9-may – Xotira va qadrlash kuni munosabati bilan Amudaryo tumani hokimi Sultonboy Yoʻldashevning bayram tabrigi

Assalomu alaykum, qadrli yurtdoshlar!

Muhtaram faxriylar, aziz mehmonlar!

Avvalo, Siz azizlarni, sizning timsolingizda koʻpmillatli xalqimizni Ikkinchi jahon urushida erishilgan Gʻalabaning 77 yillik bayrami hamda Xotira va qadrlash kuni bilan chin qalbimdan muborakbod etaman.

Bugun barchamiz, avvalo, fashizm ustidan  qozonilgan Gʻalabaga beqiyos hissa qoʻshgan, mana shu yorugʻ kunlarga yetib kelolmagan vatandoshlarimizning soʻnmas xotiralarini yod etmoqdamiz. Jang maydonlarida mardlik, jasorat koʻrsatgan, front ortida fidokorona mehnat qilgan va bugun oramizda sogʻ-omon yurgan faxriylarimizga taʼzim qilamiz.

Urush va urushdan keyingi tiklanish yillarida jonini fido qilib mehnat qilgan, kunni tunga ulab zahmatli xizmatlari evaziga xalq xoʻjaligining oyoqqa turishiga, jamiyatimizning farovon boʻlishiga hissa qoʻshgan urush ortidagi mehnat fronti faxriylarining xizmatlarini doimo eʼtirof etamiz va ularni hamisha qadrlaymiz. Hozirgi tinch-osoyishta hayotimiz, musaffo osmonimiz uchun ularga cheksiz minnatdorchilik bildiramiz.

Hech shubhasiz, oradan qancha yillar, zamonlar oʻtmasin, fashizm ustidan qozonilgan Gʻalabaning qadr-qimmati va ahamiyati tobora ortib boraveradi.

Insoniyat tarixidagi eng daxshatli bu urushda oʻsha paytdagi jami 6 million Oʻzbekiston aholisining 1 yarim milliondan ortiq fuqarosi qatnashgan. Ularning yarim milliondan ziyodi jang maydonlarida halok boʻlishgan. 133 ming nafarga yaqini bedarak yoʻqolgan. 60 mingdan ortiq vatandoshimiz esa urushdan nogiron boʻlib qaytgan.

Tumanimizdan esa 4 ming 344 nafar yurtdoshimiz urushga qatnashib, ularning 897 nafari jang maydonlarida halok boʻlgan boʻlsa, 1 ming 927 nafari bedarak yoʻqolgan hamda 1 ming 500 nafarga yaqini oʻz uylariga nogiron boʻlib qaytganlar.

Oʻzbekiston ahli urush hududlaridan koʻchirib keltirilgan 1 millionga yaqin insonga boshpana berib, oʻz nonini ular bilan baham koʻrishdi. Ota-onasi, oilasidan judo boʻlgan 200 ming nafar begunoh bolalarni “Sen yetim emassan!” deb bagʻriga bosib, mehr-muruvvat koʻrsatdilar.

Aziz yurtdoshlar!

Bugungi tahlikali dunyoda yuz berayotgan voqealar barchamizni tinchlikning qadriga yetishga undaydi. Yaqin qoʻshnilarimiz boʻlgan davlatlarda sodir boʻlgan va davom etayotgan notinchliklar, dunyoning turli nuqtalarida boʻlayotgan urushlar millionlab tinch aholini oʻz domiga tortib, shahar va qishloqlarning vayron boʻlishiga, yuz minglab aholi, ayniqsa begunoh goʻdaklarning hayotdan bevaqt koʻz yumishiga sabab boʻlmoqda. Bu urushlar tinch aholi boshiga qanday ogʻir azob-uqubat va talofatlar, behisob qurbonlar olib kelganiga barchamiz guvoh boʻlmoqdamiz.

Albatta, ushbu mudhish urushlar oqibatlari bebaho neʼmat − tinchlikning qadriga yetishga, doimo hushyor va ogoh boʻlib yashashga, yoshlarimiz ongini buzgʻunchi gʻoyalardan himoya qilib Vatanga sadoqat ruhida tarbiyalashga chorlab turadi.

Aziz doʻstlar!

Mamlakatimizda keyingi yillarda barcha sohalarda tub islohatlar amalga oshirilmoqda. Inson qadri va manfaati yoʻlida amalga oshirilayotgan bu ulkan oʻzgarishlar, boshqalarning havasini tortadigan yutuq hamda marralarga erishganimizning ortida ulugʻ neʼmat − tinchlik va osoyishtalik turibdi.

Tumanimizda amalga oshirilayotgan bunyodkorlik, obodonlashtirish ishlari ham shular jumlasidandir. Jumladan, keyingi yillarda birgina Amudaryo tumanida yuzlab oilalar uchun moʻljallangan namunaviy loyihalar asosidagi arzonlashtirilgan uy-joylar, taʼlim va tibbiyot muassasalari, mahalla fuqarolar yigʻinlarining, yuzlab yangi tadbirkorlik subʼektlarining binolari qoʻrilib, foydalanishga topshirildi.

Bugun Siz azizlar bilan uchrashib turganimiz − mana shu muhtasham “Xotira maydoni” ham tumanimiz mahalliy byudjeti mablagʻlari hisobiga barpo qilindi. Bu maydondagi ramziy “Xotira kitobi” sahifalariga Ikkinchi jahon urushida qatnashgan va shahid ketgan, Vatanimizning tinchligi va ozodligi uchun kurashgan yuzlab yurdoshlarimizning nomlari abadiy muhrlangan.

Fashizm ustidan qozonilgan gʻalabaga munosib hissa qoʻshgan har bir yurtdoshimizning xotirasi nafaqat ushbu “Xotira kitobida”, balki kelgusi avlodlarimiz qalbida ham mangu yashaydi. Oramizda boʻlgan urush va mehnat fronti faxriylari davlatimiz va jamiyatimizning doimo eʼzozida boʻlib, ularning insoniyatni fashizm balosidan qutqarish yoʻlida qilgan fidoiyliklari kelgusi avlodlarimizga ham ibrat boʻlib qoladi.

Aziz yurtdoshlar, muhtaram faxriylar!

Bugungi qutlugʻ ayyom − Xotira va qadrlash kunida ota-bobolarimizning shonli anʼanalarini munosib davom ettirib, Vatan himoyasi yoʻlida oʻzini ayamasdan, fidokorona xizmat qilayotgan mard va jasur askarlarimizga, ofitser va posbonlarimizga tumanimiz ahli nomidan samimiy minnatdorchilik izhor etamiz. 

Fursatdan foydalanib, muhtaram faxriylarimizni, hamyurtlarimizni bugungi qutlugʻ bayram bilan yana bir bor muborakbod etaman.

Barchangizga tinchlik-omonlik, xonadonlaringizga qut-baraka tilayman. Yurtimiz tinch, osmonimiz musaffo boʻlsin!

Eʼtiboringiz uchun rahmat!