Amudaryo tuman hokimi Cultonboy Yoʻldashevning 8-mart – Xalqaro xotin-qizlar kuni bayrami munosabati bilan barcha ayol-qizlarga tabrigi

Aziz ayollar! Muhtarama onaxonlar, qadrli opa-singillar!

Avvalo, Siz azizlarni, sizlar orqali barcha onaxonlarimiz, opa-singillarimiz, dilbar qizlarimizni ezgulik va goʻzallik bayrami – 8-mart – Xalqaro xotin-qizlar kuni bilan tuman hokimligi nomidan va oʻz nomimdan samimiy tabriklayman!

Insoniyat paydo boʻlganidan beri ayol zotiga oʻzgacha hurmat-ehtirom koʻrsatilib, uning nafosati, sadoqati, aql-zakovati hamda fidoyiligi yuksak qadrlanib keladi. Barcha davrlar va zamonlarda ham jamiki xalqlar va millatlar ayolni ulugʻlab keladi. Oila va jamiyatning ustuni, xonadonimizning fayzi va farishtasi boʻlgan xotin-qizlarni eʼzozlash, ularga hurmat va ehtirom koʻrsatish xalqimizning azaliy qadriyatiga aylangan. Chunki ayol bilan hayot goʻzal va mazmunli, xonadonlarimiz obod va nurafshondir.

Shu sababli ham yurtimizda xotin-qizlarni har tomonlama qoʻllab-quvvatlash, onalik va bolalikni muhofaza qilish, oilalar mustahkamligini taʼminlash davlat siyosati darajasiga koʻtarilgan. Konstitutsiya va qonunlarimizda ham ayollarning oʻrni va nufuzi alohida mustahkamlab qoʻyilgan. Muhtaram Prezidentimiz rahbarligida amalga oshirilayotgan inson qadrini ulugʻlash, aholi uchun munosib turmush sharoitini yaratish, ehtiyojmand oilalarni qoʻllab-quvvatlashdek ezgu ishlardan ham ayol-qizlarimizni hayotdan rozi qilishdek olijanob maqsadlar koʻzlangan.

Ayniqsa, “Ayollar daftari”, “Temir daftar”, “Yoshlar daftari” kabi ijtimoiy loyihalar doirasida millionlab ayol-qizlarimizning turmush sharoitlarini yaxshilash yoʻlida amalga oshirilayotgan ishlar eʼtirofga munosibdir. Birgina 2022-yilda tumanimizda “Ayollar daftari”ga kiritilgan ijtimoiy himoyaga muhtoj 3 803 nafar xotin-qizlarga yordamlar koʻrsatildi. 87 nafar xotin-qizlarning uy-joylari homiylik hisobidan taʼmirlab berildi. Boquvchisini yoʻqotgan, yashash sharoiti ogʻir deb topilgan 56 nafar xotin-qizlarning ijara pullari uchun kompensatsiya ajratildi.

“Ayollar daftari” jamgʻarmasidan yetim yoki ota-onasining qaramogʻidan mahrum boʻlgan 16 nafar, “Yoshlar daftari” jamgʻarmasidan oilaviy sharoitlari ogʻir boʻlgan 142 nafar xotin-qizlarning kontrakt pullari toʻlab berildi. Tuman Oila va xotin-qizlar boʻlimi tavsiyasi asosida 11 nafar xotin-qizlar Oliy taʼlim muassasalariga davlat granti asosida talabalikka qabul qilindi.

Bilib-bilmay jinoyat yoʻliga kirib qolgan 3 nafar xotin-qizlar Oila va xotin-qizlar boʻlimining kafilligi asosida qamoq jazosidan saqlab qolindi va sogʻlom turmush tarziga qaytarildi. Bu kabi yuzlab misollar mamlakatimizda ayol-qizlarga berilayotgan eʼtiborning yorqin ifodasidir. Ushbu yoʻnalishdagi ishlar “Insonga eʼtibor va sifatli taʼlim yili” deya nomlangan joriy yilda ham uzluksiz davom ettiriladi.

Hurmatli onaxonlar, opa-singillar, munis ayollar!

Bugun barcha sohalarda ilgʻor va jonkuyar ayollarimiz oʻzlarning bor kuch-gʻayrati bilan davlat ravnaqi va xalq farovonligiga munosib hissa qoʻshib kelmoqdalar. Iqtisodiy yoki ijtimoiy yoʻnalishdagi qaysi sohani olib qaramaylik, oʻz kasbining haqiqiy egasi, oʻz ishining bilimdoni boʻlgan faol ayollarni uchratishimiz mumkin.

Nuroniy momolarimizning pand-nasihatlarini, taʼlim-tarbiyasini olgan oqila va intiluvchan qizlarimiz esa ilm-fan choʻqqilarini egallab, sportda, madaniyat va sanʼatda ulkan yutuqlarni qoʻlga kiritmoqdalar.

Kechagina ana shunday iqtidorli qizlarimizdan biri yuksak davlat mukofoti bilan taqdirlanib, butun amudaryoliklarning quvonchiga sababchi boʻldi. Prezidentimizning 6-mart kungi qaroriga koʻra tumanimizdagi 35-sonli maktabning 11-sinf oʻquvchisi Samandarova Barno Tozaboy qizi Zulfiya nomidagi Davlat mukofoti bilan taqdirlandi.

Oʻzining iqtidori, izlanuvchanligi, muhim gʻoya va tashabbuslari, ibratli amaliy ishlari va erishgan yutuqlari bilan yurtimiz yoshlariga oʻrnak boʻlib kelayotgan Zulfiyaxonim izdoshlari qatoridan Amudaryo tumanining chekka ovulida tugʻilib oʻsgan Barno Samandarovadek hamyurtimizning ham joy olgani barchamizga gʻurur va faxr-iftixor bagʻishlaydi.

Fursatdan foydalanib, Barno Samandarovaning ota-onasi va yaqinlarini, oʻqituvchilari, ustoz va murabbiylarini farzandi va shogirdining ushbu yuksak davlat mukofotiga sazovor boʻlgani bilan chin qalbimdan tabriklayman! Barno kabi iqtidorli va intiluvchan qizlarimiz safi koʻpayaversin!

Muhtarama ayollar, qadrli opa-singillar!

Bugungi qutlugʻ sana – Xalqaro xotin-qizlar kuni bilan yana bir bora barchangizni tabriklab, Siz aziz va muhtarama ayol-qizlarimizga dunyodagi eng ezgu tilaklarni tilayman! Barchangizga oilaviy xotirjamlik, xonadonlaringizga tinchlik, fayzu baraka tilayman. Xalqimizning, davlatimizning, yaqinlaringizning gʻamxoʻrligi, mehru-muhabbati va ardogʻida yashash baxti Sizni hech qachon tark etmasin! Bayramingiz muborak boʻlsin, qadrli onaxonlar, aziz opa-singillar va dilbar qizlar!