49-SONLI MAKTABDA FAN OYLIGI DOIRASIDA “ONA TILI – MILLAT KOʻRKI” DEB NOMLANGAN TADBIR OʻTKAZILDI

Oʻzbek tiliga davlat maqomi berilganining 33 yilligi yurtimizda keng nishonlandi. Ushbu kunga bagʻishlab barcha hududlarda, jumladan umumtaʼlim maktablarida turli maʼnaviy-maʼrifiy tadbirlar oʻtkazildi.

Sana munosabati bilan Amudaryo tumanidagi 49-sonli maktabda ham “Ona tili – millat koʻrki” deb nomlangan tadbir tashkil etildi. Maktabning ona tili va adabiyot fani oʻqituvchilari Matluba Berdimaqova hamda Nilufar Abdullayevalar tomonidan tayyorlangan ushbu tadbirni maktab direktori Shukurboy Ayimbetov ochib berdi va barchani til bayrami bilan tabrikladi. Shuningdek, ona tilining davlat tili sifatidagi oʻrni va ahamiyatini yanada kuchaytirish, uni faqatgina rasmiy til sifatida emas, balki, milliy madaniyat, maʼnaviyat timsoli sifatida yanada boyitish hamda sofligini saqlashga barcha birdek masʼul ekanini taʼkidlab oʻtdi.

Tadbirda soʻzga chiqqan fan oʻqituvchilari til – davlat timsoli, mulki, ruhi, millatning madaniy va maʼnaviy boyligi, xalqning madaniyati, urf-odati, uning turmush tarzi, tarixi ekanligini, tilimizni eʼzozlash, uning davlat tili sifatidagi maqomi, jamiyatdagi mavqeini yuksaltirish, yosh avlodni ona tiliga hurmat ruhida tarbiyalash hamisha dolzarb maʼnaviy burch boʻlib qolishini eʼtirof etishdi.

Millat til bilan barhayot boʻlishini, tilning moʻʼtabar boʻlgan onaga qiyoslanishi bejiz emasligini, inson onasiz, uning mehrisiz, sof muhabbatisiz yashay olmaganidek, oʻz onasidek boʻlgan tilsiz ham hayot kechirishi aslo mumkin emasligini aytib oʻtishdi.

Tadbir maktab oʻquvchilari tomonidan tayyorlangan maʼrifiy-musiqiy dastur bilan davom ettirildi. Tadbir davomida maktabning 5-, 6-sinf oʻquvchilari til haqidagi sheʼrlar, maqollar aytib berishdi. “Ona tili tarqqiyoti” haqida maktabning 11-sinf oʻquvchisi Ruslan Boltaboyevning maʼruzasi tadbir ishtirokchilariga juda manzur boʻldi.

Shuningdek, 8-sinf oʻquvchilari sof oʻzbek tilida oʻz ijod namunalarini yaratib, uning rivojiga hissa qoʻshgan, uni ulugʻlagani uchun tazyiq-taʼqiqlarga uchragan, “xalq dushmani” degan tamgʻa bilan yurtdan quvgʻin qilingan adiblar hayotini sahna koʻrinishlarida namoyish etib, hammaning olqishini olishdi. Tildan oʻrinli foydalanishga jalb etuvchi, bu boradagi muammo va kamchiliklarni ifodalovchi sahna koʻrinishini namoyish etgan maktabning 7-sinf oʻquvchilarining ijrolari ham barcha oʻquvchilarda katta taassurotlar qoldirdi.

 Undan tashqari, 7-sinf oʻquvchilari Oʻzbekiston Respublikasining “Davlat tili haqida”gi qonunida tilga munosabatni ifoda etuvchi moddalar tasnifini aytib berishdi. Tumandagi ijodkorlarni qoʻllab-quvvatlovchi “Jayxun ilhomlari” nodavlat notijorat tashkiloti aʼzosi Farhod Avezov ham ona tili fanining taʼlimdagi oʻrni, fan oʻqituvchilarining til rivojiga qoʻshayotgan hissalari haqida toʻxtaldi.

 Tadbirga tashrif buyurganlar 9-sinf oʻquvchilari ijrosidagi dilrabo raqslarni koʻtarinki kayfiyat bilan tomosha qildilar. Oʻzbek tilining huquqiy maqomini belgilashda yengib oʻtilgan qiyinchiliklardan tortib, hozirgi kunda tilimizning boy imkoniyatlaridan keng foydalanish uchun yaratilgan shart-sharoitlar hamda davlat tilini yangi pogʻonaga olib chiqish borasida qilinayotgan saʼy-harakatlar tasvirlangan videorolikdan esa koʻplab maʼlumotlarga ega boʻldilar.

Fan oyligi doirasida oʻtkazilgan ushbu tadbir barchaga birdek manzur boʻldi va unutilmas taassurotlar qoldirdi.

O.Xudoyberganova.