Bandligi taʼminlangan fuqarolar bilan uchrashuv boʻlib oʻtdi

Oʻzbekiston Respublikasi Prezidentining 2021-yil 3-dekabrdagi “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi qaroriga asosan har bir mahallada hokim yordamchilari lovozimi joriy etilib, ular ish faoliyatining asosiy yoʻnalishlari aniq belgilab berildi.

Amudaryo tumanida ham mavjud 49 ta mahallaning hokim yordamchilari oldlariga qoʻyilgan sharafli va shu bilan birga murakkab vazifalarni oqilona bajarish hamda oʻz mahallasi hududida ishsizlik va kambagʻallikni qisqartirish borasida koʻplab ijobiy ishlarni amalga oshirmoqdalar.

Hokim yordamchilari ish boshlaganiga hali koʻp vaqt boʻlmasa ham tuman boʻyicha 255 nafar fuqaroga oʻz tavsiyalari asosida salkam 5 mlrd. soʻm miqdorda imtiyozli kredit ajratilishida yordam berishdi. Shuningdek, imtiyozli kredit ajratilgan ayrim fuqarolarga bandligini taʼminlashga yoʻnaltirilgan  texnika vositalari olib berildi.

Tumanimizdagi mahallalarda  amalga oshirilayotgan keng koʻlamli islohatlar bilan yaqindan tanishish hamda bandligi taʼminlangan fuqarolar bilan suhbatlashish maqsadida joriy yilning 15-mart kuni Qilichboy ovul fuqarolar yigʻinida joylashgan Qilichboy Madaniyat markazida tadbir boʻlib oʻtdi.

Tadbirda Amudaryo tumaniga Respublikadan biriktirilgan vakil Umidbek Yoʻldashov, Davlat xavfsizlik xizmati Amudaryo tumani boʻlimi boshligʻi Sultanmurat Jolimbetov, Mahallabay ishlash va tadbirkorlikni rivojlantirish markazi boshligʻi  Jasurbek Davletov, Yoshlar ishlari agentligi tuman boʻlimi boshligʻi Sardor Ismailov, tuman prokurori yordamchisi Komil Avezov hamda  hokim yordamchilari, yoshlar yetakchilari ishtirok etishdi.

Tadbir davomida 33 mln. soʻmdan imtiyozli kredit ajratilgan 15 nafar fuqarolarga uch gʻildirakli mototsikl va 14 mln soʻmdan imtiyozli kredit ajratilgan 6 nafar fuqarolarga motokultivatorlar topshirildi. Masʼullar fuqarolar bilan birma-bir suhbatlashib, ish faoliyatlarida muvafaqqiyat tiladilar.

Qilichboy ovul fuqarolar yigʻinida “Yoshlar daftari”ga kiritilgan Doniyor Madaminov, Otabek Olimboyev, Jonibek Jumaboyev, Dinora Rajabbayeva, Shaxzod Oʻrinbayev kabi bandligi taʼminlanmagan yoshlarga mahalladagi hokim yordamchisi va yoshlar yetakchisi tashabbusi bilan 25 sotixdan yer ajratib berilgan edi. Masʼullar ushbu yoshlarning ajratilgan yer maydonlarida  tadbirkorlikning qanday yoʻnalishlarida faoliyat olib borishlariga qiziqib, ular bilan yaqindan suhbat qurishdi.

Shuningdek, yoshlarga onlayn auktsionda boshlangʻich badal toʻlovini amalga oshirmay qatnashishlari mumkinligi, hamda elektron raqamli imzo kalitini olishlari boʻyicha keng tarzda tushuntirishlar berildi.

Rahbarlar bilan uchrashuv hamda ular tomonidan bildirilgan iliq fikrlar barcha yoshlar dilida oʻzgacha taassurot qoldirdi.

Tuman hokimligining Axborot xizmati