FIDOYI MEHNATLAR EʼTIROFI

Ustoz! Bu soʻzni eshitganda kim, necha yoshda, qanday mavqeda boʻlsa-da, koʻnglida iliq tuygʻular uygʻonadi. Taʼlim berib, oʻqish-yozishni oʻrgatgan, fan asoslarini ongiga muhrlagan insonlarni – muallimlarini eslaydi.

Ha, har birimiz butun salohiyatini, aql-idrokini, bilimi-yu qalb qoʻrini bizga baxshida etgan insonlarni doimo hurmat-eʼtibor bilan tilga olamiz, yaxshi kunlarda yoʻqlab, duolarini olishga intilamiz.

Mangʻit shahridagi 9-sonli Bolalar musiqa va sanʼat maktabi direktori, Qoraqalpogʻiston xalq taʼlimi aʼlochisi Yoʻldoshboy Abdalov ham oʻzining oʻqituvchilik faoliyati davomida ana shunday hurmat-eʼzozga sazovor boʻlgan insonlardan biri.

U 1980-yilda Toshkentdagi Nizomiy nomidagi pedagogika oliygohini musiqa fani oʻqituvchisi ixtisosligi boʻyicha tamomlab, 30-sonli maktabda faoliyatini boshladi. Oʻn yil davomida oʻquvchilarga sanʼat va musiqadan taʼlim berdi.

Maʼlum vaqt tuman Xalq taʼlimi boʻlimida uslubchi, 8-sonli ixtisoslashtirilgan davlat umumtaʼlim maktabida musiqa oʻqituvchisi va maktab direktorining maʼnaviy-maʼrifiy ishlar boʻyicha oʻrinbosari boʻldi.

Mana, 2018-yildan beri Mangʻit shahridagi 9-sonli Bolalar musiqa va sanʼat maktabiga rahbarlik qilayapti. Avvalo oʻzining musiqa va sanʼatni sevishi, bu borada oʻz bilimlarini oʻquvchi-yoshlarga chuqur oʻrgatishga boʻlgan intilishi tufayli oʻtgan yillar mobaynida iqtidorli shogirdlarni tarbiyalab voyaga yetkazdi. Fidoyi musiqa muallimi mana besh yildirki, tumanda yosh avlodning har tomonlama yetuk boʻlib voyaga yetishi, ularning ijodiy-musiqiy qobiliyatlarini rivojlantirish, qalbidagi musiqa va sanʼatga ixlosni tarbiyalashga xizmat qiladigan muassasaga mohirlik bilan rahbarlik qilib kelayapti. Uning ustoz-murabbiylarga, oʻquvchilarga talabchanligi, kasbiga fidoyiligi muassasada koʻpgina quvonarli yutuqlar qoʻlga kiritilishiga asos boʻlayotir. Maktab oʻqituvchilari, oʻquvchilari tumanimizda oʻtkazilayotgan turli bayram tantanalarida teran mazmunli teatrlashtirilgan tomoshalar namoyish etishib, koʻpchilikning eʼtiborini qozonayotir. Shuningdek, turli koʻrik-tanlovlarda munosib ishtirok  etishayapti. Xususan, 2020-2021 oʻquv yilida har uch yilda bir marta musiqa va sanʼat maktablari oʻquvchilari orasida oʻtkaziladigan Muhiddin Qori Yoqubov nomidagi Respublika koʻrik-tanlovining Qoraqalpogʻiston Respublikasi bosqichida mazkur maktabning 12 nafar oʻquvchisi ishtirok etib, 8 nafari gʻolib va sovrindor boʻlishdi. 2021-2022 oʻquv yilida “Kamalak yulduzlari” koʻrik-tanlovining Respublika bosqichida 2 nafar oʻquvchi sovrindor boʻldi.

Muassasada erishilayotgan yutuqlar, kasbiga mehri, jonkuyarligi va halol mehnatlari inobatga olinib, Yoʻldoshboy Abdalov mamlakatimiz mustaqilligining 31 yilligi arafasida Qoraqalpogʻiston Respublikasi Joʻqorgʻi Kengesi Prezidiumi qaroriga muvofiq “Qoraqalpogʻistonda xizmat koʻrsatgan madaniyat xodimi” unvoni bilan taqdirlandi.

– Taqdirlash marosimida meni davraga chaqirishganida salkam 40 yillik mehnat faoliyatim zumda koʻz oʻngimga keldi. Shunday yuksak unvonga sazovor boʻlganimdan juda quvondim. Shu kun hayotimdagi eng nurli kun boʻldi. Bu unvon butun jamoamizniki, deb hisoblayman, – deydi u quvonch bilan.

Kimki, oʻz kasbini sevsa, sidqidildan mehnat qilsa, mehnat faoliyati unga sharaf keltiradi. Buni hayotning oʻzi tasdiqlaydi. Yoʻldoshboy Abdalov ham samarali mehnatlari tufayli ana shunday unvonga sazovor boʻldi.

Biz uning quvonchiga sherik boʻlib, kelgusi ishlarida ham muvaffaqiyatlar tilaymiz.

Oygul RAJABOVA.