“Hokim va yoshlar uchrashuvi” boʻlib oʻtdi

Bugungi kunda mamlakatimizda yosh avlodning sifatli taʼlim olishi, sport va boshqa yoʻnalishlarda isteʼdodini namoyon etishi, jamiyatda munosib oʻrnini topishi uchun gʻamxoʻrlik tobora kuchaytirilmoqda. Chunki farovon hayot – mukammal tarbiyadan boshlanadi. Shu boisdan yoshlarni barkamol qilib tarbiyalash, ularning hayotga mustaqil qadam qoʻyishlari uchun barcha sharoitlarni yaratish, yoshlar bilan ishlash samaradorligini oshirish doimo davlatimizning ustuvor maqsad-vazifalaridan boʻlib kelmoqda.

Tumanimizda ham bu borada koʻpgina saʼy-harakatlar olib borilmoqda.

Joriy yilning 20-yanvarida tumanimizdagi 82-sonli maktab faollar xonasida tumanimiz yoshlari bandligini taʼminlash, muammo va takliflarini oʻrganish, ularni qoʻllab-quvvatlash ham munosib shart-sharoitlar yaratib berish maqsadida “Hokim va yoshlar” uchrashuvi oʻtkazildi.

Yigʻilishda tuman hokimi Sultonboy Yoʻldashev, Oʻzbekiston Respublikasi Prezidentining Amudaryo tumanidagi Xalq qabulxonasi mudiri Erkin Rajabov, Yoshlar ishlari agentligi tuman boʻlimi boshligʻi Jasur Davletov va tumandagi idora va tashkilotlar rahbarlari, faol va turli murojaat, muammolari bor 48 nafar yoshlar ishtirok etdilar.

Yigʻilishni tuman hokimi Sultonboy Yoʻldashev ochdi va yoshlarni yigʻilish kun tartibidagi masala bilan tanishtirdi va tumanimizda yoshlarning oʻz iqtidorlarini namoyish etishlari, oʻqib, ilm olib mutaxassislik va kasb-hunar egallashlari, yuksak axloqiy fazilatlar va chuqur bilim bilan qurollanib, yurtimiz farovonligi yoʻlida mehnat qilishlari uchun yaratilgan imkoniyatlardan unumli foydalanib, hayotda oʻz oʻrnini topishga daʼvat etdi, yurt koriga yaraydigan, yurtini, oilasini qadrlaydigan yoshlardan ota-onasi ham, Vatan ham rozi boʻlishini taʼkidladi.

Xalq qabulxonasi mudiri Erkin Rajabov soʻzga chiqib, ilm-maʼrifatning inson hayotidagi oʻrniga toʻxtaldi va yoshlarni dunyo tamadduduniga ulkan hissa qoʻshgan buyuk ajdodlarimizning bebaho maʼnaviy merosini chuqur oʻrganib, bugungi shiddatkor davrning munosib vakillari boʻlishi lozimligini aytdi.

Shundan soʻng yoshlarning takliflari, muammolari tinglandi. Mangʻit shahrining Oybek mahallasida istiqomat qiluvchi Marhabo Abdukarimova zamonaviy tikuv mashinasi olishda, Iroda Erdosheva haydovchilar tayyorlash kursida oʻqishga subsidiya soʻrab, Otabek Qodirov oʻz mutaxassisligi boʻyicha ishga joylashishda yordam soʻrab, Gulzor mahallasida yashovchi Nurbek Yoʻldoshev, Nodirbek Gulmirzayevlar chorvachilik yoʻnalishi boʻyicha imtiyozli kredit olishda yordam soʻrab murojaat qildilar.

Uchrashuv yigʻilishida yoshlar tomonidan bildirilgan taklif va murojaatlarni ijobiy hal qilish yuzasidan tegishli idora va tashkilotlar rahbarlariga topshiriqlar berildi.

“Hokim va yoshlar” uchrashuv yigʻilishida ishtirok etgan yoshlar oʻzlariga qaratilayotgan eʼtibordan mamnun ekanliklarini bayon etdilar.

O.RAJABOVA.