SUDLAR RAISLARI “SAYYoR QABUL” OʻTKAZDI

Mamlakatimizda demokratik va erkin fuqarolik jamiyati barpo etish, fuqarolarning huquq va erkinliklarini ishonchli himoya qilish kafolatlarini kengaytirish, odil sudlovga erishish, sud ishi yurituvi sifatini yanada yaxshilashga qaratilayotgan eʼtibor yuksak samaralar bermoqda.

Maʼlumki, Oʻzbekiston Respublikasi Prezidenti Shavkat Mirziyoyev tomonidan sud organlari faoliyatiga bagʻishlab oʻtkazilgan yigʻilishda, huquq va erkinliklari buzilgan fuqarolarni sud orqali ishonchli himoya qilish, chekka hududlarda yashovchi fuqarolarning murojaatlarini sayyor qabul tarzida tinglash masalasi koʻrilgan edi.

Shu maqsadda, 2022-yil 15-yanvar kuni Qoraqalpogʻiston Respublikasi sudining sudyasi Sultanmurad Davletmuratov, Jinoyat ishlari boʻyicha Amudaryo tuman sudining raisi Jasurbek Oʻrazbayev, Fuqarolik ishlari boʻyicha Amudaryo tuman sudining raisi Qayrilla Atamuratov, Iqtisodiy ishlari boʻyicha Beruniy tumanlararo sudining sudyasi Bayram Bekmuratov hamda mutasaddi tashkilot masʼullari ishtirokida sayyor qabullar oʻtkazildi.

Sayyor qabullar Amudaryo tumaninig Qilichboy, Doʻrman, Xolimbeg ovullarida va Chordora mahalla fuqarolar yigʻinida boʻlib oʻtdi.

Sayyor qabullarda jami, 79 nafar fuqaro qatnashib, oʻzlarinig ariza-shikoyatlari va takliflari bilan murojaat qilishdi.

Qabullar davomida “Jismoniy va yuridik shaxslarning murojaatlari toʻgʻrisida”gi qonunning mazmun-mohiyati haqida keng tarzda tushinchalar berildi.

Shuningdek, huquqbuzarliklar profilaktikasi, jinoyatchilikka qarshi kurashishda jamoatchilikning oʻrni muhim ahamiyatga ega ekanligi, huquqiy madaniyatni oshirish uchun, avvalo, har bir kishi oʻz haq-huquqini bilishi lozimligi taʼkidlandi.

Ayniqsa, bu borada sudlarning oʻrni katta ahamiyatga ega ekanligi, sud organlari tomonidan muntazam ravishda tegishli huquqiy maslahatlar ham berib borilishi maʼlum qilindi.

 Bundan tashqari, Iqtisodiy, Jinoiy, Maʼmuriy va Fuqarolik sudlari tomonidan odil sudlovni amalga oshirish, sudni “Adolat qoʻrgʻoni”ga aylantirish, xalq bilan toʻgʻridan-toʻgʻri yuzma-yuz ochiq suhbatlar koʻlamini yanada kengaytirish lozimligiga alohida urgʻu berildi.

Shu qatorda fuqarolarning muammolarini hal qilishda yaqindan yordam berish orqali buzilgan huquqlarini tiklash boʻyicha tegishli chora-tadbirlar belgilab olinib, bu boradagi ishlar mazkur yilda ham uzluksiz davom ettirilishi taʼkidlandi.

Sayyor qabullar davomida fuqarolarga “Jismoniy va yuridik shaxslarning murojaatlari toʻgʻrisida”gi Qonunning 5-moddasida murojaatlarning shakllari va turlari belgilanganligi, unga muvofiq, murojaatlar ogʻzaki, yozma, yoki elektron shaklda boʻlishi tushuntirildi. Arizalar, takliflar va shikoyatlar murojaatlarning turlari hisoblanishi, murojaatlarning shakli va turidan qatʼiy nazar, bir xil ahamiyatga ega ekanligi aytib oʻtildi. Yigʻilish davomida fuqarolarning murojaatlari tinglanibgina qolmasdan ularga huquqiy maslahat va tavsiyalar ham berildi.

Olis va chekka hududlarda yashovchi fuqarolarga yanada qulay imkoniyatlar yaratish, ular bilan yuzma-yuz koʻrishib muammolarini hal qilishda oʻtkazilayotgan sayyor qabullarning ahamiyati kattadir.

F. Eshimbetova.