YaNGI KITOBLARNI OʻQING

Tumanimizda faoliyat yuritayotgan “Jayhun ilhomlari” nodavlat notijorat tashkiloti tomonidan yoshlarning maʼnaviyatini yuksaltirish, iqtidorli yoshlarning ijodiy ishlarini ommaga tanishtirish, ularni turli zararli illatlardan ishonchli himoya qilishda keng koʻlamli ishlar olib borilmoqda.

Turli loyihalar doirasida  bolalar va yoshlar maʼnaviyatini yuksaltirish, dunyoqarashini kengaytirishga koʻmaklashish maqsadida tashkilotimiz qoshida 10 ming dona kitob jamgʻarmasiga ega kutubxona tashkil etildi.

Hozirgi kunda kutubxonamizning aʼzolari boʻlgan maktab oʻquvchilari, yoshlar, katta yoshdagi fuqarolar kutubxonamizdan turli janrlardagi kitoblarni olib oʻqib, ulkan hayot sirlaridan bahramand boʻlmoqdalar.

Kutubxonaning kitob jamgʻarmasini kengaytirish ham muvaffaqiyatli amalga oshirib kelinmoqda. Bu ishlarda  “Taraqqiyot koʻzgusi” gazetasi tahririyati homiylik qilmoqda.

Yaqinda kutubxonamizga 253 dona yangi badiiy kitoblar olib kelindi. Olib kelingan chet el mualliflari qalamiga mansub adabiyotlar, oʻzbek adabiyotining dargʻalari tomonidan bitilgan nazm va sheʼriyat durdonalari, mumtoz adabiyot namunalari, detektiv qissalar hech bir kitobxonni befarq qoldirmaydi, albatta.

Mamlakatimizdagi taniqli noshirlarning beminnat xizmatlari tufayli tumanimiz kitobxonlariga yaxshi tanish boʻlgan mashhur chet el yozuvchilaridan Gi De Mopassan, Artur Konan Doyl, Jeyms Xedli Cheyz, Deyl Karnegi, Ernest Xeminguey, oʻzbek adabiyoti namoyondalaridan Alisher Navoiy, Abdulla Qodiriy, Oybek, Odil Yoqubov, Asqad Muxtor, Pirimqul Qodirov asarlari kutubxonamizning kitoblar javonidan oʻrin oldi.

Halima Xudoyberdiyevaning 4-jildlik saylanma toʻplami  sheʼriyat ixlosmandlari uchun ulkan sovgʻa boʻldi.

Bundan tashqari, Sirojiddin Sayyid, Eshqobil Shukur, Bobur Bobomurod va boshqa shoirlarning yangi sheʼriy toʻplamlari ham kitobxonlarimizni befarq qoldirmaydi, deb ishonamiz.

Kutubxonamizning mumtoz adabiyotlar javoni ham yangi, kamyob adabiyotlar bilan boyidi.

Shuningdek, “Urush koʻrgan yozuvchilar” turkumidan Qoʻchqor Norqobilning “Bu yerlarda hayot boshqacha”, “Daryo ortidagi yigʻi” asarlari har bir oʻquvchini oʻziga tortadi. Bu kitoblarda Afgʻoniston tuprogʻida boʻlib oʻtgan urushlarda yurtdoshlarimizning  boshidan kechirgan jangovar hayot yoʻli ishonchli tarzda hikoya qilingan.

Aynan shu mavzudagi “Afgʻon shamoli” deb nomlangan 12 ta toʻplam ham biri-biridan qiziqarli voqealarga boy.

Qiziqarli kitoblarni olib oʻqishga qiziqsangiz, kutubxonamizga keling.

Maʼnaviyat durdonalari boʻlgan adabiyotlar bilan tanishib, bahra oling.

Oʻrozali REYIMOV,

“Jayxun ilhomlari” NNT raisi.