AMUDARYoDA UCh AVLOD VAKILLARI UChRAShIShDI
Yurtimizda keksalarni eʼzozlash, ertamiz egalarini barkamol insonlar qilib voyaga yetkazish davlat siyosatining ustuvor yoʻnalishlaridan biri hisoblanadi. Shunga koʻra oʻtmish, ayni kun va kelajakni oʻzida mujassam etgan “Uch avlod uchrashuvi” kabi maʼnaviy-maʼrifiy tadbirlarni tashkil etish el-yurtimiz hayotidagi goʻzal anʼanalardan biriga aylandi. Amudaryo tumanida ham barcha ovul va mahallalarda yoshi ulugʻ insonlar, bugungi kunda jamiyat hayotida faol boʻlgan fidoyilar va yosh avlod vakillari ishtirokida uchrashuvlar boʻlib oʻtmoqda.
16-dekabr kuni Prezidentimizning shu yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi hamda 15-martdagi “Nuroniylarni har tomonlama qoʻllab-quvvatlash, ularning turmush darajasini oshirishga doir qoʻshimcha chora-tadbirlar toʻgʻrisida”gi Qarorlariga koʻra “Uch avlod uchrashuvi” deb nomlangan katta maʼnaviy-maʼrifiy tadbir oʻtkazildi.
Tadbirda tuman hokimi Sultonboy Yoʻldashev, Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari, Nuroniylar jamgʻarmasi raisi Tursunboy Abdujabborov, sektorlar rahbarlari, tuman hokimi oʻrinbosarlari, idora-tashkilotlar rahbarlari, Mahalla va nuroniylarni qoʻllab-quvvatlash boʻlimi xodimlari, 90 nafarga yaqin nuroniylar, 80 nafardan ortiq oʻrta yosh avlod vakillari hamda 70 nafardan ortiq yoshlar ishtirok etishdi.
Tadbir Olmazor mahallasi hududida joylashgan tuman tarixiy-oʻlkashunoslik muzeyidan boshlandi. Uch avlod vakillari muzeyda yurtimiz tarixiga oid turli eksponatlar bilan tanishdilar. Mehmonlar qadim va yaqin oʻtmish davrlar tarixidan hikoya qiluvchi turli uy-roʻzgʻor buyumlari, shu yerlik aholiga xos boʻlgan milliy kiyimlar va boshqa eksponatlarni tomosha qilib, ajdodlarimizning turmush tarzi, hayoti haqidagi qiziqarli maʼlumotlar, hikoyalarni tingladilar. Shuningdek, shu yurt ozodligi uchun kurashgan, hayotini, jonini fido qilgan mard va jasur ota-bobolarimizning xotirasi, qahramonliklarini yodga oldilar.
Tuman Madaniyat markazi binosida “Yangi Oʻzbekistonda el aziz, inson aziz!” shiori ostida davom etgan tadbirda keksalar, oʻrta yosh avlod vakillari va yoshlar tumanimiz hunarmandlarining qoʻl mehnati namunalari, tadbirkorlarning mahsulotlaridan tashkil etilgan koʻrgazmani tomosha qildilar. Shundan soʻng, markazning kontsertlar zalida maʼnaviy-maʼrifiy tadbir oʻtkazildi.
Tadbirda Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari, Nuroniylar jamgʻarmasi raisi Tursunboy Abdujabborov, tuman hokimi Sultonboy Yoʻldashev, tuman Nuroniylar jamoatchilik Kengashi raisi oʻrinbosari Bekman Allamberganov, Qoraqalpogʻistonda xizmat koʻrsatgan jurnalist, shoira Robiya Yoʻldosheva, yosh ijodkor Barno Samandarovalar soʻzga chiqib, soʻnggi yillarda xalqimizning turmush farovonligini yanada yaxshilash yoʻlida amalga oshirilayotgan tizimli islohotlar va ularning ahamiyatiga toʻxtalishdi. Shuningdek, keksalik gashtini surish barobarida el-yurt ravnaqi yoʻlida mehnat qilib kelayotgan nuroniylarga alohida minnatdorchilik bildirdi va yutuqlarga erishib kelayotgan faol yoshlarning kelgusi ishlarida zafarlar tilab, har birini yurt kelajagiga munosib insonlar boʻlib voyaga yetishga daʼvat etishdi.
Tadbirda ishtirok etgan nuroniylar va yoshlarga tuman hokimligi hamda Mahalla va nuroniylarni qoʻllab-quvvatlash boʻlimi tomonidan esdalik sovgʻalari topshirildi.
Shundan keyin Oʻzbekiston kinematografiya agentligi buyurtmasi asosida “Dilshoh media” kinostudiyasi tomonidan suratga olingan Amudaryo tumanining sobiq hokimi, davlat va jamoat arbobi, xalqimizning suyukli farzandi marhum Rajapbay Yoʻldashev haqidagi “El farzandi” nomli hujjatli film namoyish etildi. Tadbir ishtirokchilari Rajapbay Yoʻldashevning el-yurt obodligi va xalq farovonligi yoʻlida qilgan fidokorona xizmatlarini yodga oldilar.
Madaniyat boʻlimi tomonidan tayyorlangan kontsert dasturi esa barcha ishtirokchilarga xush kayfiyat bagʻishladi.
Shundan soʻng uch avlod vakillari “Xon” restoranida ochiq dasturxon atrofida bir piyola choy ustida suhbatni davom ettirdilar.
Tadbir davomida soʻzga chiqqan yoshi ulugʻ otaxon va onaxonlar mashaqqatlarga toʻla hayot yoʻli va mehnat faoliyati, yoshlik davridagi oʻziga xos qiyinchiliklar, mehnat pallasidagi mashaqqatlar hamda nuroniylik paytida ularga koʻrsatilayotgan hurmat-ehtirom haqida oʻz dil soʻzlarini, samimiy fikrlarini bildirdi.
El-yurt ravnaqi yoʻlida mamlakatimiz rahbariga yaqin koʻmakchi, kamarbasta boʻlish lozimligi uch avlodga mansub yurtdoshlarimiz oʻrtasida kechgan samimiy suhbatlar bosh mavzusiga aylandi. Undan tashqari, nuroniylar xalqimiz hayoti va turmush tarzini butunlay oʻzgartirib yuborgan koʻplab ezgu ishlar haqida gapirib, kelajakni barpo etishda yoshlarning oʻrni qanday boʻlishi kerakligi haqida oʻzlarining qimmatli maslahatlarini berishdi. Yoshlar ham yurtimizda ularga yaratib berilayotgan imkoniyatlar, ulardan unumli foydalanayotganliklari va yutuqlarga erishayotganliklari haqida gapirdilar.
Suhbat davomida nuroniylarimizning boy tajribasi, oʻrta avlod vakillarining mehnati, yosh avlodning shijoati birgalikda katta kuch boʻlishi, uch avlodning mamlakatimiz taraqqiyotidagi oʻrnini alohida eʼtirof etildi.
Tadbir davomida tumanda uzoq yillar davomida yurt ravnaqi, yosh avlod taʼlim-tarbiyasi yoʻlida fidokorona mehnat qilgan keksa avlod vakillariga esdalik sovgʻalari topshirildi.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
