“UCh AVLOD UChRAShUVI” TADBIRI OʻTKAZILDI

Yurtimizda tinchlikni, osoyishtalikni mustahkamlash, aholi farovonligini, turmushi sifatini oshirish, ularning oʻz hayotlaridan rozi boʻlib yashashlariga erishish borasida tizimli ishlar olib borilmoqda. Ayniqsa keksalarni eʼzozlash, ularning yurtimiz taraqqiyotiga qoʻshgan hissalarini munosib eʼtirof etish, mehnat faoliyati davomida toʻplagan boy tajribasidan yosh avlod tarbiyasida unumli foydalanish borasida ibratli ishlar qilinayotir. Nuroniylar, mehnatda boshqalarga ibrat boʻlayotganlar va yosh avlod vakillarini jamlaydigan “Uch avlod uchrashuvi” tadbirlari ham shu maqsadga xizmat qiladi.

Anʼanaga aylanib borayotgan buningdek tadbirlarda yurtimizda inson omiliga yuksak eʼtibor berilayotgani, jamiyatimizning har bir aʼzosiga gʻamxoʻrlik, mehr-oqibat koʻrsatilayotgani, ularning orzu-niyatlari roʻyobga chiqishiga imkoniyat yaratilayotgani taʼkidlanmoqda, bugungidek osuda, farovon hayotning qadriga yetish lozimligi targʻib etilmoqda.

Shu yilning 16-yanvarida Mangʻit shahrining Beruniy nomli mahallasida ham “Yangi Oʻzbekistonda el aziz, inson aziz” shiori ostida “Uch avlod uchrashuvi” tadbiri oʻtkazildi.

Tadbirga mahalla hududida istiqomat qiluvchi mehnat faxriylari, turli sohalarda mehnat qilayotgan fuqarolar va faol yoshlar ishtirok etdilar.

Tadbirga tashrif buyurganlar mahalla fuqarolar yigʻini maʼmuriy binosiga kirish qismida mahalla hunarmand yoshlarining mehnati mahsuli namunalarining koʻrgazmasi bilan tanishdilar. Shuningdek, mahalla fuqarolar yigʻini faoliyati, mahalla hayotiga doir fotosuratlar ham barchaning diqqatini oʻziga jalb etdi.

Aytish joizki, keyingi vaqtlarda ushbu mahalla hududida ham koʻpgina ijobiy oʻzgarishlar boʻldi. Jumladan 4 ta koʻchalarga asfalt yotqizilib, yoʻlakchalar qurildi. Tungi yoritgichlar qoʻyilib, odamlarning tungi vaqtlarda ham bemalol harakatlanishlariga sharoit yaratildi. Hududdagi 31-sonli maktabga oʻquvchilarning xavfsiz borib-kelishlarini taʼminlash maqsadida maktab oldidan oʻtgan ulkan yoʻlga belgilar qoʻyildi. Savdo, maishiy xizmat koʻrsatish shohobchalari soni ortdi.

Tadbirda mahalla fuqarolar yigʻini raisi Murotboy Haybullayev bu haqda batafsil gapirdi.

Uch avlod uchrashuvida mahallada istiqomat qiluvchi mehnat faxriylari Ozod Tajimurodov, Mavlonbergan Tojiboyev, Shukurjon Xoʻjamurodova, Malika Davlatboyeva, Rayma Rajabova, Zulxumor Fayzullayeva, Dilorom Yoqubovalar yoshlarga oʻzlarining hayoti va mehnat faoliyati haqida gapirib berdilar. Yoshlarning kamol topishi uchun yurtimizda yaratilayotgan imkoniyatlarni qadrlash, ulardan unumli foydalanish lozimligini taʼkidladilar.

Shundan soʻng yurt tinchligi, taraqqiyoti, yosh avlod taʼlim-tarbiyasi yoʻlida fidoyi mehnat qilgan va bugungi kunda ham mahalladagi madaniy-maʼrifiy tadbirlarda faol qatnashib kelayotgan faxriylarga tashakkurnomalar taqdim etildi.

Nuroniylar oʻzlariga koʻrsatilgan eʼtibor uchun minnatdorchilik bildirdilar. Tadbirda yoshlar keksa avlod vakillarining yoshlik davrida koʻrgan qiyinchiliklari, zahmatli mehnat jarayoni va nuroniylik davrida hukumatimiz va yurtdoshlarimiz koʻrsatayotgan hurmat-ehtiromidan xursand ekanliklaridan ulkan ibrat olganliklarini taʼkidlashdi.

Uch avlod vakillarini birlashtirgan tadbir barchada ulkan taassurotlar qoldirdi.

Oygul RAJABOVA.