Amudaryo tumanida fuqarolar yigʻinlari raisi saylovi oshkoralik va muqobillik printsiplari asosida oʻtkazilmoqda

Mahalla bu − oʻzini oʻzi boshqarishning oʻziga xos oʻzbekona, boshqa mamlakatlarda oʻxshashi topilmaydigan modeli boʻlib hisoblanadi. Mahalla mamlakatimizda amalga oshirilayotgan barcha sohalardagi islohotlarda katta ahamiyatga ega boʻlganligi bois oʻzgarishlarni bevosita mahalla fuqarolar yigʻinlarisiz tasavvur qilish qiyin.

Maʼlumki, Oʻzbekiston Respublikasi Oliy Majlisi Senati Kengashining tegishli qaroriga muvofiq shu oyda yurtimizning barcha hududlarida muhim ijtimoiy-siyosiy tadbir − fuqarolar yigʻinlari raislari saylovi oʻtkazilmoqda. Bu muhim siyosiy tadbirning namunali oʻtkazilishini taʼminlash maqsadida fuqarolar yigʻinlari raislari saylovini tashkil etish va oʻtkazishga koʻmaklashuvchi tuman komissiyasi va bevosita mahalla fuqarolar yigʻinlarida faoliyat olib boruvchi ishchi guruhlari tashkil etilgan.

Bu yil tumanimizdagi 49 ta ovul va mahalla fuqarolar yigʻinlarida ham yigʻin raisini saylash jarayonlari oshkoralik, muqobillik va teng saylov printsplari asosida oʻtkazilmoqda. 16-may kunidan boshlangan saylov jarayonlari qizgʻinlik bilan davom etmoqda. 27-may sanasiga qadar tumanimizning 43 ta ovul va mahalla fuqarolar yigʻinlarida saylovlar oʻtkazilib, vakillar tomonidan yashirin ovoz berish yoʻli orqali nomzodlardan eng munosiblari yigʻin raisi qilib saylandi.

Tumanimizning barcha hududlarida boʻlgani singari Qizilcholi mahalla fuqarolar yigʻinida ham saylov jarayonlari oshkora va shaffof tarzda oʻtkazildi.

Maʼlumki, fuqarolar yigʻini raisi lavozimiga oliy maʼlumotga ega, bevosita saylovga qadar kamida besh yil tegishli hududda doimiy yashayotgan, tashkilotchilik qobiliyatiga, davlat organlarida yoki nodavlat notijorat tashkilotlarida yoxud tadbirkorlik va boshqa xoʻjalik faoliyati sohasida ish tajribasiga, shuningdek hayotiy tajribaga va aholi oʻrtasida obroʻ-eʼtiborga ega boʻlgan shaxslar nomzod qilib koʻrsatiladi.

Qizilcholi mahalla fuqarolar yigʻini raisi lavozimiga nomzod sifatida koʻrsatilgan Mansur Atajanov hamda Shavkat Ibraimovlar ham mahalladoshlari orasida alohida obroʻ va eʼtiborga ega shaxslar boʻlib, oʻz mahallasi uchun koʻplab hayrli ishlarni amalga oshirganlar.

Saylov kuni nomzodlar mahallani har tomonlama rivojlantirish hamda aholining yordamga muhtoj qatlamlarini qoʻllab-quvvatlash boʻyicha oʻz dasturlarini vakillar eʼtiboriga havola qilishdi.

Yashirin ovoz berish natijalariga koʻra Shavkat Ibraimov Qizilcholi mahalla fuqarolar yigʻii raisi lavozimiga saylandi. Maʼlumot uchun, Shavkat Ibraimov 1975-yilda tugʻilgan. Maʼlumoti oliy. U 2009-yildan buyon “Kuyuk koʻpir Oltinkoʻzi” biolaboratoriyasi mudiri lavozimida ishlab kelayotgan edi. Saylov yakunida Shavkat Ibraimov mahalladoshlariga bildirgan ishonchi uchun minnaddorlik bildirib, mahallaning obodligi va farovonligi uchun fidokorona mehnat qilishga soʻz berdi.

26-may kuni Amudaryo tumanining Beruniy nomli mahalla fuqarolar yigʻinida ham fuqarolar yigʻini raisi saylovi boʻlib oʻtdi.

Saylovga qadar ishchi guruh hamda saylovni tashkil qilish va oʻtkazishga koʻmaklashuvchi tuman komissiyasi tomonidan barcha nomzodlar oʻrganib chiqilib, tuman hokimi tomonidan Muratbay Xaybullayev hamda Bobur Allaberganov nomzodlariga kelishim berilgan edi.

Saylovda har ikkala nomzod barchani oʻz dasturi bilan tanishtirdi.

Nomzodlar oʻz dasturlarida mahallada faoliyat olib borayotgan hokim yordamchisi, xotin-qizlar faoli, hamda yoshlar yetakchisi bilan samarali tarzda hamkorliki yoʻlga qoʻyishlarini, shuningdek, jamiyatning asosiy boʻgʻini − oila institutini mustahkamlash, aholining yashash sharoitini yaxshilash boʻyicha oʻz rejalarini bayon qilishdi.

Shundan soʻng, Oʻzbekiston Respublikasining “Fuqarolar yigʻini raisi (oqsoqoli) saylovi toʻgʻrisida”gi Qonunining 20-moddasiga koʻra, fuqarolar yigʻini raisini saylash jarayoni yashirin ovoz berish orqali amalga oshirildi.

Sanoq komissiyasi tomonidan natijalar eʼlon qilindi hamda eng koʻp ovoz olgan Muratbay Xaybullayev Beruniy mahalla fuqarolar yigʻini raisi lavozimiga saylandi.

Shu oʻrinda aytish kerakki, fuqarolar yigʻini raisi saylovi muhim demokratik jarayon boʻlib, mazkur saylovda ishtirok etish huquqiga ega boʻlgan fuqarolarimiz unda faol ishtirok etish orqali davlatimiz tomonidan amalga oshirilayotgan islohotlarni bevosita mahallada davom ettiruvchi shaxsni tanlash huquqiga ega boʻladilar.

Tuman hokimligining Axborot xizmati.