YaNGI MILLIY OʻQUV DASTURI DOIRASIDA OʻQUV SEMINAR OʻTKAZILDI

Keyingi yillarda xalq taʼlimi sohasiga jiddiy eʼtibor qaratilib, oʻsib kelayotgan yosh avlodning barkamol boʻlib ulgʻayishi, zamonaviy bilimlarni puxta oʻzlashtirishlariga gʻamxoʻrlik kuchaymoqda. Taʼlimga yangi innovatsion pedagogik texnologiyalar, yangi Milliy oʻquv dasturi joriy etilmoqda. Avvalgi oʻquv dasturlari mazmuni asosan nazariyadan iborat boʻlgan boʻlsa, yangi dasturda esa nazariya bilan amaliyot baravar olib borish koʻzda tutilgan. Avval  oʻquvchilar bilimini baholash faqat eslab qolingan bilimlar hajmini aniqlagan boʻlsa, endilikda oʻquvchilarda shakllangan koʻnikmalar eʼtiborga olinadi.

Umumiy taʼlim maktablarida fanlar soni va oʻquv yuklamalari optimallashtirilgan, oʻquvchilar qiziqishlariga koʻra fanlarni tanlab oʻqish imkonini beruvchi variativ oʻquv dasturlar asosida hayotga va kasbiy faoliyatga yoʻnaltiriladi. Yangi milliy oʻquv dasturida fanlardagi  mavzular takroriy emas, balki bir-birini  mantiqan davom ettiruvchi va soddadan murakkabga tomon yoʻnaltirilgan tarzda kiritilgan.

2021-2022-yilida tajriba-sinov tariqasida taʼlimga joriy etilayotgan ushbu dastur mamlakatimizda taʼlim sifati va natijadorligini oshirishga xizmat qiladi.

Shu yilning 19-aprelida Amudaryo tumanidagi 16-sonli umumiy oʻrta taʼlim maktabida yangi Milliy oʻquv dasturini 6-, 7-, 10-sinflarda ona tili va adabiyot darsida amaliyotga joriy etishga bagʻishlangan oʻquv-seminari boʻlib oʻtdi.

Seminarda tuman Xalq taʼlimi boʻlimi metodisti Oʻtkir Matmurodov, tumanimiz maktablarining ona tili va adabiyot fani boʻyicha trener oʻqituvchilari Dilnoza Ibrohimova, Umida Rahimboyeva hamda maktablarning ona tili va adabiyot fani oʻqituvchilari ishtirok etdilar.

Oʻquv seminarda umumiy oʻrta taʼlim maktablarida 6-, 7- va 10-sinflar oʻquvchilari uchun yaratilgan Milliy oʻquv dasturi, darslik, mashq daftari, undagi topshiriqlar namunalari, ushbu dasturni taʼlimga joriy etishdan kutilayotgan natijalar haqida maʼruzalar qilindi. Ona tili va adabiyot darslarida amalga oshirilishi lozim boʻlgan asosiy masala – oʻquvchida soʻzga qiziqish va eʼtibor hissini muntazam oʻstirib borish, ularga soʻzning ahamiyati, turli matnlarda tutgan oʻrnini tushuntirishdan iborat boʻlmogʻi lozimligi xususida soʻz yuritildi. Seminar ishtirokchilari amaliyotga joriy qilinishi kutilayotgan yangi ona tili va adabiyot darsliklari va undagi oʻzgarishlar xususida ham fikr almashishdi.

Seminar davomida oʻqituvchilar bilan birgalikda yangi darsliklardan joy olgan topshiriqlardan namunalar ishlandi. Shundan soʻng tajribali ona tili va adabiyot fani oʻqituvchilari yangi Milliy oʻquv dasturi yuzasidan oʻz fikr-mulohazalari bilan oʻrtoqlashdilar.

Oʻquv seminar qiziqarli va samimiy tarzda oʻtdi, oʻqituvchilarni qiziqtirgan savollarga batafsil javoblar qaytirildi.

Albatta, biron yangilikka qoʻl urishdan oldin uning ahamiyatini anglab yetish juda muhim. Shu maʼnoda olib qaraydigan boʻlsak, mazkur oʻquv seminar tumanimiz maktablarining ona tili va adabiyot fani oʻqituvchilariga yangi Milliy oʻquv dasturi asosida oʻqitishning maqsad-vazifalarini chuqur yetkazishga xizmat qilgani bilan ahamiyatli boʻldi.

Oygul RAJABOVA.