Prezident farmoni ijrosini taʼminlash borasida amalga oshirilishi lozim boʻlgan muhim vazifalar muhokama etildi

Soʻnggi yillarda mamlakatimizning ijtimoiy-iqtisodiy hayotida misli koʻrilmagan islohotlar amalga oshirildi. Ushbu yangilanishlar va oʻzgarishlar xalqimiz hayotida ham oʻz aksini topmoqda. Oxirgi 6-yil ichida birgina Qoraqalpogʻiston Respublikasini kompleks rivojlantirishga doir 31 ta farmon va qarorlar qabul qilindi. Hududda tadbirkorlik subʼektlari soni 2 barobarga ortdi, qariyb 4,5 mingta investitsiya loyihalari ishga tushirildi.

Muhtaram Prezidentimiz tomonidan joriy yilning 31-avgust kuni imzolangan “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi Farmoni ushbu islohotlarning uzviy davomi sifatida qoraqalpogʻistonliklar hayotida yangi sahifa ochdi.

29-sentyabr kuni tuman hokimligi binosida boʻlib oʻtgan yigʻilishda mazkur farmon ijrosini taʼminlash borasida amalga oshirilishi lozim boʻlgan muhim vazifalar muhokama qilindi.

Yigʻilishda Qoraqalpogʻiston Respublikasi Joʻqorgʻi Kengesi Raisi oʻrinbosari Atabek Davletov, tuman hokimi Sultonboy Yoʻldashev, Qoraqalpogʻiston Respublikasi Iqtisodiy taraqqiyot va kambagʻallikni qisqartirish vaziri oʻrinbosari Atamurat Shamuratov, sektorlar rahbarlari, hokim oʻrinbosarlari, hokimlik masʼul xodimlari, hududlardagi hokim yordamchilari ishtirok etishdi.

Yigʻilishda Atamurat Shamuratov farmonning mazmun-mohiyati haqida keng turda maʼlumotlar berdi.

Keltirilshicha, yosh tadbirkorlarga ishlab chiqarish va xizmat koʻrsatish uchun zarur asbob-uskunalarni harid qilish maqsadida yosh tadbirkorlarni qoʻllab-quvvatlash jamgʻarmasi orqali 7-yil muddatga qarz mablagʻlari taqdim etiladi. Shuningdek, oilaviy tadbirkorlikni rivojlantirish dasturlari doirasidagi loyihalarni moliyalashtirish uchun 2022-yil yakuniga qadar qoʻshimcha ravishda 200 mlrd.soʻm kredit mablagʻlari ajratiladi.

Yigʻilish davomida tuman Davlat soliq inspektsiyasi boshligʻi Aydos Seyitov Respublika farmon bilan berilgan soliq imtiyozlari haqida batafsil maʼlumot berib, aniq misollar bilan tushuntirib berdi.

Taʼkidlanganidek, 2023-yil 1-yanvardan 2028-yilning 1-yanvarigacha boʻlgan davrda foyda soligʻi stavkasi 15 foizdan 7,5 foizga, aylanma soliq stavkasi esa Nukus shahrida 4 foizdan 2 foizga, tumanlarda 2 foizdan 1 foizga, olis hududlarda esa 1 foizdan 0,5 foizga kamaytiriladi. Undan tashqari, mol-mulk va yer soligʻi boʻyicha soliq stavkalari 2 barobarga kamaytiriladi.

Yakka tartibdagi tadbirkorlar uchun soliq miqdori yiliga 300 ming soʻmni tashkil etgani tadbirkorlar uchun katta yengillik boʻldi.

Yigʻilishda Qoraqalpogʻiston Respublikasi Joʻqorgʻi Kengesi Raisi oʻrinbosari Atabek Davletov Farmon ijrosini taʼminlash maqsadida har bir deputat oʻzining yillik dasturini ishlab chiqishi, yil davomida oʻz saylov okrugida farmonga muvofiq amalga oshirilgan ishlarni qayd qilib borishi, qolaversa tadbirkorlarga amaliy koʻmak berishi lozimligini aytib oʻtdi.

Shuningdek, har bir deputat oʻz saylov okrugida farmonning mazmun-mohiyatini keng tashviqot qilishi kerakligi, bunda bukletlar, tarqatma materiallardan foydalangan holda ish olib borish yaxshi samara berishi taʼkidlandi. Joʻqorgʻi Kengesning tumandan saylangan deputatlari va tuman Kengashi deputatlari bu borada deputatlik nazoratini oʻrnitishi lozimligi, deputatlik maqomidan foydalanib farmon ijrosini taʼminlashda sustkashlik va loqaydlikka yoʻl qoʻygan korxona-tashkilot masʼullari ustidan shikoyat qilishi mumkinligi eslatib oʻtildi.

 Aytish kerakki, mazkur farmon xalqimiz hayotiga koʻplab yengilliklar, ijobiy oʻzgarishlarni olib keladi. Galdagi vazifa esa aholi orasida, jumladan tumanning olis qishloqlarida yashovchi fuqarolarga tushuntirish-targʻibot ishlarini olib borishdir.

Yigʻilish davomida deputatlar Joʻqorgʻi Kenges Raisi oʻrinbosariga oʻzlarini qiziqtirgan savollar bilan murojaat qilib, tegishli javoblar oldilar.

Tuman hokimligining Axborot xizmati