2022-yil uchun tuman mahalliy byudjet daromadlari 77,3 mlrd soʻm, yuqori byudjetdan ajratiladigan transfert miqdori 127,6 mlrd soʻmni tashkil qiladi. Jami xarajatlar 204 mlrd soʻm miqdorida prognoz qilinmoqda.
2022-yilda tumanimizda mahalliy byudjet mablagʻlari hisobidan maktabgacha taʼlim sohasi uchun oziq-ovqat va boshqa xarajatlarga 12,2 mlrd soʻm, sogʻliqni saqlash sohasiga 66,5 mlrd soʻm, madaniyat va sport sohasiga 4,8 mlrd soʻm, ijtimoiy nafaqa va kam taʼminlangan oilalarga moddiy yordam va kompensatsiya toʻlovlari uchun 71,2 mlrd soʻm ajratiladi.
Bundan tashqari, 2022-yilda iqtisodiy xarajatlarga tuman byudjetidan 14,5 mlrd soʻm mablagʻ ajratilishi rejalashtirilgan. Obodonlashtirish ishlariga 8,3 mlrd soʻm, Veterenariya qoʻmitasi tashkilotlarini saqlash xarajatlarini qoplash uchun 1,2 mlrd soʻm, tuman fermer dehqon xoʻjaliklari va tomorqa yer egalari kengashi xarajatlariga 0,9 mlrd soʻm ajratilishi belgilangan.
Qarorda koʻrsatilishicha, 2022-yil davomida davlat boshqaruv organlari faoliyatiga 5,3 mlrd soʻm, fuqarolarning oʻzini oʻzi boshqarish organlariga esa 7,1 mlrd soʻm miqdorida mablagʻ ajratiladi.
Joriy yildan boshlab mahallalarda hokim yordamchilarining faoliyati yoʻlga qoʻyilishi kutilmoqda. Yil davomida hokim yordamchilarining tavsiyalari asosida mahallalarning infratuzilmasini yaxshilash maqsadida 1,4 mlrd soʻm mablagʻ ajratiladi. Zaxira jamgʻarmasi mablagʻlari esa 1,9 mlrd soʻmni tashkil etadi.
Prezidentimizning “Byudjet jarayonida fuqarolarning faol ishtirokini taʼminlash boʻyicha qoʻshimcha chora-tadbirlar toʻgʻrisida”gi qaroriga asosan Amudaryo tumanida ham byudjet mablagʻlarining maʼlum qismi jamoatchilik fikri asosida belgilangan tadbirlarni moliyalashtirishga yoʻnaltiriladi.
Qarorda byudjet mablagʻlarini taqsimlashda eng avvalo ijtimoiy sohaga katta eʼtibor berilganini koʻrish mumkin. Bu esa aholi turmush farovonligini yanada yaxshilash borasidagi ishlar “Inson qadrini ulugʻlash va faol mahalla yili” deb eʼlon qilingan joriy yilda har qachongidan ham keng koʻlam kasb etishidan dalolat beradi.
F.Eshimbetova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
