Sportning anʼanaviy karate-do turi boʻyicha ochiq chempionat boʻlib oʻtdi

Mamlakatimizda amalga oshirilayotgan islohotlar, jumladan, jismoniy tarbiya va sport sohasiga qaratilayotgan eʼtibor Yangi Oʻzbekiston kelajagini yuksaltirish, millat genafondini yanada sogʻlomlashtirishga qaratilgani bilan ahamiyatlidir.

Qolaversa, hukumatimiz tomonidan sohani rivojlantirish orqali Oʻzbekiston sportini dunyo miqyosida namoyon etishga alohida eʼtibor qaratilmoqda.

Darhaqiqat, sport olimpiadalarida sportchilarimiz erishgan muvaffaqiyatlari yurtimiz bayrogʻini koʻklarga koʻtarishi bilan birga yosh avlodning jismonan sogʻlom boʻlib voyaga yetishida muhim vosita boʻlib xizmat qiladi. Shu maqsadda Respublikamizning barcha hududlarida boʻlgani singari Amudaryo tumanida ham sport sohasiga alohida eʼtibor qaratilib kelinmoqda.

27-sentyabr kuni Mangʻit shahri Olmazor mahallasi hududidagi Bolalar va oʻsmirlar sport maktabida Qoraqalpogʻiston Respublikasi anʼanaviy karate-do federatsiyasi tomonidan Oʻzbekiston Respublikasi Mustaqilligining 31 yilligi munosabati bilan “Yangi Oʻzbekistonda el aziz, inson aziz!” shiori ostida sportning anʼanaviy karate-do turi boʻyicha tuman ochiq chempionati boʻlib oʻtdi.

Chempionat 5-17 yosh oraligʻidagi oʻsmirlar va qizlar oʻrtasida, shuningdek 18 yoshdan kattalar oʻrtasida oʻtkazildi.

Chempionatning ochilish marosimida tuman hokimi Sultonboy Yoʻldashev, Qoraqalpogʻiston Respublikasi anʼanaviy karate-do federatsiyasi Prezidenti Oʻktam Abduraimov, 3-sektor rahbari, tuman Ichki ishlar boʻlimi boshligʻi Jamaladdin Yusupov, 4-sektor rahbari, tuman Davlat Soliq inspektsiyasi boshligʻi Aydos Seyitov, Amudaryo tumani sportni rivojlantirish boʻlimi boshligʻi Gʻulom Qurbanbayev hamda Shimoli-gʻarbiy harbiy okrug orkestr jamaosi ishtirok etishdi.

Qoraqalpogʻiston Respublikasi anʼanaviy karate-do federatsiyasi Prezidenti Oʻktam Abduraimov mamlakatimizda jismoniy tarbiya va sportni ommalashtirish ijtimoiy siyosatning muhim yoʻnalishlaridan biri etib belgilangani, sport aholi salomatligini mustahkamlash, yosh avlodni sogʻlom va barkamol etib tarbiyalash orqali jamiyatda sogʻlom turmush tarzini qaror toptirishga xizmat qilishini aytib oʻtdi.

Shuningdek, sport turli kasalliklar, yoshlar oʻrtasida zararli odatlarning oldini olishga xizmat qilishini, qolaversa sport yuksak madaniyat, vatanparvarlik tuygʻularini shakllantirishda ham muhim oʻrin tutishini taʼkidladi.

Shundan soʻng, tuman hokimi Sultonboy Yoʻldashev tumandagi yoshlarning sport sohasida erishayotgan muvaffaqiyatlirini, qoʻlga kiritayotgan gʻalabalarini eʼtirof etdi. Shuningdek, mustaqillik yillarida sportni rivojlantirish sohasida keng koʻlamli ishlar amalga oshirilganini, aholining, ayniqsa, yosh avlodning jismoniy tarbiya va ommaviy sport bilan muntazam shugʻullanishlari uchun barcha zarur sharoitlar yaratib berilganini, hududlarimizda koʻpgina sport inshootlari va majmualari, oʻyingohlar bunyod etilganini taʼkidlab, chempionat qatnashchilarining barchasiga omad tiladi va chempionatni ochiq deb eʼlon qildi.

Shundan soʻng, Oʻzbekiston va Qoraqalpogʻiston Respublikalarining davlat madhiyalari yangrab, Shimoli-gʻarbiy harbiy okrug orkestr jamaosining chiqishlari namoyish etildi.

Musobaqada 50 dan ortiq tumanimiz sportchilari hamda Qoʻngʻirot tumanidan tashrif buyurgan oʻsmirlar va qiz bolalar ishtirok etishdi. Musobaqa har bir yosh toifasi boʻyicha olimpiya tizimi asosida oʻtkazildi.

Chempionat yakunida gʻolib boʻlgan sportchilar esdalik sovgʻalari va diplom bilan taqdirlandi. Shuningdek, tumanda sportni rivojlantirishga, ayniqsa, karate-do turining rivojlanishiga munosib hissa qoʻshgan sektor rahbarlariga Qoraqalpogʻiston Respublikasi anʼanaviy karate-do federatsiyasining tashakkurnomasi tantanali tarzda topshirildi.

Tuman hokimligining Axborot xizmati.