Qishloq oilaviy poliklinikasi hududidagi 18 yoshdan yuqori aholining 90 foizi koronavirusga qarshi emlandi

Butun dunyo boʻylab tarqalgan koronavirus infektsiyasi hali ham chekinganicha yoʻq. Vaqt oʻtgan sayin ushbu koʻrinmas ofatning turli koʻrinishlari va shtammlari paydo boʻlmoqda. Yer yuzida koronavirus tufayli hayotdan koʻz yumganlar 1-jahon urishi qurbonlari sonidan ham ortiq ekanligi bizni yanada ogohlikka chorlaydi. Virus kirib kelgan kundan boshlab Oʻzbekistonning barcha hududlarida profilaktik ishlar amalga oshirilib, aholi salomatligini saqlash bosh maqsadga aylandi. Shu maqsadda Respublikamiz boʻylab koronavirusga qarshi vaktsinalar bilan aholining toʻliq emlanishi boʻyicha barcha sharoitlar yaratilib, nazoratga olindi.

Bugungi kunda koronavirus infektsiyasining oldini olish va aholining vaktsina bilan toʻliq emlanishini taʼminlash boʻyicha tuman koʻp tarmoqli markaziy poliklinikasida, qator ovul va mahalla fuqarolar yigʻinlari, oilaviy poliklinikalar va qishloq vrachlik punktlarida tizimli ishlar amalga oshirilmoqda.

Jumladan, Amudaryo tumanining Oq oltin ovul fuqarolar yigʻini hududida joylashgan “3-qishloq” qishloq oilaviy poliklinikasida ham ovul hududida yashovchi fuqarolarni infektsiyaga qari emlash ishlari uyushqoqlik bilan olib borilmoqda.

Hozirga qadar ovul hududida istiqomat qiluvchi 18 yoshdan yuqori boʻlgan aholining 90 foizi vaktsinaning buster dozasi bilan emlandi. Qolgan 10 foiz aholini homilador ayollar, bolalar, va chaqaloqlar tashkil qiladi.

Maʼlumot uchun, Oq oltin ovul fuqarolar yigʻini hududida 8 ming 939 nafar aholi istiqomat qilib, shundan 18 yoshdan katta boʻlgan aholi 5 ming 713 nafarni tashkil qiladi.

Xalqaro darajadagi virusologlarning taʼkidlashicha, buster dozani olish uchun oldin qanday vaktsina bilan emlanganlikning ahamiyati yoʻq. Buster doza bilan emlanish “alfa”, “delta”, “omikron” shtammidan 100 foiz himoya qila oladi. Qolaversa, ushbu doza bilan emlanish natijasida antitanachalar dastlabki ikki dozaga nisbatan 25 baravarga oshadi. Biroq ortiqcha hotirjamlikka berilmaslik kerak, chunki “omikron” boshqa shtammlarga qaraganda anchagina yuqumli va qisqa muddatda aholining katta qismini zararlashi mumkin. Shu bois karantin qoidalariga qatʼiy rioya qilish, emlash tadbirlarida faol ishtirok etish har qachongidan-da muhim.

Ayni kunlarda mazkur qishloq oilaviy poliklinikasi shifokorlari va hamshiralari fuqarolarga emlash tadbirlarida faol ishtirok etish, tozalikka rioya qilish boʻyicha tavsiyalar berib, emlanish nafaqat oʻz hayoti, balki yaqinlari hayoti uchun ham gʻoyatda muhim ekanini taʼkidlab kelmoqdalar.

Shu oʻrinda emlangan yurtdoshlarimizni ham koronavirus infektsiyasiga yana qayta chalinmaslik uchun vaktsinaning kuchaytiruvchi, yaʼni buster dozasini qabul qilishga chaqiramiz. Pandemiyadan butunlay halos boʻlishning yagona yoʻli – emlanish ekanligini unutmasligimiz lozim.

F. Eshimbetova