BEShTOM MAHALLASIDAGI 24-SONLI MAKTABDA QORAQALPOQ TILI BAYRAMIGA BAGʻIShLANGAN TADBIR OʻTKAZILDI

Respublikamizda 1-dekabr – qoraqalpoq tiliga davlat tili maqomi berilgan kun, qoraqalpoq tili bayrami sifatida keng nishonlanadi. Joriy yilda ham ushbu sanaga 33-yil toʻlgani munosabati bilan katta bayram tadbirlari tashkil etildi.

Amudaryo tumanining Beshtom mahallasidagi qozoq va oʻzbek tiliga ixtisoslashgan 24-sonli maktabda qoraqalpoq tili bayramiga bagʻishlangan tantanali tadbir oʻtkazildi. Maktabning qoraqalpoq tili fani oʻqituvchilari va oʻquvchilar tomonidan tayyorlangan ushbu tadbirda tuman hokimligi, tuman Maʼnaviyat va maʼrifat markazi maʼsul xodimlari ham ishtirok etishdi. Tadbirni maktabning ijodiy-madaniy masalalar boʻyicha targʻibotchisi Guloyim Umirbekova ochib berdi va barchani bayram bilan tabrikladi.

Aytish joizki, mazkur maktabda 333 nafar oʻquvchiga 48 nafar malakali pedagoglar tomonidan zamonaviy texnologiyalar asosida taʼlim-tarbiya berib kelinmoqda. Oʻzbek va qozoq tiliga ixtisoslashgan ushbu maktabda ikki navbatda 11 ta sinfda oʻzbek va 9 ta sinfda qozoq tillarida taʼlim berilmoqda. Tajribali oʻqituvchilardan bilim olayotgan oʻquvchilar tuman va respublika miqyosida oʻtkazilib kelinayotgan turli tadbir va tanlovlarda ishtirok etib, yutuq va muvaffaqiyatlarga erishib kelishmoqda.

Tadbirda maktabning qoraqalpoq tili fani oʻqituvchisi Qamashay Jagʻalova soʻzga chiqib, maʼruza qildi va davlat tomonidan tilni rivojlantirish borasida olib borilayotgan ishlarga keng toʻxtalib oʻtdi. Dunyoning rivojlangan davlatlarida davlat tilimiz xalqaro loyihalar asosida tadqiq etilayotgani, Turkiyaning Izmir universitetida qoraqalpoq tili oʻrgatilayotganini faxr bilan eʼtirof etdi. Shuningdek, yangi lotin grafikasi asosida qoraqalpoq tili imlo lugʻati chop etilgani, Navoiy davlat pedagogika institutida qoraqalpoq tili va adabiyoti yoʻnalishi ochilgani, Qurʼon maʼnolari va boshqa bir qator diniy kitoblarning qoraqalpoq tilidagi tarjimalari nashr qilingani, bu davlat tilimizga, xalqimiz maʼnaviyatiga qaratilayotgan yuksak eʼtibor va gʻamxoʻrlik namunasi ekanligini toʻlqinlanib soʻzladi.

Shundan soʻng, maktab oʻquvchilari tomonidan qoraqalpoq tilida sheʼrlar, qoʻshiqlar ijro etildi. Milliy raqslari va qiziqarli sahna qoʻrinishlarini namoyish etib, tadbirga oʻzgacha fayz baxsh etishdi. Qoraqalpoq xalq shoirlari ijodidan namunalarni ifodali tarzda aytib berishdi. Tadbir davomida insholar tanlovi oʻtkazildi va gʻoliblar shu yerning oʻzida aniqlanib, faxriy yorliq va tashakkurnomalar bilan taqdirlandilar.

Tadbirga tashrif buyurgan tuman hokimligi, Maʼnaviyat va maʼrifat markazi masʼullari ham soʻzga chiqib, yurtimizda davlat tili boʻlgan qoraqalpoq tilini rivojlantirishga qaratilayotgan alohida eʼtibor, ushbu tilda ijod qilib, badiiy asarlar yaratgan buyuk adiblar haqida soʻzlashdi. Undan tashqari, davlatimiz rahbarining tashabbusi bilan Ibroyim Yusupov nomidagi qoraqalpoq tili va adabiyoti fanini chuqur oʻrganishga ixtisoslashtirilgan ijod maktabining ochilganini, Chimboy tumanida qoraqalpoq adabiyotining zabardast vakillari Kunxoʻja va Berdaq shoirlarning xotirasiga maqbara va muzey qurilgani, ulugʻ shoirlar Berdaq, Ajiniyoz va Ibroyim Yusupovlar asarlarini keng koʻlamda oʻrganilayotganini alohida qayd etishdi.

Qiziqarli oʻtgan tadbir davomida oʻquvchilar qoraqalpoq tilining xalqimiz ijtimoiy hayotidagi obroʻsi va nufuzini yanada oshirish, oʻsib kelayotgan yosh avlodni vatanparvarlik, milliy qadriyatlarga sadoqat ruhida tarbiyalash, yurtimizda davlat tilini toʻliq joriy qilishni taʼminlash boʻyicha amalga oshirilayotgan ishlar va shu kabi boshqa maʼlumotlarga ega boʻlishdi.

O.Xudoyberganova.