16-sonli maktabda «Konstitutsiya – baxtimiz qomusi» mavzusida maʼnaviy-maʼrifiy tadbir oʻtkazildi

Konstitutsiya – har bir davlatning, xalqning xohish-irodasi, huquq va erkinliklarini oʻzida mujassam etgan muhim qomusiy hujjat – insonparvarlik, adolatparvarlikning oliy Qonunidir. Uning har bir bobi, moddasi insonning baxtli, tinch-totuv yashashini kafolatlaydi va har qanday holatda yuksak huquqiy tamoyillar tantanasi uchun xizmat qiladi.

Ayni kunlarda mamlakatimizning barcha hududlarida, taʼlim-tarbiya muassasalari va turli jamoat tashkilotlarida Oʻzbekiston Respublikasi Konstitutsiyasining 30 yilligiga bagʻishlangan maʼnaviy-maʼrifiy tadbirlar oʻtkazilib, koʻp millatli xalqimiz tomonidan bu qutlugʻ sana munosib nishonlanmoqda.

Amudaryo tuman Xalq taʼlimi boʻlimiga qarashli 16-sonli ixtisoslashtirilgan davlat umumtaʼlim maktabida dekabr – tarix, huquq va tarbiya fanlari oyligi doirasida “Konstitutsiya – baxtimiz Qomusi” mavzusida maʼnaviy-maʼrifiy, adabiy-musiqiy kecha tashkil etildi.

8-dekabr – Oʻzbekiston Respublikasi Konstitutsiyasi qabul qilinganining 30 yillik bayrami arafasida maktabning huquq va tarbiya fani oʻqituvchisi Adolat Davekova tomonidan tashkil etilgan mazkur tadbirda 8-9-sinflar hamda 4-A sinf oʻquvchilari faol ishtirok etishdi.

Mustaqillik yillarida mamlakatimiz xalqlarining konstitutsiyaviy haq-huquqarini taʼminlash maqsadida qabul qilingan muhim huquqiy hujjatlar, Oʻzbekiston Respublikasi Konstitutsiyasi har bir moddasining xalqimiz hayotidagi amaliy ifodasini oʻzida mujassam etgan suratli lavhalar, mustaqillik davri tarixi, taraqqiyot bosqichlari xususidagi rasmlar, turli xil tarixiy jarayonlar va davlatimizning odilona siyosatini aks ettiruvchi shiorlar bilan bezatilgan maktab sahnasi tadbir ishtirokchilari qalbida Konstitutsiyamizning xalqchilligi, tariximizning teran ildizlariga hurmat va ehtirom tuygʻusini uygʻotdi.

Tarix, huquq va tarbiya fanlari oyligi doirasida tashkillashtirilgan tadbir davomida oʻquvchi-yoshlar tarix, huquq va tarbiya fanlaridan olgan bilimlarini mahorat bilan namoyish etdilar. Bir-birlariga savollar yoʻllash orqali Konstitutsiyamizning har bir moddasi haqida aniq va puxta javob berdilar. Shuningdek, oʻtgan tarixiy 30-yil davomida Konstitutsiyamizning mamlakatimiz xalqlari hayotida tutgan oʻrni, ona Vatanga cheksiz mehr-muhabbat tuygʻularini aks ettiruvchi sahna koʻrinishlarini namoyish etishib, tinchlik, millatlararo totuvlik, bagʻrikenglik, oʻzaro mehr-oqibat va mustaqillikni madh etuvchi sheʼrlar aytdilar.

Tarix, huquq va tarbiya fanlari oyligi doirasida 8-dekabr – Oʻzbekiston Respublikasi Konstitutsiyasi qabul qilinganining 30 yilligi munosabati bilan tashkillashtirilgan mazkur tadbirda 4-A sinf rahbari Barno Yoʻldosheva, Ibodat Kenjayeva, Maʼrifat Rajabova hamda Zokirjon Ilhomovlar oʻzaro hamkorlikda ish yuritganlari uchun tadbir maʼnaviy-maʼrifiy jihatdan yuqori saviyada oʻtkazildi. Unda oʻquvchi-yoshlarning tarix, huquq va tarbiya fanlaridan olgan bilimlari sinovdan oʻtkazilib, yanada mustahkamlandi. Shu bilan birga ularning qalblarida Bosh Qomusimiz – Konstitutsiyamizni yanada chuqurroq oʻrganishga boʻlgan ishtiyoq yanada ortdi.

Robiya YOʻLDOShEVA.