“Tabiat va biz” mavzusida rasmlar tanlovi oʻtkazildi

Oʻzbekiston “Mahalla” xayriya jamoat fondi Amudaryo tuman boʻlinmasi Qoraqalpogʻiston Respublikasi Joʻqorgʻi Kengesi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan “Mahallalarda obodlikni taʼminlash, aholi oʻrtasida sogʻlom turmush tarzini targʻib qilish, aholining tibbiy va ekologik madaniyatini oshirish” mavzusida eʼlon qilingan davlat granti tanlovida “Obod mahallam” nomli loyihasi bilan qatnashib, gʻolib boʻlgan edi.

Loyihaning maqsadi atrof-muhitni muhofaza qilish va tabiiy resurslardan oqilona foydalanish sohasidagi qonun hujjatlari talablari buzilishining oldini olish, uni aniqlash va unga chek qoʻyishga, tabiatni muhofaza qilish faoliyati samaradorligini oshirishga hissa qoʻshish maqsadida qonun hujjatlariga muvofiq fuqarolarning oʻzini oʻzi boshqarish organlari, nodavlat notijorat tashkilotlari va fuqarolar bilan hamkorlikda jamoatchilik ekologik nazoratini amalga oshirishdan iborat. Shuningdek, aholining ekologiyaga oid bilimlarini yanada kengaytirish maqsadida uchrashuvlar, davra suhbatlari, tanlovlar tashkil qilish, hududlarni obodonlashtirish va koʻkalamzorlashtirish, atrof-muhit muhofazasiga hissa qoʻshish ham grant loyihasining maqsadlari qatoriga kiradi.

Bu boradagi tadbirlar, amaliy ishlar, uchrashuvlar va turli mavzulardagi insholar tanlovlari loyihaning ish rejasiga asosan oʻz vaqtida oʻtkazib kelinmoqda.

Tumandagi “Barkamol avlod” bolalar maktabida aholi, ayniqsa yoshlarni tabiatga ehtiyotkorona munosabatda boʻlish, tabiiy resurslarni tejashga daʼvat qilish, ularning ekologiyaga oid bilimlarini oshirish maqsadida “Jayxun ilhomlari” nodavlat notijorat tashkiloti bilan hamkorlikda Mangʻit shahri va shahar atrofidagi hududlarda joylashgan maktab oʻquvchilari oʻrtasida “Tabiat va biz” mavzusida rasmlar tanlovi oʻtkazildi.

Tanlovda 42 nafar yosh moʻyqalam tutgan iqtidorli maktab oʻquvchilari ishtirok etishdi.

Tanlovning ochilish marosimida “Mahalla” xayriya jamoat fondi Amudaryo tuman boʻlinmasi boshligʻi Bahodir Boltaboyev, “Jayxun ilhomlari” nodavlat notijorat tashkiloti raisi Oʻrozali Reyimov, “Barkamol avlod” bolalar maktabi direktori Xonimjon Rajabova, mazkur tanlov hakamlar jamoasi raisi, 69-sonli maktabning tasviriy sanʼat fani oʻqituvchisi Malohat Boltaboyevalar soʻzga chiqib, tanlovning maqsadi hamda yosh rassomlar oldiga qoʻyiladigan talablar haqida gapirdilar.

Boʻlib oʻtgan mazkur tanlov tumanimizda kelajagi umidli yosh rassomlarning koʻp ekanligini yana bir bor namoyon qildi.

6-fevral kuni Amudaryo tumani Mahalla va nuroniylarni qoʻllab-quvvatlash boʻlimi binosida mazkur tanlov gʻoliblarini taqdirlash marosimi boʻlib oʻtdi. Malohat Boltaboyeva, Sarvar Nurullayev, Manzura Ashirboyevalardan iborat hakamlar hayʼati xulosasiga koʻra gʻolib va sovrindorlar aniqlandi. Hakamlar xulosasiga koʻra 40-sonli maktabning 10-sinf oʻquvchisi Zafarjon Bahromboyev 1-, 1-sonli maktabning 9-sinf oʻquvchisi Maftuna Nurimbetova 2-, 57-sonli maktabning 11-sinf oʻquvchisi Otabek Norboyev 3-oʻrinni egallashdi.

56-sonli maktabning 9-sinf oʻquvchisi Dilshodbek Bozorboyev “Eng yaxshi qishloq tasviri”, 40-sonli maktabning 10-sinf oʻquvchisi Quvonchbek Toirov “Kompozitsion tasvir uchun”, 31-sonli maktabning 6-sinf oʻquvchisi Charosoy Jumaniyazova “Bunyodkorlik gʻoyasi uchun” 27-sonli maktabning 8-sinf oʻquvchisi Asaloy Chorshamova “Eng yaxshi tabiatni asrash mavzusi uchun”, 30-sonli maktabning 7-sinf oʻquvchisi Dilrabo Ikramova “Goʻzal tabiat tasviri uchun”, 42-sonli maktabning 6-sinf oʻquvchisi Kumushoy Hayitboyeva “Eng yorqin tabiat tasviri uchun” nominatsiyalarida gʻolib deb topildilar.

Gʻolib va sovrindorlarga “Mahalla” xayriya jamoat fondi tuman boʻlinmasi tomonidan tayyorlangan qimmatbaho sovgʻalar va “Faxriy yorliq”lar topshirildi.

Oʻrozali Reimov