SAIDA "QORAQALPOGʻISTON RESPUBLIKASIDA XIZMAT KOʻRSATGAN XALQ TAʼLIMI XODIMI" BOʻLDI

Taʼlim sohasida faoliyat yuritib kelayotgan tajribali oʻqituvchining ham, endigina ish boshlagan pedagogning ham maqsadi bitta - mamlakatimiz ertasi boʻlgan yosh avlodga sifatli taʼlim-tarbiya berishdir. Bu jarayonni samarali tashkil etib kelayotgan fidoyi oʻqituvchilardan biri – Saida Murodboyevadir.

U tuman XTBga qarashli 39-sonli maktabda taʼlimni samarali tashkil etib, yaratilayotgan imkoniyatlardan oqilona foydalangan holda, biologiya fanidan oʻquvchilarga puxta bilim berib kelmoqda. U har bir darsga puxta tayyorgarlik koʻrib, dars jarayonida zamonaviy texnologiyalardan foydalanadi. Oʻquvchilarining bilimidagi boʻshliqlarni toʻldirish maqsadida biologiya faniga qiziquvchi oʻquvchilarga bu fanning sir-asrorlarini chuqur oʻrgatib kelmoqda. Natijada Saida Murodboyeva tahsilini olayotgan oʻquvchilar fanlar olimpiadasida ketma-ket Respublika bosqichiga chiqib, eng yuqori oʻrinlarni egallab kelmoqda.

Saidaning taʼlim-tarbiya sohasidagi samarali mehnatlari, jonkuyarligi davlatimiz tomonidan yuksak baholanib kelinmoqda.

Jumladan, 2016-yil 30-sentyabrda “Oʻzbekiston Xalq taʼlimi aʼlochisi” koʻkrak nishoni, 2020-yil 4-fevralda “Oʻzbekiston Xalq  taʼlimi fidoyisi” koʻkrak nishoni, 2021-yilda “Mustaqillikning 30 yilligi” koʻkrak nishoni, 2022-yil 30-sentyabr kuni “Qoraqalpogʻiston Respublikasida xizmat koʻrsatgan xalq taʼlimi xodimi” faxriy unvoni bilan mukofotlandi.

Zero, “Intilganga tolʼe yor”, deb bejiz aytishmagan.

Rayhon Matjonova,

39-sonli maktabning ijodiy-madaniy masalalar boʻyicha targʻibotchisi.