Xalq deputatlari Amudaryo tuman Kengashining 53-sessiyasi toʻgʻrisida axborot

2022-yil 28-oktyabr kuni Xalq deputatlari Amudaryo tuman Kengashining navbatdagi 53-sessiyasi boʻlib oʻtdi.

Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi.

Sessiya kotibligiga 23-Bobur saylov okrugidan deputat Shavkat Yangiboyev saylandi.

Sessiyada dastlab, fuqarolik ishlari boʻyicha tuman sudi tomonidan joriy yilning 9 oyi davomida amalga oshirilgan ishlar yuzasidan Fuqarolik ishlari boʻyicha Amudaryo tuman sudi raisi Qayrulla Atamuratovning axboroti tinglandi.

Axborotda qayd etilganidek, fuqarolarning huquq va qonuniy manfaatlarini sud orqali ximoya qilish, ishlarni qonunda belgilangan muddatlarda koʻrib chiqish va aholi oʻrtasida huquqiy targʻibot ishlarini olib borish boʻyicha koʻplab samarali ishlar amalga oshirilgan.

Jumladan, koʻrib chiqilgan ishlarning 1592tasi boʻyicha hal qiluv qarorlari chiqarilgan boʻlib, shundan 1505ta daʼvo arizalari qanoatlantirilgan va 87ta ish boʻyicha daʼvo arizalar rad etilgan. 521ta ish boʻyicha ajrimlar chiqarilgan boʻlib, 27 ta ish yuritishdan tugatilgan.

Shuningdek, sudning ish rejasi boʻyicha va ish rejadan tashqari Fuqarolik ishlari boʻyicha Amudaryo tumani sudi tomonidan jami
20 marotaba aholi oʻrtasida uchrashuvlar oʻtkazilib, murojaatlari tinglangan.

Jinoyat ishlari boʻyicha Amudaryo tuman sudi raisi Jasur Oʻrazboyevning odil sudlovni amalga oshirish boʻyicha 9 oylik faoliyati yuzasidan axboroti tinglandi.

Taʼkidlanganidek, fuqarolarga qulaylik yaratish, ortiqcha ovoragarchiliklarning oldini olish maqsadida tumanning eng chekka hududlarida sayyor qabullar oʻtkazilgan. Joriy yilning 9 oyi davomida Jinoyat ishlari boʻyicha tuman sudiga 61 nafar fuqaro qabul qilingan boʻlsa, shundan 39 nafar fuqaro sayyor qabullarda murojaat qilgan.

Sessiya ishida Amudaryo tuman Xalq qabulxonasi, sektorlar va hududdagi tashkilot rahbarlarining aholi murojaatlari va muammolari bilan ishlash holati yuzasidan tuman Xalq qabulxonasi boʻlimi mudiri Erkin Rajabovning axboroti tinglandi.

Axborotda qayd etilganidek, Oʻzbekiston Respublikasi Prezidentining Virtual qabulxonasiga 2022-yil 30-sentyabr sanasiga qadar jismoniy va yuridik shaxslar tomonidan jami 1970ta masala boʻyicha murojaatlar roʻyxatga olingan. Koʻrib chiqilgan murojaatlarning 31,6 foizi ijobiy hal qilingan boʻlib, 929 tasi huquqiy maʼlumot berish orqali hal qilingan, 16 tasi uzoq muddatli nazoratga olingan boʻlib, 350 tasiga tushuntirish berilgan. Qolgan 46 ta murojaat koʻrib chiqish jarayonida.

Shuningdek, sektor rahbarlari tomonidan hal qilingan murojaatlar, “Temir daftar”, “Ayollar daftari”, “Yoshlar daftari”da ruyxatda turuvchi fuqarolarga koʻrsatilgan yordam turlari, sektor rahbarlari tomonidan oʻtkazilgan sayyor qabullarda kelib tushgan murojaatlarning hal etilishi boʻyicha batafsil maʼlumot berildi.

Sessiya ishida 2022-yil 9 oyi davomida tumanda jinoyatchilik va huquqbuzarliklarning oldini olish boʻyicha amalga oshirilayotgan ishlar, shuningdek sodir etilgan ogʻir va oʻta ogʻir turdagi jinoiy holatlar yuzasidan tuman Ichki ishlar boʻlimi boshligʻi oʻrinbosari Sharapat Joldasbayevning hisoboti tinglandi.

Aytish kerakki, haftaning har payshanba kuni “Huquqbuzarliklar profilaktikasi kuni” sifatida belgilanib, aholi orasida targʻibot tadbirlari, uchrashuvlar oʻtkazilmoqda. Shuningdek, “Havfsiz tun” tadbirlarida yoʻl transport hodisalarining oldini olishga, yoshlar oʻrtasida jamoat tartibini saqlashga alohida eʼtibor berilmoqda.

Sessiya kun tartibida tumanda “Tashabbusli byudjet” jarayonining 3-choragida gʻolib boʻlgan takliflar ijrosi boʻyicha tuman Moliya boʻlimi mudiri Ulugʻbek Bekniyazovning hisoboti tinglandi.

Moliya vazirligi tomonidan ochilgan “Ochiq byudjet” portaliga 2022-yilning 22-iyulidan 9-avgustiga qadar boʻlgan davrda tuman fuqarolari tomonidan jami 451 ta taklif kiritilgan boʻlib, shundan 5 ta taklif gʻolib deb topildi. Gʻolib boʻlgan takliflar uchun manzilli roʻyxat tuzilib, tegishli buyurtmachi tashkilotlarga mablagʻlar oʻtkazib berilgan va hozirgi kunda ushbu loyihalarni amalga oshirish ishlari davom etmoqda.

Sessiya ishida 2022-yilning 9 oyi davomida xizmatlar sohasini rivojlantirish dasturiga muvofiq amalga oshirilgan ishlar boʻyicha tuman hokimining birinchi oʻrinbosari Rashid Salayevning hisoboti tinglandi.

Qayd etilishicha, xizmatlar sohasini rivojlantirish dasturi boʻyicha yillik rejada 540 ta loyihalar amalga oshirilishi va ularda 4400 ta yangi ish oʻrinlari yaratilishi koʻzda tutilgan boʻlib, 9 oy mobaynida 553 ta loyiha ishga tushirildi hamda 841 ta yangi ish oʻrinlari yaratildi.

Dastur boʻyicha 3-chorakda ishga tushirilishi belgilangan rejaga nisbatan 385 ta loyihalar ortigʻi bilan ishga tushirilib, 400 taga koʻp yangi ish oʻrinlari yaratilgan.

Sessiya kun tartibidagi navbatdagi masala yuzasidan Amudaryo tumani hokimligining Bolalarni himoya qilish shoʻʼbasi rahbari Jahongir Xolmurdov axborot berdi.

Axborotda voyaga yetmaganlar oʻrtasida jinoyatchilik sodir etilishining oldini olish, ota-ona qaramogʻidan mahrum boʻlgan bolalarni qoʻllab-quvvatlash boʻyicha amalga oshirilgan ishlar boʻyicha batafsil maʼlumot berildi.

Sessiya ishida birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha amalga oshirilgan ishlar yuzasidan Amudaryo tuman tibbiyot birlashmasi boshligʻi Faxriddin Abdullayevning hisoboti tinglandi. Hisobotda tuman tibbiyot birlashmasi tomonidan joriy yilda bir qator yangi qurilish, mukammal tamirlash ishlari boshlab yuborilgani aytib oʻtildi.

Jumladan, 90-oʻrinli yangi tugʻruq boʻlimi binosini qurish uchun 14,3 mlrd. soʻm hamda Qangli oilaviy shifokorlik punkti binosini taʼmirlash uchun 590 mln. soʻm mablagʻ ajratilgan va qurilish ishlari davom etmoqda.

Sessiyada tuman hokimi – xalq deputatlari tuman Kengashi raisi Sultonboy Yoʻldoshev tumanni ijtimoiy-iqtisodiy rivojlantirish borasida amalga oshirilayotgan ishlardan ishtirokchilarni xabardor qildi.

Sessiya ishida Kengash vakolatiga kiruvchi boshqa masalalar ham muhokama qilinib, ular yuzasidan ham tegishli qarorlar qabul qilindi.

Shuning bilan sessiya oʻz ishini yakunladi.

Tuman hokimligining axborot xizmati.