AHOLI SALOMATLIGINI TAʼMINLASh – USTUVOR VAZIFA

Salomatlik – inson uchun juda muhim va qadrli boʻlgan boylik hisoblanadi. Mustahkam salomatlik esa mazmunli hayot kechirish, barakali umr koʻrish demakdir. Inson omili bosh mezon boʻlgan yurtimizda shu sababli sogʻliqni saqlash sohasini isloh qilish, tibbiy xizmat koʻrsatish sifati va samaradorligini yanada yuksaltirish, aholi salomatligini mustahkamlash davlat siyosatining ustuvor vazifalaridan biriga aylandi.

Amudaryo tumanida ham tibbiyot sohasida amalga oshirilayotgan islohotlar, oʻzgarishlar amalda oʻzining ijobiy natijalarini koʻrsatmoqda. Soha xodimlari esa aholiga sifatli tibbiy xizmat koʻrsatish, reproduktiv salomatligini mustahkamlash, onalar va bolalar salomatligini taʼminlash, ularni patronaj xizmati va profilaktik koʻriklar bilan qamrab olish borasidagi masʼuliyatli vazifalarini fidoyilik bilan ado etishmoqda.

Tuman Tibbiyot birlashmasi tarkibida markaziy shifoxona, Tez tibbiy yordam boʻlimi, Koʻp tarmoqli markaziy poliklinika faoliyat koʻrsatadi. Shuningdek, hududlarda qishloq oilaviy poliklinikalari, chekka qishloqlarda 11 ta mahalla tibbiyot punktlari ham tashkil etilgan. Markaziy shifoxona va Tez tibbiy yordam boʻlimiga yangidan zamonaviy tibbiy jihozlar keltirilib, xizmat sifatini yaxshilashga alohida eʼtibor

qaratilmoqda.

Shuningdek, 7 ta qishloq oilaviy poliklinikalariga zamonaviy UTT apparati oʻrnatildi. Har bir oilaviy poliklinikaga stomatolog, ginekolog, laborant-vrach, UTT shifokorlariga qoʻshimcha ish oʻrinlari ajratilib, tor doiradagi mutaxassislar faoliyati yoʻlga qoʻyilgan. Mahalla tibbiy punktlariga jadval asosida 11 nafar shifokorlar va 26 nafar hamshiralar biriktirilgan.

Aholini chuqurlashtirilgan tibbiy koʻrikdan oʻtkazishni takomillashtirish sogʻlom avlodni tarbiyalash, ona va bola salomatligini muhofaza qilish, fuqarolarda tibbiy madaniyat, sanitariya-gigiyena koʻnikmalarini shakllantirish, kasalliklarni kamaytirishda muhim ahamiyat kasb etadi. Shu bois, tumanning  olis hududlarida yashovchi  aholi uchun  chuqurlashtirilgan  sayyor tibbiy koʻriklar tashkil etilmokda.

Shunday tadbirlar doirasida olis va chekka hududlarda yashovchi 15 ming 547 nafar fuqaro tibbiy koʻrikdan oʻtkazildi. 2022-yilning oʻtgan davrida 134 nafar bemorga tuman markaziy shifoxonasida, Respublika tibbiyot markazlarida yuqori texnologik operatsiyalar oʻtkazilib, ogʻir darddan xalos boʻlishiga koʻmaklashildi va salomatliklari tiklandi. Tumanda 25 nafar qandsiz diabet bilan kasallangan bemorlar demopressin preparati, 25 yoshgacha boʻlgan qandli diabetning birinchi turi bilan kasallangan 10 nafar bemorlar oʻzini oʻzi nazorat qilish vositalari, yaʼni glyukometr va maxsus test yaproqchalari, 216 nafar qandli diabet bilan kasallangan bemorlar insulin dori vositasi bilan uzluksiz taʼminlanib kelmoqda. Yurak-qon tomir va endokrin kasalliklarni erta aniqlash boʻyicha 40 yoshdan oshgan 60 mingdan ziyod aholidan  56971 nafari skrining tekshiruvidan oʻtkazilib, aniqlangan xavf guruhlari boʻyicha rejali ravishda sogʻlomlashtirish ishlari olib borilmoqda.

Undan tashqari, tuman aholisida endokrinologik kasalliklarni barvaqt aniqlash, sifatli davolash va asoratlarini kamaytirish maqsadida qoʻshimcha 2 nafar shifokor shu mutaxassislikka, 13 nafar shifokor UTT mutaxassisligiga qayta tayyorlandi. Shuningdek, koʻp tarmoqli markaziy poliklinika tarkibida “Bolalar boʻlimi” yangidan tashkil qilinib, 14 yoʻnalishdagi tor doira mutaxassislari bilan taʼminlandi. Tuman hududidagi tibbiyot maskanlarida faoliyat koʻrsatib kelayotgan shifokor va patronaj hamshiralarning oʻquv kurslarida malaka oshirishlariga imkoniyat yaratib kelinmoqda.

Tuman Tibbiyot birlashmasida  2022-yil davomida bir qator yangi qurilish, mukammal va joriy taʼmirlash ishlari olib borildi. Qiymati 14,3 mlrd. soʻmlik 90-oʻrinli yangi  tugʻruq boʻlimi binosini qurish ishlari “Temir beton” MChJ tomonidan, 72-sonli oilaviy poliklinika binosida 749 mln. 990 ming soʻmlik mukammal taʼmirlash ishlari “Suv qurilish” MChJ tomonidan amalga oshirilmoqda. Qangli oilaviy shifokorlik punkti binosini taʼmirlash uchun 590 mln. soʻm ajratilib, hozirda smeta hujjatlari tayyorlanmoqda.

Jisman va ruhan sogʻlom inson jamiyat ravnaqi va taraqqiyotiga munosib hissa qoʻsha oladi. Buni sidqidildan anglagan holda xalqimiz salomatligini asrashga, har bir fuqaroga sifatli tibbiy xizmat koʻrsatishga masʼul boʻlgan, bemorlarga shifo ulashib kelayotgan barcha tibbiyot xodimlariga kasb bayramlari muborak boʻlsin! Soha jonkuyarlarining kasbiy faoliyatlarida muvaffaqiyatlar, ulkan zafarlar tilayman!

Faxriddin Abdullayev, Amudaryo tuman Tibbiyot birlashmasi boshligʻi.