Tomorqa − yuqori daromad manbai

Bugungi kunda tomorqa qishloq aholisining asosiy daromad manbaiga aylanib bormoqda. Aslida ham, tomorqa – rizq-roʻz, qoʻshimcha daromad manbai, bandlikni, arzonchilikni taʼminlashning samarali usulidir. Mehnatga ishtiyoq, havas boʻlsa, inson nafaqat oʻz hayotini balki oila aʼzolarini turmushini ham farovon qila oladi. Buni yaxshi anglagan Amudaryo tumani aholisining asosiy qismi oʻz tomorqalarida issiqxonalar tashkil qilib, yaxshigina daromad manbaiga ega boʻlishmoqda.

Oʻz tomorqalaridan unumli foydalanayotgan fuqarolar bilan suhbatlashish hamda zaruriy tavsiyalar berish maqsadida Oʻzbekiston fermer, dehqon xoʻjaliklari va tomorqa yer egalari Kengashining Amudaryo tumaniga biriktirilgan vakili Umrzoq Rahmatov masʼullar bilan birgalikda Qoramon mahallasida uchrashuv oʻtkazdi.

Uchrashuv davomida davlatimiz rahbari tomonidan 2021-yil  1-aprel sanasida imzolangan “Dehqon xoʻjaligi toʻgʻrisida”gi qonunning mazmun-mohiyati xaqida keng tushunchalar berib oʻtildi.

Taʼkidlanganidek, “Dehqon xoʻjaligi toʻgʻrisida”gi qonunga koʻra, 18 yoshga toʻlgan, muomalaga layoqatli boʻlgan, oʻziga dehqon xoʻjaligini yuritish uchun yer uchastkasi meros qilib qoldiriladigan umrbod egalik qilish yoki ijara huquqi asosida berilgan Oʻzbekiston fuqarosi yoki Oʻzbekiston hududida doimiy yashovchi fuqaroligi boʻlmagan shaxs dehqon xoʻjaligi boshligʻi boʻlishi mumkin.

Shuningdek, qonun bilan belgilanganidek, dehqon xoʻjaliklaridan davlat boji va yigʻim undirilmaydi, dehqon xoʻjaligini yuritish uchun 6 sotixdan 1 gektargacha boʻlgan oʻlchamda yer uchastkalari beriladi. Qishloq xoʻjaligiga moʻljallangan yerlarning asosiy ekindan boʻshagan qismi 6 sotixdan 10 gektargacha boʻlgan oʻlchamda bir yilgacha boʻlgan muddatga ikkilamchi ijaraga berilishi mumkin. Berilgan yer uchastkasidan faqat qishloq xoʻjaligi mahsulotlari yetishtirish uchun foydalanilishi kerak.

Masʼullar mahallaning faol aʼzosi, oʻz tomorqasida bir necha yillardan buyon issiqxona tashkil qilib, yuqori daromad manbaiga ega boʻlib kelayotgan Yangiboy Sultonovning xonadonida boʻlishdi. Mehmonlar Yangiboy Sultonovning issiqxonasida pomidor va bodringning bir necha xil navlari, bulgʻor qalampiri va ertagi tarvuz nihollari barq urib rivojlanayotganligiga hamda oilaning oʻz chorvasi, parrandasi borligi daromadiga yana daromad qoʻshayotganiga guvoh boʻlishdi.

Darhaqiqat, Prezidentimiz tomonidan puxta oʻylangan rejalar asosida uzoqni koʻzlab qabul qilinayotgan farmon va qarorlar avvalo aholining eng muhim oziq-ovqat mahsulotlariga boʻlgan talabini toʻlaqonli taʼminlashga, oltinga teng boʻlgan sugʻoriladigan yer maydonlarimizdan samarali foydalanish orqali koʻproq mahsulot yetishtirish va ichki bozorda oziq-ovqat mahsulotlari narx-navosining barqarorligini taʼminlashga xizmat qilmoqda.

Zero, dehqon xoʻjaliklariga va tomorqa yer egalariga koʻrsatilayotgan gʻamxoʻrliklar zamirida qishloq joylarda yashovchi oilalarni qoʻllab-quvvatlash, ularning daromadlarini koʻpaytirish, turmush tarzini yanada yaxshilashga qaratilgan oliyjanob maqsad mujassamdir.

Tuman hokimligining Axborot xizmati